“Onlar gələcək üçün ən böyük təhlükə mənbəyi olaraq qalır”

Qabil Hüseynli: “Prezidentin xalqı ayıq-sayıq olmağa səsləməsi üçün ciddi səbəblər mövcuddur”

Prezident İlham Əliyev yanvarın 10-da yerli televiziya kanallarına müsahibəsində tarixi zəfərimizə diqqət çəkib, eyni zamanda ayıq-sayıqlığı qoruyub saxlamağın vacibliyini bildirib: “İndi bəzi ölkələr var ki, öz tarixi keçmişini, tarixi uğurları illər boyunca, onilliklər ərzində istismar edirlər. Halbuki onların özlərinin o zəfərlərə heç bir aidiyyəti yoxdur. Yəni, biz o ölkələrdən olmaq istəmirik. Biz nə etmişiksə etmişik, xalq da bunu qiymətləndirir və qiymətləndirəcək. Ancaq bu tarixi Zəfəri də bundan sonra daim istismar etmək düzgün olmaz. Çünki birincisi, siyasi nöqteyi-nəzərdən düzgün olmaz. İkincisi, cəmiyyətdə elə bir sakitləşmə ovqatı da yaradılmamalıdır. Birincisi, biz hər zaman çox ayıq olmalıyıq, çünki bizə qarşı olan hərəkət, dediyimiz bu məsələlərlə bitməyəcək, bundan sonra da davam edəcək. Çünki biz dünya miqyasında çox böyük layları tərpətdik”.

Moderator.az-a açıqlamasında Prezidentin məlum çağırışına toxunan politoloq Qabil Hüseynli, bu çağırışın mövcud reallıqlardan qaynaqlandığını bildirib:

“Şübhəsiz, xalqımızın Müzxəffər Ali Baş Komandanın rəhbərliyi altında əldə etdiyi 8 Noyabr zəfəri olduqca böyük, tarixi bir zəfərdir. Lakin görünən odur ki, bu zəfər beynəlxalq arenada bəzi qüvvələri ciddi narahat edir. Buna görə də onlar Ermənistanda revanşist qüvvələri qızışdırır, yeni bir qarşıdurma üçün zəmin yartmağa çalışırlar. Bu baxımdan Prezidentin xalqı ayıq-sayıq olmağa səsləməsi üçün ciddi səbəblər mövcuddur.

Revanşist qüvvələr gələcək üçün ən böyük təhlükə mənbəyi olaraq qalır və biz bu həqiqəti unutmamalıyıq. Buna görə də hesab edirəm ki, Prezidentin hər bir çağırışı xalqımızın, dövlətimizin bu günü ilə yanaşı, həm də gələcəyi baxımdan mühüm əhəmiyyətə malikdir. Biz bundan sorna da Müzəffər Ali Baş Komandanın ətrafında sıx birləşməli, öz həmrəyliyimizi qoruyub saxlamalıyıq. Bu, gələcək uğurlarımız üçün ən mühüm amildir”.

Seymur ƏLİYEV