Xəbər verdiyimiz kimi bu gün “Ulduz” jurnalının baş redaktoru, şair Qulu Ağsəsin doğum günüdür.

 

Moderator.az-ın əməkdaşı bu münasibətlə şair Rəşad Məcidin və tənqidçi Əsəd Cahangirin fikirlərini öyrənib.

 

R.Məcid onunla birlikdə Ağdama getməyi arzu etdiyini bildirib: “Qulunun ad gününü axşam “Ovqat” verilişində şeirini deməklə təbrik elədim. Abdal-Gülablı kəndinə əsgərlərimiz girib ilk videosunu paylaşanda da mən həmin görüntüləri Quluya göndərmişdim. O kənd mənim də çox sevdiyim kənddir, gəncliyimdə orda çox olmuşam. Qulu da o qədim kənddə doğulub və yaşayıb. Qulu sağ olsun ki, o videodan sonra yaxşı bir şeir yazmışdı. O cümlədən də Ağdamla bağlı yazdığı şeirlər zəfər günlərində ən təsir edən şeirlərdən biri olub. Xüsusən də şeirlərdəki Ağdamla bağlı “Şükür külünə”, “Şükür qayıdış gününə” misraları çox təsirlidir. Onu lap cavanlıqdan, Ağdamda dərnəyə gəldiyi illərdən tanıyıram. Daha sonra onun jurnalistik və redaktorluq fəaliyyəti göz önündədir. Şair kimi də xəsisliklə az-az yazır, amma yazdığı da yadda qalır və oxucuların diqqətindən kənar olmur. Pandemiya vaxtında isə onun qüsurlarında biri də odur ki, o, virusdan qorxur və az-az görüşürük. Buna baxmayaraq tez-tez danışırıq, əlaqə saxlayırıq. Onun doğum gününü təbrik edirəm. Bu gün “525-ci qəzet”də haqqında məqalə çap etmişik. Arzu edirəm ki, Quluyla birlikdə Ağdama, xüsusən də Abdal-Gülablı kəndinə gedək. Orda daha canlı şəkildə təəssüratlarını eşidək”. 

 

Tənqidçi Əsəd Cahangir isə onu sözü duyan, bilən, üstündə əsən bir adam kimi xarakterizə etdi:

 

“Qulu Ağsəs müstəqillik dövrü poeziyasının istedadlı nümayəndələrindən biridir. Ümumiyyətlə, 90-cı illərdə bizim ədəbiyyatımıza bir sıra istedadlı yazıçı və şairlər gəlib. Onların arasında xüsusi yerlərdən birini tutan Qulu Ağsəsdir. Q.Ağsəsin poeziyası klassik poeziyamız və eləcə də altmışıncı illərdən sonra yaranan şeirimizlə sıx vəhdətdə olmaqla yanaşı, həm də müasirdi. Yəni modern eksperimentlərə, yeni ifadə tərzinə çox açıq bir şairdi. Həm də şeirin o yüksək mahiyyətini saxlamaqla yanaşı, aktualdı. Dövrün ən ağrılı hadisələrinə onun şeirlərində bədii reaksiya var. Q.Ağsəsin “Nabran novellası” kitabında toplanmış esse və şeirləri də həmişə öz müəllifinin bir ümumi keyfiyyətindən xəbər verir. Mümkün qədər az sözlə çox məna ifadə etmək, lakonizm bacarığı var onda. Qədim spartalılar lakonizmi çox sevirdilər. Hərdən mənə elə gəlir ki, Qulunu fəxri spartalı elan etmək olar. Qulu sözü bilən, duyan, onun üstündə əsən adamdı. 

Onun daha gözəl bir keyfiyyəti də redaktorluq qabiliyyətidir. Artıq neçə ildir ki, “Ulduz” jurnalının baş redaktorudur. Onun “Ulduza” gəlməsiylə jurnalın həyatında yeni bir mərhələ başlayıb. Hətta deyərdim ki, ədəbi jurnallarımız arasında o “Ulduz” adlansa da, hətta günəş olmağa iddialıdır. Yəni dizayn, azad fikir, sərbəstlik baxımından ən yaxşı ədəbi orqanlardan birinə çevrilib.  Çox səxavətlə, geniş ürəklə bütün istedadlara jurnal öz qapısını açır. Amma bütün bunlarla yanaşı, Q.Ağsəsin bir gözəl xüsusiyyəti də yaşıdı olan-olmayan istedadlara böyük sevgiylə, qayğıyla yanaşmasıdır. Çünki özü istedadlı olduğu üçün istedadların qədrini bilir və onları qiymətləndirməyi bacarır. Mən bir neçə gün əvvəl Quluya təklikdə dediyim sözü sizin vasitənizlə bütün oxuculara çatdırmaq və fikrimi tamamlamaq istəyirəm. Kaş Qulu Ağsəs kimi həm istedadlı, həm də insanlığa malik olan adamlar bizim ədəbi mühitimizdə çox olaydı. Qulunu ad günü münasibəti ilə təbrik edirəm, ona cansağlığı və yeni yaradıcılıq uğurları arzulayıram. Bizim müasir ədəbiyyatımız, ədəbi prosesimiz Qulu Ağsəslə daha gözəldi”.