İsrail arxeoloqları  qədim Zippori-Sprinqs ərazisində qazıntılar zamanı orta əsr Avropa hərb düşərgəsinə xas olan sikkələr, ox ucları, at nalı üçün mıxlar və digər əşyalar aşkar ediblər. 

 

Moderator.az xəbər verir ki,  “Planet-today” bu haqda “Jerusalem Post” nəşrinə istinadla məlumat yayıb. 

 

Bu, “Müqəddəs Torpaq” adlanan ərazidə ilk belə tapıntıdır.

 

Xaçlı, yaxud Səlib yürüşləri 11-13-cü əsrlərdə avropalıların müqəddəs torpaqları müsəlmanlardan geri almağa çalışdıqları silsilə "müqəddəs müharibələr"dən ibarət olub. Bu ərazilərdə bir çox Qərb kilsələri və qalaları salamat qalmış olsa da, tarixçilər xristian və müsəlman qüvvələri arasında real hərbi toqquşmalara dair praktiki olaraq heç bir sübuta malik deyillər...

 

Nazaret şəhərini Aralıq dənizi ilə birləşdirən yolun yenidən qurulmasından əvvəl aparılan profilaktik qazıntılar zamanı alimlər frank əsgərlərinin hərbi düşərgəsinin izlərini tapmağa nail olublar. Bunun 12-ci əsrə aid Qalileydə bir səlibçi düşərgəsi olduğunu ortaya çıxıb. Arxeoloqlar burada Qüds Krallığının dövründə, 1099-1291-ci illər arasında müvəqqəti hərbi məskənin mövcud olduğunu göstərən yüzlərlə metal əşya - artefakt aşkar ediblər.

 

“Müqəddəs Torpağı daş və taxta binalarla dolduran romalılardan fərqli olaraq  Avropalıların hərbi düşərgələri müvəqqəti idi və buna görə də arxeoloqlar üçün onların izlərini tapmaq çox çətindir. 

 

"Biz orta əsr düşərgəsini araşdırmaq, səlibçilərin mədəniyyəti və gündəlik həyatı haqqında daha çox öyrənmək üçün unikal imkan əldə etdik" –deyə Hayfa Universitetinin tədqiqatçısı Rafael Lyuis bildirib. 

 

Alimlər sikkələrdən və at nalı mıxlarından başqa, saç sancaqları və qızılı suya çəkilmiş toqqalar kimi bir çox “kübar artefaktlar” tapıblar.

 

Texniki cəhətdən bütün səlibçilər Qüds Kralı bayrağı altında döyüşsələr də,  fərqli bölgələrdən gəlmişdilər, aralarında döyüşçü rahiblər də vardı - tamplierlər və hospitalyerlər. Arxeoloqların fikrincə, hər bir icmanın ayrı-ayrı yerləri olub. Düşərgənin elm adamlarının kəşf etdiyi hissəsi Frank kralının qoşunlarına aid imiş.

 

Tarixi məlumatlara görə, 1187-ci il iyulun 3-də mühasirədə olan Tiveriyadakı müttəfiqlərinə kömək etmək üçün 20 minə yaxın səlibçi Zippori düşərgəsini tərk edib. Ertəsi gün onlar Sultan Səlahəddinin qoşunları tərəfindən darmadağın edilib. Bu qələbə 1187-ci ilin oktyabrında Qüdsü ələ keçirən müsəlmanların Müqəddəs Torpağa yeni hücumunun başlanğıcı olub”- İsrail nəşrinin yaydığı  xəbərdə belə deyilir.

 

Sultan Laçın