Gəncə Şəhər İcra Hakimiyyətinin sözçüsü Kənan Məmmədov Moderator.az saytına açıqlamasında mərhum prezident Heydər Əliyevlə bağlı fikirlərini dilə gətirib. K.Məmmədov müraciətində H.Əliyevin Azərbaycan və bütün türk dünyası üçün önəminbdən bəhs edib: “Mən çox şadam ki Ulu Öndər Heydər Əliyevin prezident olduğu ölkənin vətəndaşı olmuşam. Heydər Əliyev elə bir şəxsiyyətdir ki, O, hər bir sahədə çox dərin məlumata malik olub. Məsələn, səhiyyə işçiləri qarşısında çıxış edərkən bu sahəyə aid, hərbçilər qarşısında danışarkən bu sahəyə aid, təhsil,idman ,iqtisadi və s. sahələrə aid elə mövzulardan danışırdı ki, elə izahlar verirdi ki, mütəxəssislər belə yeni nəsə öyrənirdilər.
Azərbaycanın son otuz ildən artıq bir dövrünü əhatə edən tarixi taleyi Heydər Əliyevin adı ilə qırılmaz tellərlə bağlıdır. Bu illər ərzində xalqın ictimai-siyasi, iqtisadi və mədəni həyatının bütün sahələrində dirçəliş məhz onun adı ilə əlaqədardır.
Heydər Əliyev rəhbərlik etdiyi dövr ərzində daim tərəqqisi üçün çalışdığı, zəngin mədəniyyəti, böyük tarixi keçmişi ilə həmişə qürur duyduğu və gələcək nəsillərinin taleyi üçün düşündüyü doğma yurdu Azərbaycanı bir dövlət kimi zamanın ağır və sərt sınaqlarından çıxarmışdır.
Heydər Əliyevin hər bir addımı dünyanın istənilən insanı üçün nümunədir. Əgər belə bir mövzu qoyulsa idi “Heydər Əliyevin möhtəşəm qayıdışları” bu haqda çox şey demək olardı.
1993-cü ildə, dövlət idarəçiliyindəki kobud səhvlərin məntiqi nəticəsi olaraq ölkənin vətəndaş müharibəsi təhlükəsi ilə üz-üzə qaldığı, cəbhədə torpaqlarımızın itirildiyi, bir sözlə, Azərbaycanın dağılmaq və parçalanmaq təhlükəsi ilə üzləşdiyi vaxtda dahi şəxsiyyət Heydər Əliyevə üz tutulması təsadüfi deyildi. Çünki ölkədəki hərc-mərcliyin, siyasi çəkişmələrin, Gəncədə başlanmış qardaş qırğınının, hərbi xəyanətin qarşısını yalnız o böyük insan ala bilərdi. Məğlubiyyətlə barışan cəbhəçilər vəziyyətdən çıxış yolunu xalqın istəyi ilə razılaşaraq o zaman Naxçıvanda olan Heydər Əliyevin Bakıya dəvət edilməsində görürdülər. Məlum olduğu kimi Heydər Əliyev Bakıya dəvət olunur və İyunun 9-da Bakıya gəlişi Azərbaycanın taleyindəki nigaranlığa son qoyur. Xalq Heydər Əliyevin bu qayıdışını ümid və sevinclə qarşılamışdır, Xalq Heydər-Heydər Xalq demişdir. Bu qayıdışı bütün dünya izləyir. Bu möhtəşəm qayıdış idi.
Yadınızdadırsa doxsanıncı illərin sonlarında ölkədə zəlzələ olacağı xəbəri bütün camaatı təşvişə salmışdı. Yaxşı xatırlayıram ki, binadan pilləkənləri elə düşürdülər ki insanlar, bir birləri üçün daha da təşviş və qorxu yaradırdılar. Belə bir zamanda ölkənin lideri öz otağına qayıdır və xalqı başsız buraxmır. Bu da möhtəşəm qayıdış idi.
Heydər Əliyev kursantlar qarşısında çıxış edərkən bir neçə dəfə ölüm təhlükəsi ilə üzləşir, tribunanı tərk edir və yenidən qayıdır, qayıdır ki gələcəyin zabitləri olacaq gənclər görsünlər ki, mübarizə sonadək olur, anlasınlar ki meydanda sonacan heç nəyə baxmayaraq qalmaq və mübarizə etmək lazımdır. Bu da möhtəşəm qayıdış idi. Yəni bir sözlə demək olar ki, bu şəxsiyyət ömrünün bütün vaxtlarını xalqına həsr etmişdir.
Bu heç də təsadüfi deyil, 1998-ci il oktyabrın 11-də keçirilən seçkilərdə səslərin 76,1 faizini toplayaraq, yenidən Azərbaycan Respublikasının Prezidenti seçilmişdir. 2003-cü il oktyabrın 15-də keçirilən prezident seçkilərində namizədliyinin irəli sürülməsinə razılıq vermiş Heydər Əliyev səhhəti ilə əlaqədar seçkilərdə iştirak etməkdən imtina etmişdir və o gündən bu günə kimi xalqın demokratik səs verməsi yolu ilə 3 dəfə prezident seçilən İlham Əliyev də Ulu Öndər idayalarına sadiq siyasət aparıb və aparmaqda davam edir.
Heydər Əliyev bütün dünya siyasətçilərinin öncüllərindən idi. O, bir sıra beynəlxalq mükafatlara, müxtəlif ölkələrin universitetlərinin fəxri doktoru adına və digər yüksək nüfuzlu fəxri adlara layiq görülmüşdür. Dörd dəfə Lenin ordeni, Qırmızı Ulduz ordeni, iki dəfə Sosialist Əməyi Qəhrəmanı adını almış, bir çox xarici dövlətlərin orden və medalları ilə təltif olunmuşdur.
O, tarix boyu çox nadir insanlara qismət olan böyük siyasi və dövlət xadimi, xalqın şəksiz lideri olaraq hələ sağlığında canlı əfsanəyə çevrilmiş, dünya azərbaycanlılarının bu ümummilli liderinin heyranlıq doğuracaq dərəcədə coşğun siyasi fəaliyyəti istər ölkə, istərsə də dünya mətbuatında geniş işıqlandırılmış və bu gün də onun haqqında bütün ölkələrin nümayəndələri ürək dolusu danışır”.
Seymur Əliyev