“Ofisiant əsəbi halda çirkli boşqabları gətirib qabağımıza atdı, dedi ki...” -  “Kuzu Kuzu Baku” restoranından ŞİKAYƏT

“Bir neçə gün bundan əvvəl Akademik Həsən Əliyev 80D ünvanında yerləşən “Kuzu Kuzu Baku” restoranında ad günü qeyd etməyə getmişdik. 2 saata yaxın gözlədik bizə yaxınlaşan olmadı ki, sifarişi götürsün. Məcbur qalıb ofisianlara özümüz yaxınlaşıb sifarişi verdik. Ofisiantlar “bu dəqiqə gəlirik “bu saat gəlirik” deyib heç kim bizə yaxınlaşmadı. Etirazımızı bildirəndən 1 saat sonra nəhayət ki, gəlib sifarişi götürdülər. Amma baş verən hadisələr bununla bitmədi” Bunu Moderator.az-a şikayətində Ayşən Babayeva deyib. O iddia edib ki, ofisiant onların qarşısına çirkli boşqab gətirib:

 

“1 saatdan sonra ofisiant əsəbi halda boşqabı gətirib qabağımıza atdı. Gətirdiyi boşqablar isə çirkli, pis gündə idi. Neçənci ərsdə yaşayırıq ki, boşqablar natəmiz şəraitdə olsun? Çəngəllər də natəmiz vəziyyətdə idi. Sifariş etdiyimiz heç bir isti yemək gəlmədi. Ac-susuz oranı tərk etdik. Restorandan çıxanda da onlara bildirdim ki, sizi mütləq şəkildə şikayət edəcəyik. Bu sözümüzə heç məhəl də qoymadılar. Heç bir restoranda belə hörmətsizlik görməmişdim. Rəfiqəmin ad gününü bərbad etdilər. Ordan hansı əsəblə, stresslə çıxmışıqsa bunu bir Allah bilir. Hətta biz öncədən səhnənin yanından yer rezerv etmişdik. Getdik gördük ki, yerimizdə başqa adamlar əyləşib. Sözləri ilə əməlləri heç cür üst-üstə gəlmədi” deyə şikayətçi bildirib.

 

Azad İstehlakçılar Birliyinin sədri Eyyub Hüseynov saytımıza açıqlamasında bildirib ki, bu hal istehlakçıların hüquqlarının pozulmasıdır:

 

“Bu kimi məsələlərə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti nəzarət edir. Müştəri belə hallarla qarşılaşdıqda fakt üçün foto çəkməli, kassa keçini saxlamalı və sözügedən quruma müraciət etməlidir ki, ona dəymiş ziyan ödənilsin” deyə o bildirib.

 

İddialarla bağlı qarşı tərəfin mövqeyini də dərc etməyə hazırıq.