Moderator.az-ın məlumatına görə Milli Məclisin əmək və sosial siyasət komitəsinin sədri, professor Hadi Rəcəbli Finans.az-a müsahibəsində ölkəmizin turizm potensialı və bu sahənin inkişafı istiqamətində atılan addımlardan danışıb.

- Prezident İlham Əliyev hər zaman turizm sahəsinin inkişafını diqqət mərkəzində saxlayır. Bu sektorun genişlənməsi, müasir tələblər səviyyəsində qurulması çox vacibdir. Dövlət başçısı son bir neçə ildə turizmlə bağlı onlarla sərəncam, fərman imzalayıb, dövlət proqramı qəbul edilib, layihələr həyata keçirilib, islahatlar aparılıb. Bunların hər biri bu sahənin inkişafına xidmət edir. Azərbaycanda Turizm Şurası yaradılıb və bu qurum turizm sahəsində lazımi qərarlar qəbul edir. Ölkədə istirahət zonalarının sayı artır, inkişaf keçən illərə nisbətən bu il özünü daha da qabarıq göstərir. Bütün bu tədbirlər Azərbaycana turist axınını getdikcə artırır və turizm mövsümünün əlverişli keçməsinə şərait yaradır.

- Turist arasında fərq qoyulmamalıdır. Fərq keyfiyyətdə olmalıdır. Turistə nə qədər yaxşı xidmət göstərilsə, o qədər razı qalacaq ölkədən. Xidmət səviyyəsi kimliyindən asılı olmayaraq bütün iaşə müəssisələrində yüksək olmalıdır. “Müştəri hər zaman haqlıdır” prinsipi ilə çalışmaq lazımdır. Biz elə etməliyik ki, turist ölkədən razı qayıtsın. Biz hər zaman ölkəmizə gələn qonaqları yüksək səviyyədə qarşılayıb yola salmalıyıq. Bizim məqsədimiz ölkəmizə daha çox turistin cəlb edilməsi olmalıdır.

- Möhtərəm Prezidentimiz İlham Əliyevin hər zaman səsləndirdiyi bir fikir var ki, ölkədə otellər təkcə 6-7 ulduzlu olmamalıdır. 3 və 4 ulduzlu otellər də tikilməlidir. Bu istiqamətdə də ardıcıl işlər görülür. Bizim regionlarda belə turistlik məkanlar var. Məsələn Qəbələ, Qusar, Şəkidə daha münasib qiymətə belə otellərə rast gəlmək olur. Turistin seçiminə uyğun olmalıdır hər şey. Hətta istirahət mərkəzlərində kiçik və münasib qiymətə hostellər, gənc turistlər üçün gecələməyə müxtəlif çadırlar da mövcuddur. Bütün bu xidmətlər müştərinin istəyinə görə təklif edilməlidir.

- Turizm sahəsində regional turizminin inkişafı mühüm yer tutur. Amma bu sahədə məni narahat edən bir nüans var. Niyə insanların çoxu tətil üçün öz ölkəsini qoyub, daha çox xarici dövlətlərə üz tutur? Bu gün Azərbaycanın Bodrum, Dubay, Antalya kimi çox sayda istirahət zonaları var. Qiymət də, keyfiyyət də olduqca münasibdir. Elə insanlar var ki, 50 yaşı var, amma hələ Qubanı, Şəkini, Lənkəranı görməyib. Azərbaycanımızı tanımaq lazımdır. İlk növbədə özümüz öz bölgələrimizi yaxından tanıyıb bələd olmalıyıq.

- Ölkəmizdə turizmin geniş vüsət aldığı bölgələrimiz çoxdur. Şəki, Qəbələ, Gəncə, Qusar artıq turizm bölgələri kimi tanınır. Amma bəzi bölgələrimiz turist qəbul etmək imkanı çox olsa da, infrastruktur və müasir tələblərə tam cavab vermir. Buna görə də hələlik həmin bölgələr turizm zonası hesab edilmir. Yaxın zamanlarda bu məsələ ilə bağlı da səmərəli addımlar atılacaq və turizm zonalarının sayı daha da artacaq.

- Prezident İlham Əliyevin rəhbərliyi ilə bu sahədə uğurlu işlər görülüb, mühüm addımlar atılıb, qanunvericilik bazası yaradılıb. Bizim üzərimizə düşən isə dövlət başçısının tapşırıqlarını, müəyyənləşdirdiyi siyasəti, təsdiqlədiyi proqramları icra etməkdir. Ölkəmizdə turizm qurumu fəaliyyət göstərir. Bu qurum bacardığı qədər çox çalışmalıdır. Prezident İlham Əliyevin turizm sahəsinə göstərdiyi diqqət və qayğı, bu sahədə həyata keçirdiyi siyasət ürəkaçan və sevindiricidir. Ölkə daxilində xarici turistlərin rahat və sərbəst hərəkəti üçün heç bir təhlükə yoxdur. Hər il ölkəyə bir əvvəlki ilə müqayisədə daha çox turist axın edir. Yeni yollar çəkilir, otellər tikilir, sahibkarlığın inkişafına şərait yaranır. İllər sonra ölkəmizdə turizm sahəsi daha da çox irəliləyəcək.

- Məncə, ən böyük reklam hər bir turistin ölkəmizdən öz vətəninə xoş təəsüratla getməsidir. Dünyaca məşhur tədbirlərə, beynəlxalq yarışlara ev sahibliyi etməyimiz ölkəmizin xaricdə tanıdılması baxımından ən güclü vasitədir və bu reklamdan da daha təsirlidir.

- Dünyada turizm təcrübəsinə tam yiyələnmiş ölkələr var. Təbii ki, biz onlardan çox şey öyrənməliyik. Özümüzün də mövcud təcrübələrimiz var. Biz turistlərə qədim köklərimizə dayanan adət-ənənələrimizi, bayramlarımızı, milli xörəklərimizi göstərməliyik. Onları mədəniyyətimiz ilə tam tanış etməliyik.

- Daxili turizmin genişlənməsi çox vacibdir. Mən hesab edirəm ki, bununla bütün dövlət qurumları məşğul olmalıdır. Bölgələrimiz yaxşı tanıdılmalıdır. Bunun üçün əsas amildən biri də yolların çəkilişidir. Yollar səliqəli və sahmanlı olmalıdır. Torpağını, vətəninin bölgələrini gəzməyən, öz təbii sərvətlərinə bələd olmayan millət vətənini, torpağını sevə bilməz. İlk növbədə öz millətimiz, özümüz öz bölgələrimizi gəzib təbii sərvətlərimizə bələd olmalıyıq ki, sonra digər ölkələrdə bunları təbliğ edib, daxili turizmin inkişafına şərait yaradaq.