"ABŞ Ukraynaya yardımı dayandırsa, Rusiya 2026-cı ildə Kiyev və Lvovu ələ keçirəcək" - "The Hill"

Bizi sosial şəbəkələrdən izləyin:

"Birləşmiş Ştatlar "qənaət etmək" adı altında Ukraynaya dəstəyi kəsərsə, Kiyev işğal olunacaq..."

Əgər ABŞ Ukraynaya hərbi yardımı dayandırsa, bunun həm Kiyev, həm də Vaşinqton üçün fəlakətli nəticələri olacaq.

Moderator.az xəbər verir ki, bu barədə Amerikanın Sahibkarlıq İnstitutunun baş elmi işçisi Eleyn MakKasker "The Hill" nəşrindəki müəllif məqaləsində yazıb.

ABŞ-ın dəstəyi olmadan Ukrayna ərazilərini daha sürətlə itirəcək və Ukrayna Silahlı Qüvvələrinin silah çatışmazlığı səbəbindən Rusiya 2025-ci il ərzində əhəmiyyətli irəliləyiş əldə edəcək.

2026-cı ilə qədər Ukrayna effektiv hava hücumundan müdafiə sistemindən məhrum olacaq, bu da Rusiyaya davamlı və genişmiqyaslı bombardmanlar aparmaq imkanı yaradacaq.

"Ukrayna ordusunun adi qoşunları cəsarətlə döyüşməyə davam edəcək, lakin böyük ehtimalla həmin ilin sonuna qədər dağılacaq. Bu da Rusiyaya Kiyevi ələ keçirmək və sonra NATO sərhədinə yaxınlaşmaq imkanı verəcək", - MakKasker yazır.

Analitikin fikrincə, bundan sonra Rusiya Ukraynanın ələ keçirilmiş resurslarından istifadə edərək ordusunu bərpa edəcək və onu NATO ölkələri ilə sərhəd boyunca yerləşdirəcək.

MakKasker 2030-cu ilə qədər Rusiyanın artıq digər Avropa ölkələrinə hücum etməyə hazır olacağını təxmin edir. O, həmçinin vurğulayır ki, bu uzaq görünən Avropa münaqişəsi nəticədə amerikalılar üçün də ciddi problemlər yaradacaq.

MakKasker xatırladır ki, əvvəllər ekspertlər Ukraynanın məğlub olacağı təqdirdə ABŞ-ın əlavə xərclərini hesablayıb. Onların təxminlərinə görə, ABŞ-a bu, 800 milyard dollardan baha başa gələcək, bu isə 2022-ci ildən bəri Pentaqonun Ukraynaya ayırdığı ümumi yardım məbləğindən 7 dəfə çoxdur.

"Vaşinqtona daha böyük, döyüş qabiliyyətli və operativ ordu lazım olacaq. ABŞ ordusunun Rusiya qarşısında müdafiə mövqeyini qorumaq və ya müharibə baş verdiyi halda qalib gəlmək üçün 14 yeni briqada döyüş qrupu, 18 əlavə döyüş gəmisi, 8 əlavə dəniz piyadaları taboru, 555 əlavə hərbi təyyarə və 266 000 yeni şəxsi heyət tələb olunacaq", - analitik xəbərdarlıq edir.

Bununla belə, MakKasker vurğulayır ki, Ukraynanın qələbəsi Rusiyanın öz sərhədlərinə geri çəkilməsinə, zəifləmiş ordu və iqtisadiyyatla daxili problemlərlə üzləşməsinə səbəb olacaq. Və məhz bu ssenari ABŞ-a Avropadakı hərbi xərclərini azaltmaq və diqqətini Sakit okean regionuna yönəltmək imkanı verəcək.