Ölkə başçısının sərəncamı ilə 2019-cu il “Nəsimi ili” elan olundu. Bu, Azərbaycanın, eləcə də Şərqin böyük dahisi olan şair-filosof  İmadəddin Nəsimi irsinin yenidən öyrənilməsi və bütün dünyada təbliği üçün böyük fürsət yaratdı. 

Artıq bu istiqamətdə müəyyən işlərə də başlanılıb. Görəsən, kinomuz 1974-cü ildə olduğu kimi, bu il də Nəsimi haqqında möhtəşəm film çəkəcəkmi? 

“Mən Prezidentimizə təşəkkür edirəm  ki, bu dar macalda - beynəlxalq əlaqələr, iqtisadiyyat, sosial təminatların müqabilində elmimizi, sənətimizi, mədəniyyətimizi yaddan çıxarmır və onu xüsusi diqqətində, qayğısında saxlayır. 

Bu, çox sevindirici haldır. 50 ilə yaxın bir vaxtdır ki, mən ümumiyyətlə, bu tarixlə, milli-mənəvi dəyərimizlə bağlı, ağlım kəsən qədər araşdırmalar aparır, işlər görürəm. Çox şükür ki, Allah mənə uzun ömür verib. Bu uzun illər ərəzində mən Ədil İskəndərovları, Təhmasibləri, Həmid Araslıları, Əli Fəhmiləri, Əziz Şərifləri, Həsən Seyidbəyliləri, İsa Muğannaları görmüşəm. Yəni bilavasitə onlarla ünsiyyətdə olmuşam, müəllimlərim olublar. Onların elmindən, sənətindən, böyük istedadlarından bəhrələnmişəm”. 

““Nəsimi” filmini çəkəndə də bilirsiniz ki, SSRİ-yə tabe idik, ideologiya sovet ideologiyası idi və onun da öz qanunları vardı. Müəyyən sərhədlər mövcud idi. Digər dövlətlərə önə çıxmağa imkan vermirdilər. İmadəddin Nəsimini Azərbaycana qaytaran, kütləvi şəkildə tanıdan bu gün Nəsimini gətirib dünya səviyyəsində haqqını bərpa edən Ulu Öndərimiz Heydər Əliyevdir. Bu, mənim də iştirakımla olub. Heydər Əliyev bu məsələni o vaxt ortaya qoymasa idi, Nəsimi haqqında geniş sərəncamlar verib, bütün dünyada  festivallar, filmlər keçirməsəydi, Nəsimini ancaq 3-5 nəfər tədqiqatçı, dilçi alimlər tanıyardı. Nəsimini xalq kütləvi şəkildə tanımırdı və elm aləmi də, beynəlxalq aləm də onun barədə çox bilmirdi. Nəsimini çox dar bir çərçivədə tanıyırdılar.  Bu gün isə Nəsimi öz haqqını alır”. 

Dünyada böyük şairlər, filosoflar,  nəhəng təfəkkür sahibləri çoxdur, Nəsimidən isə yoxdur. Nəsiminin digər üstün tərəfi odur ki, praktik bir şəxsiyyətdir. Dünyada çoxlu ideoloqlar, nəzəriyyəçilər var. İdeyanı, nəzəriyyəni verirlər, lakin təcrübəsi uzun illər müzakirə olunur. Nəsiminin böyüklüyü odur ki, Şəms Təbrizidən, Bürhanəddindən,  Mövlanədən, Hüseyn Həllacdan, Nəimidən gələn möhtəşəm irfan fəlsəfəmizi konkret olaraq,  əyani dərslik kimi ortalığa qoydu.  Bax, Nəsimi bu baxımdan  bəşəriyyətdə analoqu olmayan, əvəzolunmaz böyük bir şəxsiyyətdir. 

Çox şükürlər olsun ki, heç olmasa, o vaxt o filmi çəkə bildik. Amma o filmdən üzübəri 50 il keçir. Biz artıq müstəqilik, müstəqil ideologiyamız, təbliğatımız var. Artıq biz özümüzü olduğumuz kimi ortaya qoyuruq, tanıdırıq, təbliğ edirik. Bu mənada Nəsimiyə hələ bizim qaytarılası çox borcumuz var.  Bu elm sahəsində tədqiqat, irfan, dünyanın yaranış fəlsəfəsi və sahələri aid olmaqla, həm də klassik Azərbaycan poeziyasının bütün texnoloji xırdalıqlarını,  mexanizmini bilən bir şairdir, Nəsimi. Nəsiminin dünya poeziyasının bütün janrlarında əsərləri var. Hətta lal, pəltək adamların dilində qəzəlləri var. Gərək şeir texnologiyasını hansı səviyyədə biləsən ki, bütün ölçüləri, yüzdə yüz qoruyub saxlamaqla belə bir gözəl fikir, lal, pəltək adamın dilindən belə gözəl əsər yaradasan. 

İmadəddin Nəsimi fəlsəfəsi dünya səviyyədə, praktik elmin, fəlsəfənin ən əyani düsturu, iki dəfə iki  dörd qədər aydın fəlsəfədir. Biz Nəsimini yenidən elm sahəsində, tədqiqat, təbliğat, tədris sahəsində ciddi surətdə öyrənməliyik.. Bizdə mərkəzdən qaçan, ağzıgöyçək, özünə təbliğat axtaranlar, şouçular, piarçılar hər şeydən istifadə etməyə başlayırlar. Gündəmdə olmaq üçün hər vasitədən istifadə edirlər və bizi korlamağa başlayırlar. Belə həvəskarlar, təsadüfi adamların , hazırlıqsız, savadsız, adamların Nəsimiyə toxunmasına imkan verməməliyik. Çünki Nəsimi artıq dünyada bilinən, tanınan digər millətlərə məxsus böyük alimlər, dahi şəxsiyyətlər tərəfindən öyrənilən bir dahidir. Şükür ki, bizim onların qarşısına çıxacaq elm, sənət, mədəniyyət xadimlərimiz kifayət qədərdir. 

Bu gözəl işləri görən möhtərəm Prezidentimizə və eləcə də onun xanımı Mehriban xanım Əliyevaya elmə, mədəniyyyətə, musiqiyə, sənətə belə dəyər verdiyinə görə, dərindən təşəkkürümü bildirirəm”.