Bir daha İNSAN KAPİTALI haqqında...

"Lukaşenko iki ağadan asılı olan nökərdir" - Leonid Kuçma

"Hizbullah" sınmayıb və İsrailə qarşı mübarizəsini davam etdirəcək" - Naim Qasım

"Belaruslar bizdən daha fəal mübarizə aparıb" - Saakaşvili

"Putin hətta Şimali Koreyanın köməyi ilə də müharibədə qalib gələ bilməyəcək" - Pentaqon rəhbəri

ABŞ prezidenti seçkilərinə 5 gün qalıb: kim irəlidədir? - İctimai rəy sorğusunun nəticələri

Ermənistanla Türkiyə arasında hansı konkret razılaşmalar var?..-Erməni nazir açıqladı...

Keşiş Baqrat xaricə getdi: Müalicə, yoxsa daha güclü və əyani təlimat üçün?..

"Haydı, uşaqlar, cəsarətli olun, belə də davam edin!.." - Alla Puqaçova

Bir daha İNSAN KAPİTALI haqqında...

Cəmiyyət

Oxunub: 1205

26 Apr 2021 | 11:29

Milli Məclisin Mədəniyyət komitəsinin sədri Q.Paşayevanın yazısını təqdim edirik:

Azərbaycan Prezidenti cənab İlham Əliyevin bugünlərdə Hacıqabula səfəri, səfər çərçivəsində AzTV-yə verdiyi müsahibə yalnız Hacıqabulda, hətta yalnız respbulikada həyata keçirilən sosial-iqtisadi siyasətlə bağlı deyil, aid olduğumuz regionda baş verənlərə (və gözlənilənlərə) dair təsbitlərlə xüsusi aktuallıq kəsb edir.

Sosial-iqtisadi siyasətə vurğu edilincə ilk sırada qeyri-neft sektorunun inkişafına xidmət edən dövlət təşəbbüsləri qeyd olunmalıdır. Qeyd olunmalıdır ki bu sahədə müvafiq dövlət proqramları qəbul edilib, onlar ardıcıllıqla yerinə yetirilib. Vaxtilə qəbul olunmuş “Regionların sosial-iqtisadi inkişafı” proqramı uğurla icra edilməkdədir. Bu önəmli proqram içində, Hacıqabulda da böyük işlər görülüb. Məsələn, mədəniyyət, təhsil, sağlıq obyektləri tikilib və yaxud əsaslı təmir edilib. Hacıqabulun kənd yollarının 75 faizi yenidən çəkilib. Mədəniyyət obyektləri qədər infrastruktur yenilənmələri də özlüyündə bir mədəniyyət hadisəsidir. Ümummilli liderin sözləri ilə desək, “Yol – iqtisadiyyat, mədəniyyət, bir sözlə, həyat deməkdir”.

Bu sırada, rayonda qazlaşdırmanın səviyyəsinin 100 faizə çatdırıldığını da deməliyik. Elektrik enerjisi təchizatı da xeyli yaxşıladırılıb; dövlət başçısının səfərində yeni yarımstansiyanın açılışı bunun daha bir göstərcisidir. Qaz, elektrik, yol, yeni obyektlər... – bunlar hamısı vətəndaşımıza xidmət üçündür. Dövlətin bütün təşəbbüslərinin mərkəzində duran əsas amil insan və onun sosial rifahıdır. Bütün görülən işlər insanlar üçün gözəl şərait yaratmağa xidmət edir.
Prezidentin səfəri çərçivəsində açılışı olan obyektlər bölgənin gələcək iqtisadi potensialını böyük dərəcədə gücləndirəcəkdir. Bu planda, biznes üçün, yatırımlar üçün münbit ortamın yaxşılaşdığını da deməliyik. Özəl sektorun kənd təsərrüfatı sahəsinə cəlb olunmasında dövlət yatırımlarının danılmaz rolu var. Bəlli olduğu kimi, respublikamızda bütövlükdə 50-dək aqroparkın yaradılması nəzərdə tutulur; onlardan bir çoxu artıq fəaliy¬yətdədir. Cənab Prezidentin vurğuladığı kimi, dövlət həm güzəştli şərtlərlə müəyyən məbləğdə kreditlər verir, həm də, infrastruktur layihələri həyata keçirir, özəl sektor üçün münbit ortam yaradır.
Yəni qeyri-neft sektorunun inkişafı üçün ölkəmizdə yeni imkanlar yaradılır, kənd təsərrüfatı sahəsində aparılan islahatlar dayanmadan şaxələnir. Ümumən iqtisadiyyatın şaxələndirilməsi kursunun tərkib hissəsi yaxud o kursun davamı kimi, kənd təsərrüfatının şaxələndirilməsi özünə diqqət tələb edir. – Böyük aqroparkların yaradılmasının əsas məqsədi nədir? – Əlbəttə, dövlət üçün strateji mahiyyət daşıyan əhalinin ərzaq təhlükəsizliyinin təminatı özü çox önəmli (və ilkin) məqsəddir. Aqroparkların üstünlüyü ondan ibarətdir ki, burada daha bol məhsul yetişdirilir, məhsuldarlıq daha yüksəkdir. Burada ən çağdaş aqrotexniki tədbirlər tətbiq olunur. Aqropark – kənd təsərrüfatına yeni mədəni baxış deməkdir. Bildirildiyi kimi, Hacıqabulda fəaliyyət göstərən iki böyük aqroparkda yüzlərlə yerli sakin işlə təmin olunub. Eyni zamanda, kiçik fermer təsərrüfatlarının inkişafı ilə bağlı praktiki işləri də xatıraladaraq, bu iki istiqamət üzrə kənd təsərrüfatının inkişaf etdiyini məmnuniyyətlə deməliyik.

Etiraf edək, respublikamızın harasında yerləşməsindən asılı olmayaraq, hər bir rayonumuzda icra edilən böyük layihələr, yeni iş yerlərinin açılması, məhsul bolluğu, yerli mütəxəssislərin səmərləşdirici təklifləri, o təkliflərin tətbiqi və s. özlüyündə Qarabağın abadlığına da xidmət edir. Ümummilli liderin sözüdür: “İqtisadiyyatı güclü olan dövlət hər şeyə qadirdir”. 27 sentyabr 2020-ci ilədək olan dövrdə iqtisadiyyatda əldə etdiyimiz nəticələr 44 gün içində öz sözünü dedi, bugün də öz nəticələri ilə əhalimizə xidmət edir. Bununla belə, indi “Dörd Lüksemburq boyda ərazini biz sıfırdan tikməliyik, qurmalıyıq. Çünki mənfur düşmən torpaqlarda hər şeyi, bütün binaları dağıdıb”. – Beləliklə, ərazilərin bərpası və inkişafı ümummilli məsələdir və bu işlər planlı şəkildə aparılır. Bu planın icrasında dövlətimizin gücünə güc qatmalıyıq. Dövlətimizin gücü hər bir vətəndaşımızın, hər ailənin, kəndimizin, rayonumuzun, şəhərimizin... gücü ilə daha da zənginləşir. Dövlət-xalq birliyi müharibədə qələbəmizi təmin etdiyi kimi, ərazilərin bərpa-quruculuq işində də öz sözünü deyəcəkdir.

Dövlət öz üzərində düşən missiyanı təxirəsalmadan – sürət və keyfiyyəti bir arada tutaraq icra etməkdədir: işğaldan azad olunmuş ərazilərdə infrastruktur layihələrinin icrası davam edir. Cənab Prezidentin Hacıqabulda bildirdiyi kimi, azad edilmiş ərazinin elektrik təchizatı bu ilin sonuna qədər başa çatacaq. Ərazilərin yenidənqurulmasında əsas infrastruktur işlərindən biri, demək olar, birincisi, yollarla bağlıdır. Yol infrastrukturunun inkişafı yalnız Qarabağla sınırlı olmayıb, öz nəticələri ilə respublikamızın, bütövlükdə regionun simasını dəyişəcək, bir sıra önəmli imkanlar yaradacaqdır: “Azad olunmuş ərazilərdə yol infrastrukturunun yaradılması ilə bağlı bütün istiqamətlər üzrə işlər gedir. İlk növbədə, Füzuli-Şuşa yolu, Zəfər yolu, magistral yolumuz, eyni zamanda, yaxın gələcəkdə Horadiz-Zəngilan avtomobil yolunun təməli qoyulacaq. Füzuli-Hadrut, Füzuli-Cəbrayıl, Bərdə-Ağdam, Göygöl-Toğanalı-Kəlbəcər avtomobil yollarının tikintisi artıq başlamışdır və bununla paralel olaraq Bərdə-Ağdam və Horadiz-Zəngilan-Ağbənd dəmir yolu infrastrukturu da yaradılmaqdadır. Bu yol Zəngəzur dəhlizinə gəlib çatacaq və artıq cədvəl üzrə işlər gedir”. Əlbəttə, Zəngəzur indi yalnzı Zəngilandan, Naxçıvandan görünmür, Hacıqabuldan da görünür, Tovuzdan, Xaçmazdan, Balakəndən, Lənkərandan da... Necə deyərlər, bütün yollar Zəngəzura aparır...

Və Qarabağımızda daha öncələr olmamış yerlərdə, daha öncələr olmamış say və miqyasda hava limanları tikiləcək. Qarabağ torpaq yolu, dəmir yolu, hava yolu ilə, bunlardan daha artıq önəm daşıyan Ürək Yolu ilə canlanacaq, inkişaf edəcək: sürətlə, keyfiyyətlə, ürəklə! Necə də gözəl səslənir: Füzuli Beynəlxalq Hava Limanı, Zəngilan Hava Limanı, Laçın Hava Limanı!
Bütün bunlar misli görünməmiş erməni vəhşiliklərindən sonra misli görünməmiş Azərbaycan şahlanışıdır! Onlar onların olmayan torpaqlarda ancaq dağıtmaqla, yalnız yaşayış evlərini deyil, qəbirstanlıqları belə viran etməklə, yerin altını-üstünə, üstünü altına çevirməklə məşğul oldu – bu bəşəri cinayətdir, müharibə cinayətlərinin xüsusi halıdır. Bizim quruculuq, abadlıq işlərimizsə, torpağın əsl sahiblərinin ürək işidir, yaraları sarımaq işidir, gələcəyə baxmaq işidir, böyük gələcəyin inşasıdır!

Qarabağ daha heç vaxt işğalda olmayacaq; Ermənistan bir daha başını qaldıra bilməyəcək, gözü qıpıq qalacaq. – Yox, əgər Ermənistan gözüqpıqılıqdan qurtulmaq istəyində¬dirsə, zəhmət çəkib, “əvəzçıxma“ hoqqalarında deyil, əsl qonşuluq, ədalətli sülh quruculuğunda, Zəngəzur dəhlizinin açılmasında səmimi iştirakla özünü sübut etsin. Buyursun, mina xəritələrini versin, Azərbaycandan rəsmi üzr istəsin, Azərbaycana vurduğu ziyanın ödənişinə dair öhdəlik götürsün. Əgər bunu daha tez, beynəlxalq mexanizmlər işə düşmədən, əlavə zaman və insan itkisi olmadan edərsə, bu, Ermənistanın özü üçün xeyir kəsb edər. Yoxsa, Azərbaycan Dəmir Yumruğu da yerindədir, məhkəmələrdə təzminat davamız da işlənir və mütləq zəfər bizimdir!
Azərbaycan dövləti milli maraqlarımızın təmin olunmasını bütün məsələlərdə mütləq prioritet olaraq qəbul edib və bu, hər vətəndaşımızın qürurudur! Milli qürur özü bir silahdır – psixoloji mahiyyət kəsb edir, inam aşılayır, hər birimizi yeni işlərə qanadlandırır.