Səbinə Əliyeva Ermənistan Ombudsmanının əsassız iddialarına cavab verib

Azərbaycanın İnsan Hüquqları üzrə Müvəkkili (Ombudsman) Səbinə Əliyeva Ermənistan Ombudsmanının əsassız iddialarına cavab verib.

 

Bu barədə Ombudsman Aparatından məlumat verilib.

 

Bildirilib ki, Ermənistan Ombudsmanının Azərbaycanda erməni əsirlərə işgəncə verilməsi ilə bağlı iddiaları Ermənistanın həqiqəti gizlətməyə, həmin ölkənin ənənəvi siyasətinə məxsus yalan məlumatlarla dünya ictimaiyyətinin çaşdırılmasına yönəlik növbəti addımıdır:

 

"Bununla bağlı bildiririk ki, Ombudsman Səbinə Əliyeva və Aparatın nümayəndələri beynəlxalq konvensiyaların tələbləri rəhbər tutulmaqla erməni əsirlərə və azad edilmiş ərazilərimizdə saxlanılaraq istintaqa təhvil verilmiş hərbi dəstə üzvlərinə bir neçə dəfə baş çəkiblər. Həmin başçəkmələr zamanı milli qanunvericiliyə və beynəlxalq hüquqa əsasən malik olduqları hüquqlar əsirlərə öz dillərində izah edilib. Həmin Ermənistan vətəndaşları saxlanma şəraiti və rəftardan şikayət etməyiblər. Habelə onlar üçün beynəlxalq standartlara uyğun səviyyədə tibbi xidmətin təşkil olunduğu, ailə üzvləri ilə telefon əlaqəsi saxlamağa şərait yaradıldığı müəyyən edilib. Ombudsmanın bu başçəkmələri ilə əlaqədar beynəlxalq təşkilatlara hesabatlar da təqdim olunub.

 

Ombudsmanın Milli Preventiv Qrupunun üzvləri tərəfindən Ermənistanın cari ilin sentyabrın 12-də başlatdığı son genişmiqyaslı təxribatlardan sonra əsir düşmüş erməni hərbi qulluqçulara da başçəkmə keçirilib, onlara hüquqları izah edilib. Fərdi şəkildə qəbul edilmiş həmin şəxslər də saxlanma şəraiti və rəftardan narazılıq etməyiblər.

 

Ombudsmanın həyata keçirdiyi başçəkmələrin nəticələrinə əsasən Azərbaycanda Ermənistan əsirlərinə münasibətdə beynəlxalq humanitar hüququn tələblərinə uyğun insani yanaşma sərgiləndiyi müşahidə edilib.

 

Əsirlər Ermənistana qaytarıldıqdan sonra isə Azərbaycanda onlara qarşı işgəncələrin olması, habelə bəzi şəxslərin əsir və girov götürülərək qətlə yetirilməsi kimi yanlış iddiaların tirajlanmasını dünya ictimaiyyətinin diqqətini Ermənistanın törətdiyi cinayətlərdən yayındırmaq cəhdi kimi qiymətləndiririk.

 

Qeyd etmək istərdik ki, hələ Vətən müharibəsinin gedişində tərəfimizdən erməni əsirlərin hüquqlarının təmini vəziyyətinin monitorinqi məqsədilə bu cür başçəkmələr keçirilsə də, xüsusilə Azərbaycanın yaralı hərbi əsirlərinə qarşı qeyri-insani münasibət göstərildiyini sübut edən videoların yayılmasından sonra belə Ermənistanın Ombudsman təsisatı tərəfindən həmin şəxslərin hüquqlarının təmini vəziyyətinin monitorinqi üçün bir dəfə də başçəkmə keçirilmədi.

 

Buna baxmayaraq, Ermənistan əsirliyində olmuş hərbi qulluqçularımız və 2014-cü ildən Ermənistan tərəfindən girov götürülmüş azərbaycanlı mülki şəxslər Şahbaz Quliyev və Dilqəm Əsgərov ölkəmizə qaytarıldıqdan dərhal sonra Azərbaycan Ombudsmanı onlarla görüş keçirib və fərdi söhbətlər zamanı həmin şəxslər bir sıra işgəncə hallarına, qəddar və qeyri-insani davranışa məruz qaldıqlarını bildiriblər. İfadələrdə əsirlikdə olduqları müddətdə onlara lazımi tibbi xidmətin göstərilməməsi, tibb heyəti tərəfindən qeyri-insani münasibətə məruz qalmaları da qeyd olunub. Bu faktlar sənədləşdirilməklə Ombudsman tərəfindən hesabat şəklində hazırlanaraq beynəlxalq təşkilatlara göndərilib. Bundan başqa, adıçəkilən iki azərbaycanlı mülki şəxslə bərabər işğal altında olmuş Kəlbəcərdə girov götürülmüş və ermənilər tərəfindən ağır işgəncələrə məruz qalaraq qətlə yetirilmiş Həsən Həsənovla bağlı ekspertiza rəyi və reallığı əks etdirən fotolar da həmin hesabata əlavə edilib.

 

Eyni zamanda, müharibə dövründə azərbaycanlı əsirlərə işgəncə verilməsi, cəsədlərin zorakılığa məruz qalması, yandırılması, təhqir edilməsi halları ilə bağlı da həm kütləvi informasiya vasitələrində və sosial şəbəkələrdə yayımlanmış, həm də əldə edilmiş digər sübutlara əsaslanan materiallar da tərəfimizdən dəfələrlə diqqətə çatdırılıb. Bununla bağlı məlumatlar mütəmadi olaraq Ombudsmanın rəsmi internet səhifəsi, sosial şəbəkə hesabları və mətbuatda işıqlandırılıb, hazırlanmış hesabatlar aidiyyəti beynəlxalq ünvanlara təqdim edilib.

 

Onu da xatırlatmaq istərdik ki, Ermənistan tərəfi bugünədək Birinci Qarabağ müharibəsində əsir və itkin düşmüş, girov götürülmüş dörd minə yaxın azərbaycanlı ilə bağlı məlumat verməkdən yayınır. Həmin şəxslərin məruz qaldıqları işgəncələrə dözməyərək vəfat etməsi, qətlə yetirilməsi, kütləvi şəkildə dəfn edilməsinə dair sübutlar var. Torpaqlarımız işğaldan azad edildikdən sonra həmin ərazilərdə kütləvi məzarlıqların aşkar edilməsi, orada dəfn edilmiş mülki şəxslərin və hərbçilərin işgəncəyə məruz qaldığını təsdiq edən faktlar da bunun bariz göstəricisidir.

 

Bu baxımdan, çoxsaylı cinayət əməllərinə yol vermiş və hələ də bu halları davam etdirən Ermənistan tərəfinin erməni əsirlərə qarşı Azərbaycanın humanist rəftarını əksinə təqdim etməyə cəhd göstərməsini bir daha Ermənistanın hər zaman olduğu kimi həqiqətləri təhrif etməklə dünya ictimaiyyətini çaşdırmaq və törətdiyi cinayətləri gizlətmək cəhdi kimi qiymətləndiririk.

 

Yaxşı olardı ki, Ermənistan Ombudsmanı bu cür yanlış məlumatlar yayaraq dünya ictimaiyyətini çaşdırmaq, Azərbaycan Ombudsmanının hesabatlarını plagiatlaşdırmaq əvəzinə dörd minə yaxın itkin düşmüş azərbaycanlının taleyinə aydınlıq gətirilməsinə çalışsın, bununla da, sülhə və insan hüquqlarının təmininə dəstək versin".