"Fox News"-un keçmiş aparıcısı Pentaqona rəhbərlik edəcək

Bizi sosial şəbəkələrdən izləyin:

"Heqsetin nə geniş idarəçilik, nə də siyasi təcrübəsi var, ikinci həyat yoldaşına qarşı pis davranışda ittiham edilir..."

ABŞ Konqresinin Senatı Pit Heqseti müdafiə naziri vəzifəsinə təsdiq edib. Onun namizədliyi hətta bəzi respublikaçılar arasında belə şübhə doğurur. Heqsetin nə geniş idarəçilik, nə də siyasi təcrübəsi var. O, hərbi əməliyyatların iştirakçısı, keçmiş televiziya aparıcısı və Donald Trampın sadiq tərəfdarıdır.

Moderator.az xəbər verir ki, bu barədə "bbc.com" nəşri yazıb.

Məlumatda deyilir ki, sessiya dramatik keçib. Səslər bərabər şəkildə bölünüb. ABŞ-ın vitse-prezidenti Ceyms Devid Vens öz konstitusion hüququndan istifadə edərək Kapitoliyə gəlib və Trampın namizədinə çatışmayan səsi əlavə edib.

"Fox News" telekanalının keçmiş aparıcısı, Əfqanıstan və İraqda xidmət etmiş hərbi veteran olan Pit Heqset Pentaqonun işində ciddi dəyişikliklər vəd edir. Lakin "Reuters" agentliyi vurğulayır ki, onun rəhbərliyi demokratların və hətta bəzi respublikaçıların kəskin müqaviməti ilə qarşılaşan mübahisəli namizədlik səbəbindən ciddi şəkildə nəzarət altında olacaq. Onların həm onun kvalifikasiyası, həm də temperamenti ilə bağlı şübhələri var.

"Bizim Heqset kimi müdafiə nazirimiz əvvəllər olmayıb", - Texas Universitetinin Ostin şəhərindəki tarix professoru və prezident məsələləri üzrə mütəxəssis Ceremi Suri nəşrə bildirib.

Pentaqon rəhbəri vəzifəsi ənənəvi olaraq iri təşkilatların idarə edilməsində böyük təcrübəyə malik və geniş ikipartiyalı dəstək qazanan namizədlərə verilib. Bu dəfə isə namizədin təsdiqi üçün əlavə səslərə ehtiyac olub.

Üç respublikaçı senator, o cümlədən Mitç Makkonnell Heqsetin əleyhinə səs verib. Onun sözlərinə görə, Heqset Pentaqon kimi böyük və mürəkkəb bir qurumu effektiv idarə edə biləcəyini nümayiş etdirə bilməyib. "Sadəcə "dəyişiklik agenti" olmaq istəyi bu vəzifəyə layiq olmaq üçün kifayət deyil", - Makkonnell bildirib.

Heqset qanunvericilərə bildirib ki, indiyə qədər idarə etdiyi ən böyük qrup 100 nəfər, ən böyük büdcə isə 16 milyon dollar olub. Respublikaçılar Partiyasından Minnesota senatoru vəzifəsinə namizədliyini irəli sürdüyü, lakin uğursuz olduğu dövr istisna olmaqla, onun məhdud siyasi təcrübəsi var.

Bundan əlavə, onun təyinatı bir sıra ittihamlarla korlanıb. Keçmiş qayınanası bildirib ki, Heqset ikinci həyat yoldaşını o dərəcədə təhqir edib ki, o, dolabda gizlənib və xilas edilməli olduğu halda dostlarına xəbər vermək üçün kod sözü istifadə edib. Heqset bu ittihamları qəti şəkildə rədd edib, həyat yoldaşı da hər hansı fiziki zorakılığı inkar edib.

Heqset ehtiyatda olan mayordur, ABŞ-ın İraq və Əfqanıstandakı əməliyyatlarında iştirak edib, həmçinin Quantanamo bazasında xidmət göstərib. Daha sonra veteranların hüquqlarını müdafiə edən bir təşkilata rəhbərlik edib. Dövlət strukturlarında heç vaxt işləməyib.

"Fox News" kanalında çıxış edərkən o, tez-tez NATO müttəfiqlərini tənqid edib və Çin ordusunun "ABŞ-ı məğlub etmək üçün xüsusi olaraq hazırlandığını" iddia edib.

Yeni müdafiə naziri Trampın uzunmüddətli və sadiq tərəfdarıdır. Onun kobud ifadələri və döymələri ilə tanınan xarizmatik şəxsiyyəti onu populyar edib. O, uzun illər "Fox & Friends Weekend" proqramına aparıcılıq edib.

Heqset müharibə cinayətlərində ittiham olunan zabitləri ardıcıl olaraq müdafiə edib. Onlardan biri İraqda qız uşağını və yaşlı bir nəfəri güllələyib, digəri isə silahsız yeniyetməni öldürüb. Heqset Trampı həmin hərbçiləri əfv etməyə şəxsən inandırıb. Bununla yanaşı, o, qadınların döyüş bölmələrində xidmət etməməli olduğunu bəyan edib.