Martın 3-də “Sovetski” sakinləri aksiyaya cəhd etsələr də, əvvəlki aksiyadan fərqli olaraq, bu dəfə aksiya heç də polislər tərəfindən sakitçiliklə qarşılanmadı. Aksiyaya polis müdaxiləsi oldu. Sakinlərlə qarşıdurma yarandı, bir neçə sakin saxlanıldı, hətta jurnalistlərə belə hücum edildi və texniki avadanlıqları ziyan gördü. Halbuki, keçən aksiyadan sonra baş nazirin müavini Abid Şərifov və Bakının Meri sakinlərlə görüşərkən jurnalistlərin zaldan çıxarılması belə sakinlərin etirazı ilə qarşılanmışdı. Bu dəfə etiraza çıxanların sayı da kəskin şəkildə fərqlənirdi. Baş nazirin müavini Abid Şərifov bu gün Yasamal Rayon İcra Hakimiyyətində Bakının “Sovetski” məhəlləsinin sakinlərinin yaratdığı Təşkilat Komitəsinin üzvləri ilə görüşün nəticəsi də açıqlandı. Kompensasiyaların ödənməsində heç bir yenilik baş vermədi. Hər ailə başına iki aylıq 1000 manat kirayə haqqı, ev əşyalarının daşınması üçün isə 400 manat, bir də... dir də ki, 1 kv.m üçün 1500 manat təklifi qüvvədə qalır. Kimi bu qiymət qane etmirsə, onlarla işimiz yoxdur, evlərində yaşasınlar. Bizim son qərarımız budur ”. Necədə gəlişi xoş sözlər. “Adamı qəhər boğur. Azərbaycanda necə millətinin, xalqının, vətəndaşlarının qədrini bilən, qanunlara hörmət edən məmurlarımız varmış Allah! ” - Necə yəni kimi bu qiymət qane etmirsə, onlarla işimiz yoxdur, evlərində yaşasınlar? Bu necə ola bilər baş nazirin müavini bunun necə olacağını bəlkə açıqlıyardı. Bu müddət ərzində bəs dəyişən nə oldu? Sakinlər nə qazandı, nə itirdi? Bəs bu danışıqlar nəyə lazım idi? “ Qurban olum o, qana ki, üzərindən bir gün keçə ”. Məhz elə bir neçə gün hakimiyyətə bəs edirdi...Narazıların çoxluğu və etirazçıların kütləviliyi ilk öncə hakimiyyəti ehtiyatlı davranmağa vadar etsə də, hökumət üçün bəzi incələmələr aparmağa vaxt lazım idi. Kim? harada? Necə? Kimin nəsi?.... Və sairə və ilaxır. Yəni orada aktivlik edə biləcək, səsin çıxaracaq sakinlərin siyahısı, zəif tərəfinin araşdırılması və hakimiyyətin ənənəvi taktikasının- parçala hökm sür, şantaj, şirinikləndirmə, qorxu siyasətinin işə salınması. Hökumətin deməsindən belə çıxır ki, istəyən pulunu alıb köçəcək, istəməyən orada yaşayacaq. Bu necə olur? Köçənlər üçün küllü miqdarda pul xərclənəcək, qalanlar isə orada yaşayacaq? Orada yaşayış olacaqsa belə çıxır ki, tikinti də aparılmayacaq? Bəs o zaman o qədər pulu xərcləmək nəyə lazımdır. Heç hökumət nümayəndələrinin açıqlamalarında məntiq varmı? Deməli köçənlər köçəcək, köçənlərin evi sökülməyə başlayacaq, ağır texnikalar işləyəcək, qalanların evini silkələyib başına uçuracaq. Üstəgəl onsuz da, anti-sanitariya, ağır şəraitdə yaşıyan “sovetski” sakinlərinin işığı, qazı, suyu kəsiləcək və .... “Sovetski” sakinləri “gözü çıxan qardaşlarından nümunə götürməlidirlər ”, yəni bundan əvvəlki söküntülər zamanı baş verənlərdən nəticə çıxararaq bir nəfər kimi, sona qədər hüquqları uğrunda mübarizə aparmalıdırlar. Əks təqdirdə hakimiyyət yenə də öz bildiyini edəcək. Hadisələrin gələcəkdə necə inkişaf edəcəyi sakinlərdən asılıdır. Amma bircə şeyi deyə bilərəm ki, “ çomağın iki başı olur ”. Vay o günə ki, çomağın digər başı işə düşə . O zaman “ xalq sevər” məmurların gününü görəndə həqiqi mənada məni qəhər boğacaq.