Bizi diversant olduğuna inandır, inandır ki...
Bugünlərdə Azərbaycanın Müdafiə Nazirliyinin verdiyi məlumat əsnasında Tovuzun Əlibəyli kəndi istiqamətində təmas xəttini keçən və yaşlı bir kənd sakini tərəfindən “zərərsizləşdirilən” erməninin düşmənin diversiya qrupunun üzvü olduğu bəlli olub. Məlum olub ki, qoca erməni saç-saqqalının ağardığı, bir ayağının bu, digər ayağının o dünyada olduğu bir vaxtda Azərbaycan ərazisində ciddi təxribatlar həyata keçirməyə cəhd edib. Telekanalların yaydığı məlumata görə kənd sakinləri, rəsmi dairələrin verdiyi məlumata görə isə hərbçilər tərəfindən tutulduğu iddia edilən qoca, dindirilmək üçün əlaqədar qurumlara təhvil verilib. Və heç şübhəsiz ki, artıq bu dəqiqələrdə “təhlükəli diversantın” qarşısına qoyulan məqsəd, onun bugünə qədər daha hansı əməliyyatlarda iştirak etdiyi, neçə yaşayış məskənində təkbaşına viran qoyduğu və s. ilə bağlı bir çox məqam dəqiqləşdirilməkdədir. Və yəqin ki, hələlik istintaq sirri olduğu üçün susan aidiyyati qurumlar bir neçə gündən sonra bu barədə Azərbaycan ictimiyyətini səxavətlə məlumatlandıracaqdır. Ancaq...
De, kimsən?
Məlum olduğu kimi, təmas xəttini keçən yaşlı erməninin diversant olması xəbəri elan ediləndə, bu məlumat nəinki çoxlarına inandırıcı gəlmədi, hətta bəzi insanlar bu xəbəri acı təbəssüm və yumorla qarşıladı. Çünki Müdafiə Nazirliyinin diversant donu biçdiyi qocanın üzündən Əzrailin ona kəfən biçdiyi aydın görünürdü. Ona tələyə düşən vəhşi ayıya baxırmış kimi baxan onlarla insanın əhatəsinə düşən, çöhrəsinə zillənən maraq və nifrət dolu baxışlardan şok yaşayan qoca yəqin ki, bütün həyatı boyu bu qədər əzablı və qorxunc bir mənzərə ilə üzləşməmişdi. Bəli, “qorxunc diversant” üzləşdiyi mənzərədən özünü itirmiş və qorxmuşdu. Bu qorxu və donuqluğu onun vahimə yağan baxışlarından oxumaq mümkün idi. Və heç şübhəsiz, bu, hərbin odundan-alovundan çıxan, ölümlər-itimlər görən “qocaman diversanta” yaraşan hərəkət deyildi.
“Diversant ovçuları”nın susduğu qırmızı nöqtələr
Maraqlıdır ki, yaşlı erməninin ələ keçməsindən dərhal sonra onun düşmən ordusunun diversiya qrupunun üzvü olduğunu bildirən nazirlik hələ ki, bir neçə vacib məqama aydınlıq gətirmir. Nazirlik hələ də aydınlıq gətirmir ki, düşmən diversantı günün-günorta vaxtı təmas xəttini Azərbaycan hərbçilərinə görünmədən neçə keçib? Niyə hadisədən dərhal sonra həmin ərazinin qorunmasına cavabdeh olan hərbi hissə komandanlığının cəzalandırılması məsələsi gündəmə gətirilmədi? Dünyanın harasında görünüb ki, diversiya qrupuna həyat gücünü tamamilə itirmiş, danışmağa və yeriməyə taqəti olmayan biri seçilsin? Bu necə diversantdır ki, yerinə yetirməli olduğu tapşırığın icrasına heç bir silah olmadan, öz ağ saçlarına və taqətdən düşən dizinə arxalanaraq gəlib? Bu necə diversantdır ki, onu eynən özü kimi yaşlı, mülki bir vətəndaş “zərərsizləşdirib”? Bu necə diversantdır ki, hərbi əməliyyata mülki formada gəlib və tutularkən nəinki heç bir müqavimət göstərməyib, hətta qaçmağa belə cəhd etməyib? Bu necə ordudur ki, onun qorumalı olduğu ərazini, tutmalı olduğu “diversantları” mülki şəxslər qoruyur və tutur?
Bu və daha bu kimi onlarla sual var ki, nazirlik bu suallara cavab vermir və ya verə bilmir. Halbuki, bu, hökmən cavablandırılmalı, gündəmə gətirimnəli və əsaslandırılmalı məslələrdir.
Diversant, yoxsa özünə gor yeri arayan qoca?
Bəli, kimin nə deməyindən asılı olmayaraq, diversant kimi qələmə verilən erməninin kiməsə zərər vermək iqtidarında olmayan yaşlı bir insan olduğu göz önündədir. Onu diversant deyil, özünə gor yeri axtaran qoca kimi xarakterizə etmək daha doğru, daha ədalətlidir. Bəlkə də ələ keçən “diversant” normal fiziki göstəricilərə malik olsaydı, yaşına rəğmən ona bu yarlığı vurmaq, onu təxribatçı kimi ictimaiyyətə təqdim etmək olardı. Lakin bu gün bizim diversant düzətmək istədiyimiz material hərbi təxribatçı üçün tələb olunan göstəricilərin heç birinə cavab vermir. Bu isə o deməkdir ki, növbəti dəfə ictimaiyyəti diversant nağılına inandırmaq üçün daha münasib xammaldan istifadə etmək lazım gələcək.
Qoca, əlinə silah al!
Göründüyü kimi, hadisə və proseslərin adi təhlili belə baş verənlərin biabırçı şou, ucuz reklam olduğunu göstərir. Çox güman ki, Müdafiə Nazirliyi qoca bir ermənini qorxunc canavar qismində ictimaiyyətə sırımaqla Azərbaycan ordusunun uğurlarına daha bir xal əlavə etmək istəyib. Yəqin ki, ali komandanlıq düşünüb ki, illərdir ki, uğura, qələbə sevincinə həsrət qalan, məğlub psixologiyası ilə yaşayan insanlar hətta qəbirdən xortlayan ölünü belə diversant kateqoriyasına həvəslə qəbul edəcəklər. Amma əfsus...
...Qoca, əlinə silah al və bizi həqiqətən də qorxunc diversant, təhlükəli hərbçi olduğuna inandır. İnandır ki, sənin üstündə çəkilən bu qədər zəhmət, bu qədər əziyyət hədər getməsin. Inandır ki, ixtiyar, huşsuz bir qocanı deyil, azman bir diversantı tutmağımızla sevinə bilək. İnandır ki, səni diversant kimi təqdim etdiyimizə görə bütün dünya bizə gülməsin. İnandır ki, Azərbaycan ordusu adına yazılan bu rüsvayçılığı aradan qaldıra bilək. Və nəhayət inandır ki, ən azından ixtiyar vaxtında öz ölkəndə qəhrəman imici qazana biləsən.
Seymur Əliyev
e-mail: [email protected]
