“Bundan sonra da qazilərimizə təmənnasız xidmət göstərməyə davam edəcəm”

Günay Əliyeva: “Bunu özümə mənəvi borc – insanlıq və vətəndaşlıq borcu hesab edirəm”

“Bundan sonra da qazilərimizə təmənnasız xidmət göstərməyə davam edəcəm”.

Bunu Moderator.az-a açıqlamasında həkim-kosmetoloq Günay Əliyeva bildirib. Vətən müharibəsi başa çatan gündən bugünə qədər müharibə iştirakçılarına təmənnasız yardım göstərən tanınmış həkim, 2024-cü ildə də həssas kateqoroyadan olan insanlara dəstək olmaqda davam edəcəyini bildirib:

“Onlar dövlətimizin bütövlüyü, xalqımızın təhlükəsizliyi, işğaldakı torpaqlarımızın azadlığı uğrunda döyüşüb, bu yolda oddan-alovdan keçiblər. Onların bir qismi müharibədə müxtəlif yaralar, eyni zamanda psixoloji travmalar alıb. Düşünürəm ki, bu yaraların sağalmasında, bu travmaların aradan qaldırılmasında hər bir vətəndaş bilik və bacarığı daxilində iştirak etməli, onlara imkan daxilində diqqət və qayğı göstərməlidir.

Mən müharibədən dərhal sonra qazilərimizə təmənnasız yardım göstərmək üçün fəaliyyətə başladım və bu fəaliyyəti 2024-cü ildə də davam etdirməkdə qərarlıyam. Bunu özümə mənəvi borc – insanlıq və vətəndaşlıq borcu hesab edirəm.

Qazilərimiz Azərbaycanın qüruru, vətənimizin yenilməz müdafiəçiləridir. Onların xidmətində dayanmaq mənim üçün şərəfdir və hesab edirəm ki, hər kəs qazilərimizə münasibətdə bu prizmadan çıxış etməlidir”.

Seymur ƏLİYEV