Moderator.az Musavat.com-a istinadən xəbər verir ki, bunu İranda günahsız yerə həbsdə saxlanılan Azərbaycan vətəndaşı, Almaniyanın Yena Universitetinin tələbəsi Fərid Səfərlinin anası Dilarə Əsgərova deyib. 

 

 

“Yanına getməyimizi, onu həbsdə görməyimizi istəmir. Qeyri-müəyyən vəziyyətdədir. Qorxur ki, iki ölkə arasında vəziyyət pisləşər və o, həbsdən çıxa bilməz. Oğlumu sakitləşdirirəm, bildirirəm ki, 6 aydan sonra azadlığa qovuşacaq.  Ancaq yenə də rahat olmur. Sonrakı hadisələrin necə olacağı onu çox həyəcanlandırır. SEPAH-ın türməsində 50 gün psixoloji təzyiqə məruz qalıb.

 

Tək adamlıq kamerada yaşayıb. Düşünürəm ki, bütün bu qorxular onun nəticələridir.  Fikirləşir ki, hər hansısa bir bəhanə ilə həbsi uzada bilərlər.  İran -İsrail münasibətlərinin pisləşməsindən narahatdır. Düşünür ki, müharibə başlayar və o, unudular”.

 

 

“Ona həkimə müraciət etməsi üçün təkid edirəm. Dərmanlara öyrəşməsindən qorxur, ona görə də yuxusuz qalmağı seçir. Bir də bildirir ki, hərəkətlilik az olduğuna görə çəkisi çoxalıb. Həbsxanada gəzmək üçün 20 kvadrat metrlik yer ayrılıb.

 

İndi 12 nəfər məhbusla birlikdə qalır. Deyir hər dəfə ona səfirliyimizin oğlumla maraqlanmaması ilə bağlı suallar verirlər. Bu da Fəridə çox pis  təsir edir. Səfirlikdən heç kim Fəridlə əlaqə saxlamayıb. Mətbuat vasitəsi ilə səfirə müraciət etsəm də mənimlə əlaqə saxlanılmadı”.

 

Xatırladaq ki, Azərbaycan vətəndaşı, Almaniyanın Yena Universitetinin tələbəsi Fərid Səfərlinin 2023-cü il fevralın 20-də İrana səfərə getdiyi, lakin martın 4-dən ondan xəbər alınmaması ilə bağlı müraciət Xarici İşlər Nazirliyinə martın 9-da daxil olub. Fərid Səfərli İrana səfərindən bir müddət əvvəl Almaniyanın Yena şəhərinə praktika üçün gəlmiş İran vətəndaşı olan bir qadınla tanış olub.

 

O, praktikası başa çatdıqdan sonra İrana qayıdıb. Buna baxmayaraq, onlar arasında telefon əlaqəsi olub. Onlar qərarlaşıblar ki, İstanbulda görüşsünlər. Fərid İstanbula gedib və bu zaman onun tanış olduğu qadının vizası düzəlməyib. Bundan sonra Fərid İstanbuldan İrana gəlib. Uzun müddət Fərid Səfərlinin taleyindən məlumat almaq mümkün olmayıb. Yalnız 2023-cü il iyunun 1-də onun İranda casusluq ittihamı ilə həbs edildiyi məlum olub. Sonradan ona qarşı irəli sürülmüş “casusluq” ittihamı “casusluq etmək niyyəti” ittihamı ilə əvəz olunub. Məhkəmə Fərid Səfərli barəsində 2 il həbs hökmü çıxarıb.

 

Fərid Səfərli məhkəmədə ittihamı və hökmü qəbul etmədiyini bildirib.

 

Azərbaycanın baş prokuroru Kamran Əliyev 2023-cü il sentyabrın 14-də Bakıda səfərdə olan İranın baş prokuroru Mohammad Kazem Movahedi-Azadi ilə görüşündə Fərid Səfərli ilə bağlı cinayət işi ətrafında müzakirə aparıb. Daha sonra Tehranın Apellyasiya Məhkəməsi Fərid Səfərli ilə bağlı hökmdən verilən apellyasiya şikayətini təmin etməyib.