“Borçalı” İctimai  Birliyinə yeni sədr seçildi

 

Moderator.az xəbər verir ki, birliyin təsisçisi və sədri yazıçı-jurnalist Şərif Kərimli ötən dövr fəaliyyəti ilə bağlı geniş məlumat verib, perspektiv planlardan danışıb.

 

Bildirilib ki, Azərbaycanın qonşu ölkələrlə bağlı siyasətində Gürcüstanla münasibətlər xüsusi əhəmiyyət kəsb edir. Azərbaycanla Gürcüstanı təkcə iqtisadi amillər deyil, həm də siyasi-coğrafi köklər birləşdirir. Qafqazın bu iki qədim xalqının dostluq ilişkilərinin çox qədim tarixi var. Azərbaycan və Gürcüstan təkcə qonşu və dost deyil, həm də mühüm strateji tərəfdaşdır. Ölkələrimizin çoxşaxəli müna­sibətlərində qarşılıqlı faydalı əmək­daş­lığın inkişafı qonşuluq siyasətinin prioritet istiqamətlərindəndir.

 

Tədbirdə  birliyin yeni seçilmiş İdarə Heyətinin tərkibi və sədri toplantı iştirakçılarına təqdim edilib.  İdarə Heyətinin yeni sədri, tanınmış şair-publisist Dəyanət Osmanlı "Borçalı" ictimai birliyinin fəaliyyətinin istiqamətləri barədə danışaraq bildirb ki, Azərbaycan-Gürcüstan döv­lətlərinin dostluq müna­si­bət­­ləri uğurla inkişaf edir. Azərbaycan nəinki siyasi, iqtisadi, sosial, mə­də­ni sahələrdə, eləcə də Gür­cüstan vətəndaşı olan azərbaycanlı gənclərin təhsili sahəsində mad­di və mənəvi yardımını əsirgəmir. Biz QHT olaraq dövlətlərimizin əməkdaşlığı çər­çi­və­sində soy­daşlarımızın dil, mədəniyyət, təhsil haqlarının, sosial-ictimai bə­ra­bərliklərinin qorunması təşəbbüslərinin dəstək­lən­mə­si, milli maraqlarımı­zın təbliği və təşvi­qi­ işinə daha fəal ictimai dəstək verməyi düşünürük. Gürcüstan QHT-ləri ilə əməkdaşlığı inkişaf etdirmək də fəaliyyət dairəmizə daxildir. Əsas məqsəd və­tən­dən kənarda və öz qə­­­­dim ta­rixi yurd­larında yaşayan soydaş­larımızın həm­rəylik, vətənpərvərlik ru­hu­nun yük­səlməsinə, qay­­­ğılarının öyrənilməsinə, milli, ictimai, ta­ri­xi,  mə­də­ni-mənəvi dəyərlərinin qorunması işinə kömək etməkdir. Gürcüstan azərbaycanlılarının vəziyyəti iki­tərəfli münasibətlərə həmişə öz təsirini göstərib və bundan sonra da gös­tərəcəkdir. Bu amil­lərin həmişə Azərbaycan dövlətinin diq­­qət mər­kə­zin­də olması öz tarixi yurd yerlərində ya­şayan soy­daş­larımıza sahiblik hissinin ifadəsidir.

 

Birliyin İdarə Heyətinin üzvlərindən Qarabağ qazisi şair-publisist, əməkdar jurnalist Rəşid Faxralı, pedaqogika üzrə fəlsəfə doktoru, qazi şair-publisist Knyaz Aslan, fəlsəfə doktoru Razim Məmmədli, tanınmış jurnalist İradə Sarıyeva, qazi-jurnalist Paşa Babakərli, jurnalist Pünhan Əfəndiyev, heykəltəraş Cümşüd İbrahimli və digərləri Azərbaycan və Gürcüstan dövlətlərinin beynəlxalq təşkilatlarda faydalı əməkdaşlığını, bir-birilərinin ərazi bütövlüyünü dəstəkləməsini vurğulamış, Dünya azərbaycanlılarının həmrəyliyi, təşkilatlanması, Gürcüstanda yaşayan soydaşlarımızın ictimai, mədəni, sosial durumu yönündə vətəndaş cəmiyyətinin rolunun artırılması barədə fikir mübadiləsi aparıblar.

 

Şərif Kərimli quruma dönəm sədrliyində uğurlu fəaliyyətinə görə İdarə Heyəti tərəfindən “Borçalının fəxri” diplomu ilə təltif olunub.

 

Qeyd edək ki, sentyabrın 10-da Borçalı İctimai Birliyinin yeni sədri seçilən Dəyanət Osmanlı 1965-ci ildə Bolnisi rayonunun Saraçlı kəndində anadan olub. 1991-ci ildə BDU-nun jurnalistika fakültəsini bitirib. Uzun müddət rəsmi dövlət mətbuatında çalışıb. 1996-cı ildən Azərbaycan Yazıçılar Birliyinin üzvü, 1997-ci ildən isə birliyin İdarə Heyətinin üzvüdür. 2008-ci ildə Prezident təqaüdünə, bir neçə dəfə TÜRKSOY-un ödüllərinə layiq görülüb. 10 kitabın müəllifi, 100-dən çox nəşrin tərtibçi-müəllifi, redaktorudur. Dəyanət Osmanlı eyni zamanda fəal ictimaiyyətçi kimi tanınır. İndiyədək “Türk dünyası İnfo” İB-nin təsisçisi və sədri olaraq dövlət dəstəyi ilə ölkəmizdə, eləcə də xaricdə milli maraqlarımızın, milli-mənəvi dəyərlərimizin qorunması istiqamətində ictimai aktuallıq kəsb edən 14 layihə həyata keçirib.