Artıq neçənci dəfədir ki, Moderator.az ona ünvanlanan şikayət məktubunu müəllifin israrlı xahişi ilə olduğu kimi, üslubuna belə toxunmadan oxuculara təqdim edir. Bu dəfə də əslən Naxçıvandan olan sahibkar Məmməd Qurbanov başına gətirlənləri bir daha saytda yerləşdirilməsini xahiş edib. Amma nədənsə qarşı tərəf bu iddialara aydınlıq gətirmək istəmir. Əgər belə bir istək olsa onların da cavablarını saytda yerləşdirməyə hazırıq:

MİLLİ ŞURANIN SƏDRİ HÖRMƏTLİ C. HƏSƏNLİ CƏNABLARINA

AZƏRBAYCAN SAATI-nın APARICISI HÖRMƏTLİ QƏNİMƏT MÜƏLLİMƏ

“CANAVAR SÜRÜSÜNÜN ORTASINDA OTLAYAN QUZU”

“ Xeyirxah, alicənab, nəcib insanlar öz alicənablıqları, xeyirxah, nəcib əməlləri ilə onları cəmiyyətə əmanət qoyub gedən kişinin məzarını cəmiyyətin səcdəgahına, qibləgahına, and yerinə çevirməklə əbədiləşdirərlər.“ 

“Əzazil məxluqlar, məmurlar, məlunlar öz əzazillikləri ilə onları cəmiyyətə bəla qoyub gedən kişinin məzarını cəmiyyətin lənətlər, tənqidlər, təhqirlər, nifrətlər obyektinə çevirməklə əbədiləşdirərlər.”

“Əlahiddə acgöz məxluqların gözünü yalnız torpaq doyurar! O da Allahın əlindədir”. Allah acgöz məxluqların gözünü doyursun!

Hörmətli Cəmil müəllim, güman edirəm ki, sizə MODERATOR. AZ vasitəsi ilə 08/11/2014 tarixdə ünvanladığım məktubuma münasibət bildirməyə zamanınız olmamışdır.

Sizdən xahiş edirəm, öz adınızdan, MİLLİ ŞURANIN adından münasibət bildirəsiniz, siyasi qiymət verəsiniz.

Hörmətli Qənimət müəllim, sizdən xahiş edirəm həmin məktuba nəzər salasınız, "Azərbaycan caatı” proqramında lazımi şəkildə münasibətinizi bildirəsiniz, siyasi qiymət verəsiniz. Haradasa H. Əliyevin bir kəlamını oxumuşam.

“Dövlət iki şeydən sarsılar. Cinayətkarlar cəzasız qalanda, günahsıza cəza veriləndə. "Məmləkətdə cinayətkarlara cənab deyirlər, günahsızlara məhkum. Necə dəyərləndirirsiniz? Dövlət sarsılıbmı?

1.Hər ikinizdən xahiş edirəm, Azərbaycan Respublikası Prezidentinə müraciət edəsiniz, bizim çörəyimizi düşmənlərimizin əlindən alıb özümüzə qaytarsın, düşmənlərimiz tərəfindən qəsb edilmiş, qəsd edilmiş külli miqdarda maddi zərərlərin ödənilməsini təmin etdirsin, həyatımızın, çörəyimizin qarşısından uzaq tutsun, təhlükəsizliyimizi təmin etsin. Bunu etmək imkanı yoxdursa, bizə məcburi qaçqın statusu verilməsini təmin etsin, bunu da etmək imkanı yoxdursa, sadəcə bizə yardımçı olsun Azərbaycanı nəsilliklə tərk edə bilək ki, öz çörəyimizi, həyatımızı insan hüquqları olan dövlətlərdə axtaraq.

2. Xarici səfirliklərə müraciət edəsiniz. İstismar edilmiş, qaçqın sahibkarın maddi yardıma çox böyük ehtiyacı var. İmkanları varsa ona maddi yardım etsinlər.

Mənəvi, psixoloji, fiziki sarsıntılarımıza görə cəzalanmaları isə Allahın qismətindən asılıdır. Hörmətli Cəmil müəllim, hörmətli Qənimət müəllim, bizim düşmənlərimiz hədsiz dərəcədə güclü və namərddirlər. Mən isə onların qarşısında fiziki cəhətdən aciz, gücsüz, və yalqızam.

Sizdən xahiş edirəm, məni mənəvi cəhətdən yalqız qoymayasınız, cəmiyyətin nifrətini düşmənlərimizin başı üstündən əskik etməyəsiniz! Moderator.az daxil olmaqla bütün informasiya vasitələrindən, xüsusilə  AZADLIQ-dan xahiş edirəm, facebook səhifəmdə yazıldığı şəkildə çatdırılmasına yardımçı olsunlar.

HÖRMƏTLƏ: NƏSİLLİKLƏ MƏCBURİ NAXÇIVAN QAÇQINI MƏMMƏD QURBANOV.