“Möhtəşəm yüzil”-də çəkilən, sol ayağı amputasiya olunan aktyorun digər ayağında da problemlər yaranıb - ÖZƏL+FOTO

“Yavaş-yavaş özümə gəlirəm. Topçubaşov adına Elmi Cərrahiyyə Mərkəzindəyəm. Həkim səhlənkarlığı ucbatından ayağımdan olmuşam. Bu məsələyə görə də heç kimi məsuliyyətə cəlb etmədilər. Dünya belədir də. Haqsızlıq baş alıb gedir. Mən nə edim? Dərdimi kimə deyə bilərəm? Haqq-ədalət öz yerini tapmadı. Heç bir yerə müraciət də etmirəm daha! Etmərəm də!”

 

Bunu Moderator.az-a açıqlamasında həkim səhlənkarlığına görə ayağının amputasiya olunduğunu deyən aktyor Əlvan Fərmanoğlu bildirib. O daha sonra əlavə edib.

 

“Sənətə davam etdirə bilmərəm. Ayağım məni sənətimdən də etdi. Ayağım olmayandan sonra hansı sənətdən danışa bilərəm?! Hansı sənətdən danışa bilərəm ki, 40 ilin sənətkarını məhv edib qoyublar! Kimsəsiz, köməksiz qalmışam! Xahiş edirəm, əgər bacarırsınızsa bu işin üstünə siz özünüz düşün. Mənim artıq gücüm çatmır” deyə o bildirib.

 

Aktyor diqqətdən kənar qaldığını bildirib.

 

“Bu illər ərzində fəxri adı da mənə çox gördülər. Pulum olmadığına görə fəxri adım da olmayıb. Tənqid-Təbliğ Teatrında, Musiqili Komediya Teatrında, Təbəssüm Teatrında, Arif Satira Teatrında çalışmışam. Hansını deyim sizə? Sənət yoldaşlarımdan da bir dəstək görməmişəm. Dəstək olmayandan sonra nə edim? İlkin Həsəni və komandası mənə dəstək olub. Onlarla “Buğlama” serialında çəkilmişəm. Maddiyatım da yoxdur. Ayda 450 manat Mədəniyyət evindən maaş alıram” deyə o bildirib.

 

Aktyorun səhhəti qəfil pisləşdiyi üçün qardaşı qızı Günəş Hacıyeva  ilə söhbətə davam edirik.

 

“Əmimin bu halı bizi də çox üzür. Klinika yalan məlumatlar verir. Guya biz onlardan təzminat tələb etmişik! Etdikləri səhv bəs deyilmiş kimi hələ yalan da danışırlar. Bu boyda insanı yıxıb böyrü üstə qoyublar. Hələ bir danışmağa üzləri də var. Avqustun 18-i əmim ayaqlarındakı ağrılarla bağlı klinikaya gedib. Anju ediblər, damarı da zədələyiblər. Sonra qanaxma baş verib. Qanaxmadan sonra da təkrar biz əmimi ora apardıq. Həkim tibbi sarğı ilə bağlayıb deyib ki, 3 gün ayağını açma. 3 gün ərzində bu insanın ayağı bağlı qalıb. Necə ola bilər sizcə? Hansı savadsız həkimə desən ki, 3 gün ayaq bağlı qalıb gülərlər adama! Ayaq da 3 gün bağlı qalanda qanqrena olur. Həkim vaxtında deyərdi ki, mən belə bir səhvə yol vermişəm. Əmimi bu vəziyyətdə otaqda qoyub gedib ki, mənim əməliyyatım var. 1 aydır ki, xəstəxanadayıq. Belə getsə hələ də burada qalacağıq. Sol ayağında da problemlər var. Həkim onun hər iki ayağını zədələyib, məhv edib. Sol ayağında qaralmalar, tromblaşmalar başlayıb” deyə sənətkarın qohumu bildirib.