Bir neçə gün öncə bir qrup iş adamının Sumqayıt Şəhər İcra Hakimiyyətinin (ŞİH) başçısı Zakir Fərəcov və qurumun Ərazi idarəetmə və yerli özünüidarəetmə orqanları ilə iş şöbəsinin müdiri Gündüz Əliyevlə bağlı Prezident İlham Əliyevə və Birinci vitse-prezident Mehriban Əliyevaya ünvanladıqları müraciəti, şikayət məktubunu yayımlamışdıq (Link: //moderator.az/az/hadise/772930/sumqayitin-icra-bascisindan-prezidente-aiq-sikayet-is-adamlarinin-3-milyon-manatliq-borcu-qaytarilmir/). 

 

İş adamlarının Prezidentə müraciəti sosial şəbəkələrdə böyük rezonans doğurdu.

 

 

Ümumiyyətlə, son zamanlar Sumqayıtla bağlı mətbuatda yayılan neqativ xəbərlər durmadan artır. Ölkə başçısının məmurların özbaşınalığı və talançılıq halları ilə bağlı xəbərdarlıqlarına baxmayaraq, bəzi məmurlar öz çirkin əməllərindən əl çəkmək istəmir. 

 

"İndi abadlıq adı ilə bilirəm ki, sahibkarlardan vəsait yığırlar. Bu, qətiyyən qəbuledilməzdir. Belə abadlıq bizə lazım deyil." -deyən ölkə başçısı, zamanında həmin məmurlar üçün belə bir xəbərdarlıq da etmişdi: "Mən xəbərdarlıq etmişdim. Bəzilərinə dedim ki, hər kəs eşitsin, əyri yolla getsəniz inzibati cəza ən yüngül cəza olacaq. İnzibati cəza ilə iş məhdudlaşmayacaq. Amma bəziləri bəlkə hesab edirdilər ki, onlara aid deyil. Ona görə belə yolverilməz addımlar atdılar. Bu, əslində, dövlətə, dövlət siyasətinə edilən xəyanətdir."

 

Bəli, bu kimi hallara qarşı ölkə başçısının mövqeyi hər kəsə bəllidir. 

 

Məsəl var ki, işçinin haqqını alnının təri qurumadan vermək lazımdır. Görünür Sumqayıt icra Hakimiyyətinin başçısı Zakir Fərəcov və Sumqayıtda Yeni Bulvar Kompleksi tikintisinə və şəhər ərazisində digər abadlıq işlərinə nəzarət edən vəzifəlilər bu məsəldən xəbərsizdirlər. Belə olmasaydı sahibkarların əziyyəti elə vaxtında dəyərləndirilərdi. Onlar yəqin ki, “Şah qanun deyil, qanun şahdır” məsəlini də unudublar.

 

Moderator.az -ın əldə etdiyi məlumata görə, problem mətbuatda işıqlanandan sonra iş adamlarına saysız-hesabsız zənglər gəlib. Adının açıqlanmasını istəməyən iş adamı bildirib ki, müraciətdən sonra ən çox narahatlıq keçirən Gündüz Əliyev olub:

 

“Saytınızda yazı yayımlanandan sonra onlar çox narahat oldular. Məndə olan məlumata görə bu problem yayımlanan günü bir çox saytlardan mənim cənab prezidentə şikayət məktubumun silinməsi üçün cəhdlər edildi... Görünür ki, adlarının saytlara, sosial şəbəkələrə düşməyindən yaman “narahat” olublar. Külli miqdarda pulları yeyəndə bunu fikirləşməli idilər.. Amma Moderator.az saytından bu yazını sildirə bilmədilər. Bilirəm ki, çox adamlar zəng edib, tapşırıq verib, xahişlər ediblər amma sizin dürüstlüyünüz bir daha göstərdi ki, haqq-ədalət tərəfdarları az da olsa var. Buna görə sizə təşəkkürümü bildirirəm. Ən çox da narahatlıq keçirən Gündüz Əliyev oldu. Ona görə ki, hazırda onun Ağır Cinayətlər məhkəməsində külli miqdarda yeyinti ilə bağlı işinə baxılır. Həmçinin də bacısının məhkəməsi gedir. Onlar birlikdə cinayətdə iştirak ediblər. Onların törətdikləri cinayətlərin sayı-hesabı yoxdur. Yazıdan sonra mənə çoxlu zənglər gəldi, görüşmək istədilər. Xahiş etdilər ki, məsələni qabartmayın, başçı xaricdədir, gələndən sonra işıqlandırarsınız. Hətta həmin şəxslər birbaşa mənə zəng etməyə ehtiyat edib, başqa tanışları vasitəsilə yaxınlaşmaq istədilər. İstədilər ki, onlara özüm zəng edim danışım. Mən heç kimin qabağında əyilən insan deyiləm. Günah özlərinindir, cəzalarını da çəkəcəklər. Dövlətin ayırdığı pulları yeyəndə bilmirdilər ki, bu vəziyyətə düşəcəklər?! Mən ölkəmə, prezidentimə, qanunlarımıza inanıram və güvənirəm. Bu kimi sözləri çox eşitmişik. Ona görə də onların dediyi yalanlara biz inana bilmərik. O qədər başımıza oyunlar gətiriblər ki. Bəzi işçilər gediblər vəsaitlərini tələb etməyə, hətta onları polislə hədələyiblər. Bizə yaxınlaşıb, vəsaitin ödənilməsi ilə bağlı konkret bir vəd vermirlər. Deyirlər ki, guya çoxlarına vəsaiti qaytarmışıq, bizə çatanda isə bildirirlər ki, darıxmayın, bir az çətinliyimiz var, hələ əlimizdə pul yoxdur. Bizim, bir qrup iş adamlarının sadəcə bir çıxış yolu var ki, yalnız cənab prezidentə müraciət edək. Fevral ayında bizi dəvət edib zəmanət məktubu istədilər ki, sizə vəsait ödəniləcək. 10-15 min manat verib iş adamlarını yenə də aldatdılar. Biz başçı ilə danışmışdıq, o boyda şəhər ona həvalə olunubsa o bizi aldatmamalı idi. İş adamlarının hamısı çox narahatdırlar. Bunlar nə vaxta qədər qanunsuz addım atacaqlar? Nə vaxta qədər bizi aldadacaqlar? Bu məsələnin bir sonu olacaq yəqin ki. Bu illər ərzində sağlamlığımızdan da olmuşuq. Mənəvi və maddi ziyan çəkirik. Bu şəxslər bizim həyatımızı məhv etdilər, sağlamlığımızla oynadılar. Hər birimiz əsəb xəstəliyi tapmışıq. Bilsinlər və eşitsinlər ki, haqqımızı onlardan almayana qədər iki əlimiz yaxalarında olacaq. Mətbuatda bu qədər onların ünvanına sözlər demişik, ifadələr işlətmişik. Qarşı tərəfdən bir nəfər çıxıb yalandan da olsa açıqlama vermir ki, bu elə olmayıb, belə olub. Çünki deyəcəkləri sözlər də yoxdur. O qədər yalandan danışıblar ki.. Onlar öyrəncəlidir yalan danışmağa. Ümidimiz dövlətimizə və onun qanunlarınadır” deyə şikayətçi bildirib.