Ukrayna xalqı haqqında - Nəsiman Yaqublunun yazısı

Bizi sosial şəbəkələrdən izləyin:

M.Ə.Rəsulzadə sayca çox olmayan Belçika xalqı haqqında yazırdı: “Belçikalılarca: yanmaq, dağılmaq,ölmək, qərq olmaq, amansız düşmənin rəhmsiz həmlələrinə məruz qalmaq - bunlar hamısı məmləkəti müdafiəsiz bir surətdə düşmənə təslim etməkdən uludur(ilkindir,əvvəldir).Bu kiçik qitəli,fəqət böyük qəlbli millətin düsturu iştə budur:”Vətən yolunda ölmək var, dönmək yoxdur!”(Bax:”İqbal” qəzeti, 2 oktyabr 1914-cü il, N753).

Həqiqətən bəzi xalqların qeyri-adi bacarıqlarını və vətənpərvərliyini ortaya çıxaran tarixi məqamlar olur.Belə məqamlar isə çox zaman insan itkiləri və dağıntılarla müşahidə olunan müharibələrdə və azadlıq mücadilələrində görünür.

Ukrayna xalqının Rusiya işğalına qarşı apardığı mücadilə həqiqətən qəhrəmanlıqlarla doludur.Bu mücadilə qarşı tərəflə qeyri-adi gücdə olan bir xalqın əzmini və vətən sevgisini ortalığa qoydu.İlk öncə heç bir ukraynalı bu işğalla barışmadı və sonadək mücadilə edəcəyini söylədi.Ölkəni tərk edən isə qadınlar,uşaqlar və yaşlı qocalar oldu.Kişilər əlində silah vətən torpaqlarında qalıb onu qorudular.Heç kim yurdunu təslim etmək fikrində deyil.

Digər maraqlı məqam xalqın ölkə prezidenti ilə həmrəy olmasıdır.Prezidenti xalq seçib və onun əleyhinə kimsənin bir narazılığını eşitmədik.Prezident də onu xalqın seçdiyinə əmindir və ciddi məsələlərin referendumla həll edilə biləcəyini söyləyir.

Qarşı tərəf isə əksinə, köhnə sovet şüarları ilə səslənir:”imkan verməyin, hakimiyyəti ələ keçirin”. Bir- çox yerlərdə uğur qazanmış bu şüar Ukraynada reallaşmadı- hakimiyyəti xalq seçib formalaşdırıbsa onda nədən gedir söhbət?

Qarşı tərəf unutdu ki, 20 ildən çoxdur əldə zorla saxlanan hakimiyyətin effektivsizliyinə qarşı dayanan seçimli hakimiyyət var və bu çox zaman nüvə silahından da qüvvətli olur.

Yaşadığı evi dağılmış olan bir qoca öz qarısı ilə pəncərələri parçavə salafanla bağlayaraq deyir:”burda qalacağam, son nəfəsimə qədər bu evimdən çıxmayacağam”.

Bir balaca uşaq isə tək-tənha yüz kilometrlərlə yolu əzabla gedir və yenə Ukraynanın azadlığından danışır.

Ukraynadan gələn bir müğənni isə(adı Camaladır) həyat yoldaşının orada qalıb savaşdığını qürurla danışır, göz yaşlarını boğaraq xalqına güc verən mahnısını oxuyur.

Göydən bomba atılır və heç bir müddət keçməmiş insanlar evin təmirinə başlayır, dağıntıları təmizləyir.

Zirzəmilərdə uşaqlar doğulur, analar əsla şikayət etmir və “Ukraynanın müstəqilliyi, torpaq bütünlüyü” deyir. Neçə müddətdir ki, hətta həftənin günlərini unudan bir ukraynalı isə deyir:“onları biz çağırmamışıq, nə üçün buraya gəliblər,torpaqlarımızı işğal edirlər?”.

Ukrayna xalqı mücadilə edir və tarixdə əbədi qalacaq qəhrəmanlığ nümunələri göstərir. Bir müddət sonra nağıla, dastana dönəcək bu qəhrəmanlıqlar dünya xalqlarının və bizim hamımızın gözü qarşısında baş verir.