Əslən Yardımlı rayonunun Kürəkçi kəndindən olan Elçin Mansurov 25 noyabr 1984-cü ildə Bakının Xəzər rayonunun Binə qəsəbəsində anadan olub. Elçin Mansurov ilk təhsilini Binə qəsəbəsində yerləşən 149 nömrəli orta məktəbdə alıb. Daha sonra Elçin Mansurovun ailəsi Yasamal rayonuna köçdüyündən Elçin Mansurov təhsilini 286 nömrəli tam orta məktəbdə davam etdirib. Amma sonradan Yardımlı rayonunun Kürəkçi kəndinə köçən Elçin Kürəkçi kənd məktəbində orta təhsilini başa vurub. Elçin Mansurov 2003-cü ildə Heydər Əliyev adına Azərbaycan Ali Hərbi Məktəbinə qəbul olub. 2007-ci ildə ali hərbi məktəbi nümunəvi kursant kimi bitirən  Elçin Mansurov  zabit kimi xidmətə başlayıb. Elçin Mansurov Tovuz rayonundakı “N” saylı hərbi hissədə 2 il xidmət etdikdən sonra 2009-cu ildə Goranboy rayonunda yerləşən “N” saylı hərbi hissədə kəşfiyyatçı zabit olaraq xidmətə davam edib.  Elçin Mansurov motoatıcı taborun qərargah rəisinin kəşfiyyat üzrə köməkçisi-kəşfiyyat taqımının komandiri, kəşfiyyat taqımının komandiri, kəşfiyyat bölüyünün komandiri, motoatıcı bölük komandiri, hərbi hissənin qərargah bölüyünün komandiri, hərbi hissənin döyüş hazırlığı bölməsi rəisinin baş köməkçisi vəzifələrində xidmət edib.

 

2016-cı il aprel döyüşləri zamanı Elçin Mansurov da düşmən təxribatının qarşısının alınmasında xüsusi sücaət göstərib. Həmin döyüşlər nəticəsində Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunub. Həmin döyüşlərdə Ermənistanın müdafiə naziri Seyran Ohanyan tərəfindən qurulan və Ermənistan Ordusunun “yenilməz Ohanyan xətti” olaraq tanınan müdafiə xətti 40 dəqiqə ərzində darmadağın edilib. 

 

Elçin Mansurov hərbi xidmət zamanı nümunəvi xidmətinə görə,  “Azərbaycan Respublikası Silahlı Qüvvələrinin 95 illiyi (1918-2013)”, “Qüsursuz xidmətə görə” 3-cü dərəcəli, “Azərbaycan Ordusunun 100 illiyi (1918-2018)”, “Azərbaycan Respublikası Silahlı Qüvvələrinin 90 illiyi (1918-2008)”, “Qüsursuz xidmətə görə” 2-ci dərəcəli medalları ilə təltif olunub. 

 

Elçin Mansurov 2020-ci il sentyabrın 27-də başlanan Vətən müharibəsinin ilk günündə Füzulinin azadlığı uğrunda gedən döyüşlərdə iştirak edib. Vətən müharibəsində Elçinin komandirliyi altında 24 nəfərlik qrupdan ibarət heyət heç bir itki vermədən düşmən postunu ələ keçirib. Sonrakı döyüşlərdə 17 şəhid, 5 yaralı olmaqla qisa müddət ərzində düşmənin olduqca strateji əhəmiyyətli 3 postunu ələ keçirib. Elçin Mansurov komandirliyi ilə ordumuz qısa müddətdə düşmənin 2 tağımını darmadağın edib. Döyüş zamanı mayor Elçin Mansurov tabeçiliyində olan qrupdan ayrılaraq, düşmən bölmələrinin yerləşdiyi dərinliklərə təkbaşına hücum edərək daha 22 düşmən əsgərini təkbaşına məhv edib. Amma elə həmin gün  Elçin Mansurov  düşmən snayperi tərəfindən vurularaq şəhidlik zirvəsinə yüksəlib. Elçin Mansurovun nəşi 10 oktyabr 2020-ci ildə Kənd Horadiz yaşayış məntəqəsi ətrafında tapılaraq II Şəhidlər Xiyabanında torpağa tapşırılıb.

 

Azərbaycanın ərazi bütövlüyünün bərpa edilməsində xüsusi xidmətlərinə və işğal olunan ərazilərin azad olunması zamanı düşmənin məhv edilməsi üzrə qarşıya qoyulan döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09 dekabr 2020-ci il tarixli Sərəncamına əsasən Elçin Mansurova “Vətən Müharibəsi Qəhrəmanı” adı verilib. 

 

Bundan başqa Elçin Mansurov Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulan  tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən ölümündən sonra “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalları ilə təltif edilib.