Bunu Moderator.az-a açıqlamasında 2-ci Qarabağ müharibəsində tankçı kimi fəaliyyət göstərən Turab Quliyev deyib. O daha sonra döyüş xatirələrini bizimlə bölüşüb.

“Biz irəlilədiyimiz və tanklarımızın bəzilərinin minaya düşdüyü müddətdə komandirimiz Rəşad Atakişiyev bizim yanımıza gəldi və komanda verməyə başladı ki, digər texnikalar minaya düşməsin. Bu zaman BMP-nin altında partlayan mina komandirimizin üzünə sıçradı. Tez bir zamanda onu döyüş bölgəsindən təxliyyə etdik. Talış kəndini ələ keçirdikdən sonra ermənilərin mövqelərini darmadağın edərək, öz mövqelərimizi orada möhkəmlətdik. Lakin Barambat istiqamətində irəliləyəndə mühasirəyə düşdük, 7 gün demək olar ki, mühasirədə qaldıq. Bir qrup döyüşçülər köməyə gələndə ermənilər yenidən bizi tələyə saldılar və artilleriya atəşinə tutdular. Bu günki gündə yaşamağımın səbəbkarı döyüşçü yoldaşım Qədimov Yaşardır. Onun adını hər zaman fəxrlə çəkirəm. Göydə Allah, yerdə o bizim həyatımızı xilas etdi. Belə ki, "Qrad" mərmisi tankın qabağına düşəndə o məni götürüb kənara çırpdı. Özümdən getmişdim, sonra mənə uşaqlar bu hadisəni danışdı.

Şükür Allaha ki, oradan da sağ-salamat çıxdıq və erməniyə böyük ziyan vurmağı da bacardıq. Özümə gələndən sonra yenidən qaldığımız yerdən davam etdik və bu dəfə düşmənin xeyli sayda canlı qüvvəsini məhv etdik. Daha sonra Ağdərə istiqamətində döyüşə başladıq. Komandirmizin bizə olan etimadını o qədər doğrultmuşduq ki, hər komandanı bizim icra etməyimizi istəyirdi. Çünki hər hədəfin üzərinə elə yeriyirdik ki, erməni qorxub qaçırdı. Rəhbər və vəzifəli şəxslərin, komandirlərimin necə qəhrəmanlıqla döyüşməklərinin şahidi oldum. Hətta döyüşlərdən birində düşmənin açdığı raket atəşindən tankımız yanıb, özümüz isə yenə də mühasirəyə düşmüşdük. Torpaqla güc-bəla ilə tankı söndürüb, 4 gün həmin ərazidə qaldıq. İstəmədik ki, bizə başqa bir qüvvə köməyə gəlsin, çünki onları böyük bir təhlükə gözləyirdi, bu risk idi. Birtəhər bu mühasirədən də çıxdıq və gedib yenidən qisasımızı aldıq. İnanın Allaha, elə mənzərə idi ki, təkərlər göydə uçurdu. Sanki bir film idi izləyirdik. Biz onlara sübut etdik ki, Azərbaycan kiçik dövlət olsa da, dəmir yumruq kimi birləşib istədiyi hər bir şeyi etməyə qadirdir. Nə qədər erməniləri məhv etdiyimizi xalqa göstərmək üçün oradan yalnız texnikaların, silah-sursatların bir qismini gətirdik. Biz çalışırdıq ki, nə qədər bacarırıqsa irəliləyək, itkimiz də 5 yox, 1 olsun” - deyə Turab deyib. 

 

“Albert Aqarunova bənzəmək mənim üçün böyük şərəfdir. Yəqin insanlar məni ona görə qəhrəmanımıza bənzədirlər ki, onların 1993-cü ildə etdiklərini, biz 2020-ci ildə etmişik. Albert Aqarunov da ermənidən texnika gətirmişdi, biz də. Bir də tam təsadüfən tankın üstündə eynilə onun kimi dayanmışdım. Bu günlərdə Qənimətlər parkında ələ keçirdiyimiz texnikalara gedib baxdım və bu məndə böyük qürur hissi yaratdı. Özümlə bir daha fəxr etdim ki, elə qardaşlarla, bu cür xalq üçün döyüşə girmişəm. Fəxr etdim ki, Azərbaycanın vətəndaşıyam və bu ölkənin döyüşçüsü kimi tarixə düşmüşəm” - deyə o bildirib.