Qəribə məmləkətdir. "Bir dəli kor quyuya bir daş atır, min ağıllı o daşı həmin quyudan çıxarmaqda çətinlik çəkir" məsəlində olduğu kimi Azərbaycan cəmiyyəti neçə müddətdir "Tərtər işi" adlandırılan "Qordi düyünü"ün əlində girinc qalıb. 44 günlük savaş dönəmi bu istiqamətdə sosial şəbəkələrdə, çeşidli media resurslarında tozanaq qoparılmasını arxa plana keçirsə də ara sakitləşən kimi "Tərtər işi" yenidən səhnəyə çıxarılaraq eninə-boyuna çək-çevir predmetinə çevrilməyə başlanılıb. Reallığı əks etdirməyən iddialar, uydurma rəqəmlər səsləndirilərək baş verən olayların miqyası qəsdən şişirdilməklə hakimiyyətin iki strateji strukturuna - Müdafiə Nazirliyinə və Respublika Hərbi Prokurorluğuna qarşı misligörünməmiş qarayaxma kampaniyası aparılır. 

 

Əlbəttə, kimsə həmin hadisələr zamanı xeyli qanunazidd davranışlar və qeyri-adekvat hərəkətlər törədildiyini, yaxından-uzaqdan bu olaylarla əlaqəsi olanlara işgəncələr verildiyini, bu zaman qurunun oduna yaşların da yandığnı təkzib etmir və bütün bunlar əslində istintaqla, məhkəmə hökmləri ilə təsdiqini tapıb. Nəticədə vətənə xəyanət edənlərlə yanaşı həmin şəxslərin dindirilməsi zamanı törətdiyi qanunazidd əməllərə görə də azadlıqdan məhrum edilənlər adbaad hər kəsə məlumdur. İstənilən halda ortada xeyli günahsız canlar gedib və sağlamlıqlarına bərpaolunmaz fiziki-mənəvi yaralar vurulanlar da ortada. Bu baxımdan işgəncədən sonra dünyasını dəyişənlərin, xəsarət alanların ailə üzvlərinin üzüntüsünü və emosional ovqatda müxtəlif platformalarda çıxış edərək günahkarlara ən ağır cəzalar verilməsi və bəzi günahkarların hələ də azadlıqda qalması ilə bağlı üsyan püskürmələrini anlayışla qarşılamaq lazımdır. Eyni zamanda həmin hadisələrdən zərərəçəkmiş xeyli sayda insanın da sağlamlığını, işini itirməsini də kimsə dana bilməz və bu insanların da balta ilə günahkar axtarışına çıxmalarına haqq qazandırmamaq mümkün deyil. Amma açıqca görsənir ki, həmin kateqoriya insanların acınacaqlı vəziyyətindən sui-istifadə edənlərin dərdi başqadır və onlar yüksək çinli hərbçilərin adlarını mütəmadi hallandırmaqla ictimaiyyətin diqqətini özlərinə sərf edən tərəfə çəkməyə çalışırlar. Bu zaman əsassız və uydurma iddialar fonunda məqsədin heç də həmin zərərçəkmiş insanların halına acımaq deyil, bütövlükdə 44 günlük qələbəni millətin qursağında qoymağa çalışan xarici güclərin əlində alətə çevrildiklərinin fərqində olmadan kimlərisə linç etmək olduğu açıqca görsənir. 

İddia edilir ki, Bərdə korpusunun komandiri general-mayor Hikmət Həsənov həmin işgəncə  hallarının baş verməsində nəinki günahkardır, bilavasitə özü bu hadisələrdə iştirak edib, yaxud işgəncə faktları məhz onun göstərişi ilə həyata keçirilib. Bunu iddia edənlərin ümumiyyətlə hərbi nizamnamədən tutmuş hərbin yazılmamış oyun qaydalarınadək ən elementar anlayışı olmadığı qənaəti yaranır. Axı korpus komandiri niyə tabeçiliyindəki hərbçilərə işgəncə verilməsində maraqlı olsun? Axı az-çox məlumatlı adamlara bəllidir ki, prokurorluq orqanlarının müdaxiləsinə qədər işgəncə olayları Müdafiə Nazirliyinin Daxili Təhlükəsizlik İdarəsinin sabiq rəisi, ordumuzun 30 illik qara yarasına çevrilmiş Nəcməddin Sadıkovun ərköyün bacısı oğlu Ramin Əsgərovun birbaşa göstərişi və rəhbərliyi ilə həyata keçirilib. O Nəcməddin Sadıkov ki, illər uzunu Hikmət Həsənovun anasından əmdiyini burnundan gətirib və 44 günlük savaşın ilk günlərindən də Bərdə korpusuna qarşı açıq-aşkar təxribatla məşğul olub. Bizlərə bəlli olan tükürpədici təxribatın detallarını geniş ictimaiyyət bilməsə də olar, amma MN rəhbərliyinin və Ali Baş Komandanın da baş verənlərlə bağlı təfərrüatlı məlumata sahib olmalarında şübhə yoxdur.

Eyni zamanda bu olayları körükləyənlər bəlkə də məlumatsılıqdan "Tərtər işi"nin məhz kim tərəfindən üzə çıxarılmasının fərqində olmağı lazım bilməyiblər. Məhz Hikmət Həsənov onu hər cür qaralama kampaniyasının gözlədiyini, nəinki məşəqqətli olduğu qədər də uğurlu karyerasının və titullarının, hətta azadlığının da əlindən alınma ehtimalının çox yüksək olduğunu bilə-bilə, necə deyərlər, kəfəni boynuna geyinərək "vabank"a gedəcək qədər cəsarət nümunəsi sərgiləyib. Məsələni yuxarı komandanlığa məruzə edən Hikmət Həsənov Bakıdan gələnlərin onu da əli qandallı özləri ilə aparacaqlarını zənn edib. Amma bütün bu ehtimalları göz önünə alsa belə rəhbəri olduğu korpus haqqında həqiqətlərin üzə çıxmasında, günahkarların ifşa olunmasında maraqlı olub. Bunu MN rəhbərliyi də bilir, istintaq orqanları da, Ali Baş Komandan da. Odur ki, dişi-dırnağı ilə, kimsənin dəstəyi və himayəsi olmadan Bərdə korpusunun rəhbərliyindək gələrək özünü iliyinə-qanınadək vətənpərvər, cəsur komandir kimi tanıda bilmiş general-mayor Hikmət Həsənov haqqında dezinformasiyaların bu cür tirajlanması əslində silahlı qüvvələrimizin nüfuzundan təlaşa düşən xarici dairələrin dəyirmanına su tökməkdən başqa bir şey deyil. 

"Tərtər işi"nin İstintaqını həyata keçirən Respublika Hərbi Prokurorluğunun və onun rəhbəri Xanlar Vəliyevin ictimai qınaq hədəfinə çevrilməsi cəhdləri də eynilə Hikmət Həsənovla bağlı məsələdə olduğu kimi bəzən qərəzdən, bəzən də məlumatsızlıqdan qaynaqlanan dedi-qodular çələngindən başqa bir şey deyil. Müvafiq qurumlar və hətta istintaq altında olanların ailə üzvləri bilir ki, Hərbi Prokurorluğun müdaxiləsindən və Xanlar Vəliyevin qəti tapşırığından sonra işgəncə hallarına birmənalı olaraq son qoyulmaqla bərabər, xəsarət almış şəxslərin dərhal hospitallara köçürülərək müvafiq tibbi yardımlar almaları təmin edilib, bununla bağlı tibbi personala qəti tapşırıq verilib. İstintaq altında olan hərbçilərin öz ailə üzvləri ilə görüşünə şərait yaradılıb, işgəncə faktlarının və zərərçəkmişlərin qeydiyyatı aparılıb və üstəlik Xanlar Vəliyev şəxsən hadisələrin ilk günündən Mingəçevirə gedərək N saylı hərbi hissədə oturmaqla 15 gün istintaqa ümumi rəhbərliyi həyata keçirib. Təbii ki, istintaqda da təqsirləndirilən şəxsləri və ya zərərçəkmişləri qane etməyən məqamlar var və bunu da təbii qarşılamaq lazımdır. Amma bunu bu cür şişirtməklə təqdimatı başqa mətləblərdən xəbər verir.

 

Sonda vacib bir məqamı da vurğöulamaq yerinə düşər. Təcrübə göstərir ki, heç də hər zaman susmaq qızıl deyil və əsassız ittihamlara, qarayaxmalara, çeşidli desinformasiyalara cavab vermək, təkzib etmək, hansısa formada məlumat yaymaqla ictimaiyyəti çaşdırmaq istəyə qüvvələrin planlarını pozmaq olduqca vacibdir. Bu baxımdan Müdafiə Nazirliyinin və Baş Prokurorluğun baş verənləri sükutla müşahidə etməsi anlaşılan deyil. Ümid etmək olar ki, müvafiq rəsmi qurumlar "Tərtər işi" ilə bağlı ictimaiyyəti qane edən məlumatları paylaşmaqda xəsislik etməyəcək və bununla da obrazlı desək, qurbağa gölünə daş atılmış olacaq...