Moderator.az xəbər verir ki, bunu hakim partiyadan olan millət vəkili Aydın Mirzəzadə özünün Facebook səhifəsində paylaşdığı son statusunda qeyd edib.

 Millət vəkili statusunda xatırladıb ki, ötən həftənin axırı, 20-21 dekabr tarixlərində Mingəçevirdə seçildiyi dairənin seçiciləri ilə görüşlər keçirib.

 Onun qeyd etdiyinə görə, görüş barədə əvvəldən Facebook səhifəsində məlumat yerləşdirib, həmçinin, vaxtaşırı həm görüşün gedişi haqqında qısa məlumatlar yazıb, həm də öz telefonu ilə çəkdirdiyi şəkillərdən bir qismini bura yerləşdirib.

 “Məlumatların verilməsi barədə heç bir sayta və televiziyaya xahiş etmədim. Məqsədim ancaq buradakı maraqlanan dostlarımı fəaliyyətim haqqında məlumatlandırmaq idi”, - deyə, qeyd edən millət vəkilinin yazdığına görə,buna baxmayaraq, regional El TV və Mingəçevir TV reportajlar, həmçinin, bir neçə sayt görüşlər haqqında məlumat veriblər:

 “Mənə qəribə gələn bəzi saytların mənim keçirdiyim görüşlərin reklam olduğunu iddia etmələri və fəaliyyətimi bildirdiyimə görə mənə irad bildirmələri oldu.

Elə isə cənab tənqidçilərdən soruşmaq istəyirəm, deputatlar öz fəaliyyətləri barədə məlumat verməlidirlərmi?

 Əgər millətin seçdiyi vəkillər onlarla görüşləri və seçicilərin xahişlərinə dair etdikləri bildirməyəcəklərsə, tənqidçilər seçicilərlə işimizi necə təsəvvür edirlər?

 Bu dəfə üç tələbənin təhsil haqqının yarısını ödədim, bir şagirdə kompüter bağışladım, bu faktları (birinci dəfə deyil) gizlətməli idim, yoxsa növbəti imkansıza bir ümid, digər imkanlıya isə bir çağırış verməli idim. Hər halda hesab edirəm ki, bizlər “sən nə etmisən?” sualına ancaq seçki öncəsi cavab necə verməli deyilik.

 Bəlkə seçicilərimlə görüşlər zirzəmilərdə, gizlin şəkildə, parollarla keçirilməli, deputatın dairəsinə gəlib-getməsi gizlin saxlanılmalıdır?

 Opponentlərimin bildirdiyi kimi, mənim reklama ehtiyacım yoxdur. Mən necəyəmsə, eləyəm. Öz mövqeyimlə, imkanımla və istəyimlə. Seçicilərlə də görüşüm reklam xatirinə deyil, ürəkdən onlara kömək etmək istəyimdən irəli gəlir.

 Doğulduğum və icra başçısının müavini vəzifəsinədək yüksəldiyim Mingəçevirin hər məsələsi mənə yaxındır və həmişə onlarla birlikdə olmaqdan, onların hansısa bir probleminə kömək etməkdən qürur duyuram. Bunu həmişə etmişəm, həmişə də edəcəyəm.

 Göründüyü kimi, opponentlərimin arqumentləri çox zəifdir. Onların təklifləri ya deputatların fəaliyyəti barədə mətbuatda məlumat verilməsinə yasaq qoyulmasına, ya da seçicilərimizdə bizim haqqımızda yanlış təsəvvür yaradılmasına xidmət edir.

 İsti otaqda oturub mücərrəd fikirlər bildirmək çox asandır, çox istərdim ki, onlar seçicilərimin problemləri həll ediləndə onların sevinclərini də görə biləydilər”.