Daha bir prezident seçkisinə “quş” qoyduq. Qəribə də səslənsə ümid edək ki, bu seçkilərin nəticələri sinəsi dağlı millətimiz və yaralı dövlətçiliyimiz üçün uğurlu olacaq, bütün acların qarnı, harınların gözü doyacaq, yalquzaq kimi ağız-ağıza yatışan məmurlar bir-birinin murdar ətini yeməkdən vaz keçəcəklər, necə deyərlər, qurdla quzu bir çəmənliyi paylaşmağa razı olacaq. Hərgah bu yazdıqlarıma özüm də inanmasam oxucularımı nikbin olmağa, dünyanı veclərinə almamağa səsləyirəm. Əks halda ilin-günün bu vaxtında çeşidli dərd tapa bilərlər, dərman da baha. Odur ki, heç nəyə fikir vermədən pul tapanda balacaları karuselə (bir müddət öncə paytaxtda dünyanın ən hündür karuselinin inşa edildiyindən bərk sevinmişdim ki, artıq “karusel inqilabı”nda da dünyanın gözünün bərəlməsinə səbəb olduq...) mindirməyi unutmasınlar və hərdən bir artıq marketlərin piştaxtalarını dolduran süni balıq gölməçələrinin tullantılarla bəslənən təpəgöz balıqlarından dadsınlar. Çünki hansı şəraitdə bəslənməsindən asılı olmayaraq balıq əti həm gözə işıq verir, həm dizə təpər. Düşünürəm ki, gələcəkdə bunların hər ikisi millətimizə lazım olacaq...

Balıqdan söz düşmüşkən, son illər prezident seçkilərinin vazkeçilməz ünsürlərindən (bu ünsür prezident İlham Əliyevin vaxtilə müxalifətə xitabən dediyi “ünsürlər”dən xeyli fərqlidir)olan Müasir Müsavat Partiyasının sədri Hafiz Hacıyev də 9 oktyabr günü yaddaşsızlığıyla yadda qaldı. Seçki məntəqəsinə gələn “balıq” adam şəxsiyyət vəsiqəsini gətirməyi unutmuşdu və məcbur olub onu gedib evdən gətirməli oldu. Olaydan sonra bir şeyə təəccübləndim , bu adam necə balıq naziri olub ki, bu qədər yaddaşsızlıqdan əziyyət çəkir? Düşündüm ki,  daha onu “balıq Hafız” adlandırmaq doğru deyil, elə “keybala” desəydilər, yerinə düşərdi.

Bir dostum da deyir ki, yox, hələ tələsmək lazım deyil, ola bilsin onun balıq ətinə qarşı allergiyası olduğundan balıq ətindən qaçır, buna görə da huşsuzluqdan əziyyət çəkir, ancaq balığın digər canlılardan fərqlənən bir unikal keyfiyyəti də var ki, onu Tanrı sanki Hafiz Hacıyev üçün göndərib. Dostum balığın sürüşkənliyini Hafiz Hacıyevin siyasi portreti ilə müqayisə edərək bildirir ki, Azərbaycan siyasətində onun qədər sürüşkən reputasiyalı başqa birini tapmaq kimə müyəssər olsa tərəddüd etmədən ona balıq qonaqlığı verəcək.

Mən bu məqamda millətimizin bir unikal xüsusiyyətindən də bəhs etmək istəyirəm. Bizim qədər unutqan xalq da tapılmaz yəqin ki. Ona görə də ümid etmək olar ki, tezliklə 9 oktyabr seçkilərinin möhtəşəm nəticələri unudulmağa başlayacaq və günlərin bir günü Hafiz Hacıyev mətbuat konfransı keçirərək rejimə qarşı əl-ələ verib mübarizə aparmaq üçün başda Pənah Hüseyn olmaqla keçmiş cəbhədaşlarının şəninə təriflər yağdıracaq, hətta paytaxt restoranlarının birində müxalifət liderlərinə balıq qonaqlığı vermək istəyəcək, bununla da növbəti prezident seçkilərinədək müxalif mətbuatın yadından çıxmağa çalışacaq. Amma məncə qonaqlıq məsələsi baş tutan deyil. Çünki nə müxalifətçilər onunla bir masa ətrafında oturmaq istəyəcək, nə onun özü. Niyəsini də bilmək istəyirsiniz yəqin. Moderator.az-ın müxbiri iki-üç gün öncə and aman edirdi ki, Hafiz Hacıyevdən açıqlama almaq üçün ona zəng edəndə partiya sədri sözarası içdiyi çayı da evdən termosda gətizdirdiyini deyib ki, birdən onun özünün kimsə zəhərləyər. Qorxu köpəyoğlu şeymiş. Ona görə də mən onu anlamağa çalışardım. Baxmayaraq ki,  bir müddət öncə onun Əbülfəz Elçibəyin zəhərləndiyi iddialarının səbəblərini müxalif düşərgədə kimsə anlamaq istəmirdi...

Zülfüqar Hüseynzadə