Elçibəy hakimiyyəti dövründə təhsil naziri postunu tutmuş Firudin Cəlilov dünən mətbuata verdiyi açıqlamada eks-prezidentin silahdaşları arasında birmənalı qarşılanmayan fikirlər işlədib.

Firudin Cəlilov Elçibəylə son görüşündən danışarkən bildirib ki, eks prezident onunla söhbətində vəzifəyə təyin etdiyi bəzi şəxslərə görə peşmançılıq çəkdiyini söyləyib:

“Əsas peşmançılığı vəzifəyə gətirdiyi insanlarla bağlı idi. Onların səhlənkarlığı və bacarıqsızlığı Əbülfəz Elçibəyin hakimiyyətdən getməsinə və taleyinin bu cür olmasına səbəb oldu”.

Maraqlıdır, görəsən Elçibəyin narazı olduğu kadrlar kimlər imiş və bu haqda onun komandasında təmsil olunan şəxlər nə düşünür? Moderator.az Elçibəy hakimiyyəti dövründə yüksək vəzifə tutmuş şəxslərdən bəzilərinin fikirlərini öyrənməyə çalışıb.

O zaman baş nazir postunu tutan Pənah Hüseyn əməkdaşımızla söhbətində məsələyə çox qısa münasibət bildirərək, deyilənləri Firudin Cəlilovun mülahizələri adlandırdı və bu fikirlərə hörmətlə yanaşdığını bildirməklə kifayətləndi: “Mən bununla bağlı əlavə nəsə söyləməyə ehtiyac duymuram.”

Sabiq daxili işlər naziri İsgəndər Həmidov isə əməkdaşımızla söhbətində bunları bildirdi: “Həmin komandada kimin bacarıqsız, kiminsə daha səriştəli olması haqda uzun-uzadı danışmaq istəmirəm. Mən yalnız özümlə bağlı olmuş bir məqamı xatırlatmaqla mövzuya nöqtə qoyacam. Mən tutduğum daxili işlər naziri postundan istefa verəndən sonra Əbülfəz Elçibəy kəlbəcərlilərlə keçirdiyi görüşdə belə bir fikir işlətmişdi ki, “mənim komandamın ən bacarıqlı üzvlərindən biri İsgəndər Həmidov idi və peşəkarlığından razıydım, amma bizi atıb getdi. Digər tərəfdən, mənim keçmiş komanda yoldsaşlarım haqda nəsə demək doğru olmaz, buna başqaları qiymət verə bilər. Odur ki, mən əlavə hər hansı şərhə ehtiyac duymuram”.

Sabiq müdafiə naziri Rəhim Qazıyev isə özünü Elçibəy komandasının üzvü hesab etməsə də səsləndirilən ittihamla qismən razılaşdığını dedi: “Mən müdafiə naziri vəzifəsinə Elçibəyin hakimiyyətə gəlişindən bir neçə ay öncə təyin olunmuşam. Etiraf olunmalıdır ki, bəzi kadrlar doğrudan da yerində deyildi, müəyyən təcrübəsizlik var idi və bunu həmin dövr üçün təbii saymaq da olardı. Məsələ ondadır ki, heç Əbülfəz Elçibəyin özünün də dövlət idarəçiliyində təcrübəsi yox idi. Bununla belə mən siyasi iflasın yalnız komandanın bacarıqsız üzvlərdən ibarət olmasıyla bağlı səsləndirilən ittihamları düzgün hesab etmirəm”.

Elçibəy hakimiyyətində Milli Təhlükəsizlik Nazirinin müavini olmuş Sülhəddin Əkbər isə 20 ili bundan öncə yaşananların indiki məqamda təftiş olunmasını düzgün hesab etmədiyini söylədi: “Hazırda məni indi baş verən proseslər maraqlandırır, 20 il bundan öncə baş verənlərə şərh verməyi isə doğru hesab etmirəm”.