Son illər bütövlükdə cəmiyyətimizdə olduğu kimi, təhsil ocaqlarında da baş verən əndrəbadi, anormal olayların sayı artmaqdadır. Ötən illər Bakı və rayon məktəblərində şagirdlər, hətta direktor-müəllim, müəllim-şagird, nə bilim, müəllim-süpürgəçi arasında zorlama, zinakarlıq kimi biabırçı, iyrənc olaylar yaşanmışdı. Bu günlərdə də 8-ci sinif şagirdi Elinanın faciəli intihar halını yaşadıq...

Bütün böhranların ilkin səbəbi kimi, təhsil sahəsindəki mənfi proses və hadisələrin də kökündə dayanan dünyada və ölkədə şiddətlənməkdə olan ruhi-mənəvi, əqidə böhranıdır. Planetimiz hazırda şiddətli ruhi-mənəvi böhran, tənəzzül yaşayır və həmin böhranın ən kəskin ağrılı nahiyələrindən biri də Azərbaycandır.  Minilliklər boyu ərazisini işğal edən hər bir imperiyadan, yağı dövlətdən genefonduna sarsıdıcı zərbələr alan və XX yüzilliyin əvvəli və ortalarında görünməmiş mənəvi, ideoloji, fiziki soyqırımlara, repressiyalara məruz qalmış Vətənimiz 1988-1994-cü illərdə yurd itkisi və qaçqın-köçkünlük kimi zərbələrlə də üzləşdi. Son 25 illik “atəşkəs” dediyimiz dövrdə isə bünövrəsi Çar Rusiyası və xüsusən sovet dövrünün son 2 onilliyində qoyulmuş rüşvətxorluq və korrupsiya, eləcə də məmur özbaşınalığı bəlalarıyla  üz-üzə qaldı. 2011-ci ildən bəri Prezident İlham Əliyevin öz çıxışlarında dəfələrlə müharibə elan etdiyi bu şəbəkələr hələ də çökdürülməyib və Azərbaycanda həyatın bütün sahələrində baş verən proseslərə, o cümlədən hər bir vətəndaşın, eləcə də uşaqların, yeniyetmə, gənc oğlan və qızların əqidə və düşüncə tərzinə, gün-güzəranına, taleyinə həlledici təsir göstərməkdədir... Gündən-günə oğurluq, saxtakarlıq, dələduzluq, hətta qardaşın qardaşa, bacının qardaşa və s. kələk  gəlməsi hallarının çoxalması məhz bu korrupsiya  şəbəkələrinin fəaliyyətinin nəticəsidir. 

Ümummilli əqidənin pozulmasının ikinci və bəlkə də daha böyük səbəbi planetin, demək olar ki, əksər hissəsini qaplayan “demokratiya”, “qloballaşma”, “inteqrasiya” və s. adlanan proseslərin insanlığı Allaha- Yaradana bağlılıqdan, təbiilikdən çıxarıb adamları dini,  cinsi məlum olmayan anormal, mənəviyyatsız, əqidəsiz, iyrənc bir həyat tərzinə sürükləyən ən mənfi təzahürləridir... 

Həyatının cəmi 14  ilini bu dünyanın Azərbaycan deyilən parçasında yaşamış Elinanın faciəli taleyi də bütün deyilənlərin təsir və təzyiqi altında  formalaşıb. Körpəlik və uşaqlığı İslama, bütün  səmavi dinlərin təlqin etdiyi bəşəri dəyərlərə hərbi, siyasi,  iqtisadi-sosial, ideoloji, mənəvi-psixoloji hücumların daha da şiddətlənməyə başladığı illərdə keçmiş bu qızcığaz bir yeniyetmə, bir məktəbli kimi görün, neçə-neçə insanların və insan qruplarının, partiya, cəmiyyət, nə bilim holdinq, telekanal, sayt rəhbərlərinin əqidəsi, həyat tərzinin birbaşa və dolayısıyla təsiri, eləcə də internet-kanal, sosial şəbəkələrdəki qrupların baxışları, oralardakı video-görüntü və yazılarla, paylaşımlarla, eləcə də saxta və haram qidalarla ünsiyyətdə yetişib. İndiki bütün yeniyetmə  və gənclər kimi, Elinanın da düşüncə və həyat tərzinə onun sovet dövründə və ondan əvvəl yaşamış ata-ana, baba-nənələrinin genetik olaraq transformasiya olunan əqidələri, onun  ogey atasının əqidəsi, onun qohum-qonşularının, bağça tərbiyəçiləri və yoldaşlarının, ibtidai  və yuxarı məktəb müəllimləri, sinif rəhbəri və sinif, məktəb yoldaşlarının, təhsil aldığı məktəblərin direktor, müavin və psixoloqlarının və s. əqidəsi təsir göstərib. Onun valideynləri övladlarını Allahın, Peyğəmbərlərin buyruqlarına uyğun, milli dəyərlərimiz, adət-ənənələrimiz ruhunda tərbiyə ediblərmi? Onlar özləri, eləcə də sözügedən məktəb direktorları, müavinlər psixoloqlar, müəllimlər, Elinanın sinif, məktəb yoldaşları bu ruhda tərbiyə alıblarmı? Tərbiyəsində bilavasitə iştirak edən anası, nənəsi, ögey də olsa, atası bu qız uşağına  internet və sosial şəbəkələrdə nəyin faydalı, nəyin zərərli olduğunu, bunlara həddindən çox bağlanmanın təhlükəliliyini anladıblarmı? Ona Azərbaycan qızına layiq geyinib-geçinmənin, bəzənmənin vacib olduğunu təlqin ediblərmi? Elinananı təzyiq və təhqirlərə məruz qoyan sinif, məktəb yoldaşlarına başqasına qarşı yersiz böhtan atmanın, təhqiramiz və  zorakı davranışın Allah  qarşısında böyük günah, dövlət, xalq qarşısında ağır cinayət olduğunu anladan olubmu?  Onun şagirdi olduğu məktəbin direktoru, müavinləri, psixoloqu və s. hər bir şagirdin təlim-tərbiyəsi, gündəlik qayğı və ehtiyaclarıyla məşğul olmağın vacibliyini dərk ediblərmi? Yoxsa bütün fikirləri yalnız valideyn komitəsinin  Müəllim günü, 8 Mart və s. öncəsi keçirdiyi məlum tədbirlərdə, “təmir pulu”nun,  nə bilim “süpürgə pulu”nun yığılmasında qalıb?.. Bu sualların cavablarını dərindən düşünsək, görərik ki, konkret olaraq əksəriyyətin cəzalanmasını tələb etdiyi direktor, müəllim və şagirdləri cəzaya məruz qoymaqla, hətta təhsil nazirini istefaya yollamaqla da bu cür olayların kökü kəsilməyəcək. Sabah başqa bir məktəbdə başqa cür elinaların faciəsinin şahidi olacağıq. Odur ki, Təhsil Nazirliyi və digər müvafiq milli(!) dövlət və hökumət orqanları məsələyə qlobal, kompleks yanaşmalı, yeniyetmə və gənclərimizin, ümumiyyətlə, cəmiyyətimizin əqidə, düşüncə, həyat tərzi sisteminin qanunlarımızla paralel milli, dini dəyər və prinsiplərimizə uyğun  formalaşması üçün təcili tədbirlər görülməli, bu istiqamətdə mükəmməl bir konsepsiya hazırlanmalıdır...

Bəylər, xanımlar, inanın ki, biz öz milli- mənəvi, İslami adət-ənənə, dəyər və prinsiplərimizdən uzaqlaşdıqca belə faciələri hələ çox yaşayacağıq... Bayaq daha bir neçə sarsıdıcı xəbər aldıq: Bakıda 26 yaşlı  Azərbaycan(!) gənci  borca görə özünü asıb öldürüb, Ağdaşda gənc bir hamilə qadın özünü çaya ataraq həyatına son qoyub. Say-seçmə qız və oğlanlarımız, kişi və xanımlarımız, geniş prizmadan yanaşanda heç nədən bir-bir həyatlarına son qoyurlar. Axı bunlar hansısa nəslin, tayfanın, bütövlükdə xalqın soyudur, köküdür, genefondudur...

Əminik, özü də böyük ehtimalla əminik ki, əgər Elina əsl azərbaycanlı, müsəlman əqidəsində böyüsə və məktəbə mini-ətəkdə yox, hicabda getsə idi və buna görə bir qrup məktəb yoldaşının təhqirlərinə məruz qalsaydı belə, əsla intihar etməz, bu vəziyyətdən uğurla çıxış yolu tapardı... Və ümumiyyətlə, Elinanın sinif yoldaşlarının da əksəriyyəti yarı Amerika, yarı Avropa, yarı Rusiya, yarı Türkiyə, yarı müsəlman, milli əqidədə yox, mükəmməl Azərbaycan(!), İslam əqidəsində böyüsəydilər, belə bir hadisə əsla baş verə bilməzdi... 

Deməli, bu qızcığazın, eləcə də onun kimi ətrafın, mühitin, icra qurumlarının və s. laqeydliyi ucbatından həyatına son qoyan uşaqlarımızın, gənclərimizin vətəndaşlarımızın qatili yalnız yanlış valideyn, həyat yoldaşı, rəhbərlik, müdiriyyət,  direktor, psixoloq, müəllim, sinif yoldaşı yanaşması deyil, bütövlükdə Azərbaycanda son iki əsrdə, xüsusən son 3 onillikdə formalaşan yanlış, dinsiz-imansız düşüncə, əqidə sistemi, bayağı, cahil həyat tərzidir...  

Dövlət başçısının Elina Hacıyevanın faciəsinin ciddi araşdırılması barədə rəsmi göstəriş verməsi çox təqdirəlayiqdir. Ancaq öncə dediyimiz kimi, bir olayın nəticələrini araşdırmaq, günahkarlarını cəzalandırmaqla iş bitmir. Bu cür faciələrin, biabırçı olayların qarşısını almaq üçün kompleks tədbirlər görmək vacibdir və bu, milli(!) dövlətin birbaşa borcudur. Konkret təhsil ocaqlarına, ali məktəb, kollec, orta məktəblərə və s. gəldikdə isə burada hər kəs milli, dini dəyər, adət-ənənələrə riayət etməkdə biri-birinə nümunə olmalıdır.  Müəllim, tələbə, məktəbli qız, oğlan təhsil ocağına fahişə, “mavi” görkəmində getməməlidir. Axı Azərbaycan(!) oğlanı,kişisi niyə saçını qırmızı, sarı boyamalı, küçədə, məktəbdə şortda, yaxud cırıq-curuq cins şalvarda gəzməli, Azərbaycan(!), müsəlman(!) qızı, qadını niyə gah yuxarıdan, gah aşağıdan əndamını yarısını bayırda qoymalıdır?.. Məgər bizim heç dini demirəm, milli adət-ənənələrimizdə belə bir geyim forması olub?.. Hələ bəyənmədiyimiz sovet dövründə belələrinin hansı adlarla çağrılması və daim cəmiyyətin qınaq obyekti olması da yaxşı yadımızdadır. Belə geyim formalarının kütləviləşməsinə əsas səbəblərdən biri Qərbdən, Amerikadan gələn insan azadlığını “kefim nə istəyir –geyirəm, ürəyim nə istəyir-edirəm, canım nə istəyir –yeyirəm” kimi yanlış anlama tərzidirsə, digər səbəbi də məhz belə bir “demokratik” düşüncənin nəticəsi kimi telekanallarımızda nümayiş etdirilən və “əməkdar artist”, hətta “xalq artisti” kimi titullarla başımıza çıxardılan açıq-saçıq, dini-imanı bəlli olmayan qadın və kişi aparıcı, aktyor və müğənnilərdir...  Gəlin, ümummilli əqidəmizi qoruyaq və belələrinin uşaq və gənclərimizin kumirinə çevrilməsinə imkan verməyək. Ümumiyyətlə, halallıq, dürüstlük, səbirlilik, təmkinlilik, təvazökarlıq, sadəlik və s. kimi dəyərlərə köklənək. Gənclərimizə nümunə kimi 1-ci Qarabağ, Aprel savaşlarının qəhrəman kişi və qadınlarını göstərək... Əks təqdirdə hələ çox fərdi və kütləvi faciələr yaşayacağıq...  

Sultan Laçın