22 il ərzində düşmənlə neytral zonada yerləşən bir kəndi tam nəzarət altına alaraq oradakı həyatı bərpa etmək, yeni evlər inşa etmək, müasir infrastruktir yaratmaq, yol çəkmək, məscid, məktəb tikmək və s. kiçik də olsa, nailiyyətdir. Ancaq torpaqlarımızın  dörddə biri boyda BÖYÜK bir ərazinin işğalından ötən əsrin dörddə birindən çox BÖYÜK  zaman kəsimini, erməni işğalı altında qalan torpaqlarımızın mənəvi, hüquqi, tarixi, hərbi-strateji, maddi, geoloji, genealoji və s. dəyərini, işğal altında qalan uca dağ zirvələrimizin bu kəndin yanındakı 200-300 metrlik təpədən 10-15 dəfə hündür olduğunu anladıqda görürük ki, sözügedən nailiyyət heç dəryada damla da  deyil...

Aprel döyüşlərindən artıq iki il ötdü və bu iki il müddətində Cəbrayıl bölgəsinin tam nəzarət altına alınmış Çocuq Mərcanlı kəndinin bərpası, sakinlərin doğma yurdlarına qayıdışı və s. haqda kifayət qədəq BÖYÜK təbliğat kampaniyası apardıq. Hətta beynəlxalq səviyyədə də bu kəndimizi tanıtdıq, dünya ictimaiyyətinə Azərbaycanın torpaqlarının azad ediləcəyi təqdirdə oradakı həyatın qısa müddətdə bərpasına, yəni BÖYÜK QAYIDIŞA hazır olduğunu anlatdıq. Xarici ölkələrin səfirlərindən tutmuş babat vəzifəli rəsmilərinədək, jurnalistlər, politoloqlar, incəsənət xadimləri, idmançılar, hətta şahzadələr də Çocuq Mərcanlının qonağı oldu...

Zənnimcə, iki il kiçik bir kəndin təbliği üçün kifayət qədər BÖYÜK zamandır. İndi artıq BÖYÜK QAYIDIŞdan danışmaq  vaxtıdır. Özü də BÖYÜK sürətlə... Yoxsa hər kəndi, qəsəbəni, şəhəri azad edəndən sonra 2-3 ili onun təbliğinə həsr etsək(işğal altındakı torpaqlarımızda 1000-ə yaxın yaşayış məntəqəsi var),  torpaqlarımızı azad etmək üçün bizə 2-3 min il vaxt gərək olacaq...Buna isə heç kəsin nəslinin, sülaləsinin ömrü  çatmayacaq.... Bəlkə ona qədər Qiyamət də qopdu, Axirət günündə -Allah qarşısında  torpaqlarımızı azad etməməyimizə necə haqq qazandıracağıq?..

O qədər Çocuq Mərcanlıdan danışırıq ki, az qala, tamam unutmuşuq ki, bu kənddən cəmi bir neçə km məsafədə Cəbrayıl rayonunun Böyük Mərcanlı kəndi də var... Artıq Böyük Mərcanlıya da dönmək, o yurdu da əsl sahiblərinə qaytarmaq, orada da yeni məscidlər, evlər, məktəblər tikmək vaxtı deyilmi?.. 

Şükür ki,bu yaxınlarda Müdafiə Nazirliyinin rəsmi məlumatına görə,  Naxçıvanın Cünnüt kəndini də, Qızılqaya yüksəkliyini də nəzarətimizə qaytardıq.Əla! Fəqət. Burda da dayanmaq olmaz! Bir- iki ilimizi də Günnütün təbliğinə həsr edək? İrəli getməyə tələsmək lazımdır, cənablar, bəylər! Artıq LAZIM sözü də bizdən utanır... 

Dəfələrlə də demişik, bir daha da təkrar edirik: Torpaqlarımızın bütövlükdə azadlığı və BÖYÜK QAYIDIŞ üçün heç bir danışıq, heç bir səfər heç bir vəchlə yol açmayacaq. BÖYÜK güclər buna imkan verməyəcək... Ta ki, yumruq kimi birləşib BÖYÜK XALQ olduğumuzu, varlılı-kasıblı Vətən uğrunda şəhidliyə hazır olduğumuzu isbat edənədək... Bu boyda insan potensialıyla, yeraltı-yerüstü sərvətləriylə, nefti-qazıyla, qızılı-misi ilə və s. 2-3 milyonluq Ermənistan qarşısında aciz qalmaq – BÖYÜK XƏCALƏT deyilmi?.. Yoxsa indi də ona ümid edirik ki, “Ermənistanın qərbpərəst(?) yeni hakimiyyəti rus ordusunu bu ölkədən çıxmağa vadar edəcək və “demokratik”, “ədalətli” ABŞ, Avropa İrəvanı Qarabağı bir neçə gündə qansız-qadasız, sülh yoluyla Azərbaycana qaytarmağa vadar edəcək”?.. Xeyr, bu da tamamilə yanlış xəyaldır. Hətta Rusiya Ermənistandan tamamilə əl çəkməyə vadar olsa belə, o halda çoxüzlü, çoxbaşlı siyasət yürüdən ABŞ və NATO ilə hesablaşmalı olacağıq...  Ermənistanı da, Qarabağı da nəzarət altına aldıqdan sonra onlar xristian ermənilərin “ayağını tapdalayacaqlarmı”?..

XX əsrin əvvəlində 10-dan çox Avropa dövlətinin mühasirəsində qalan, heç bir nefti-qazı, pambığı, üzümü, qızılı-gümüşü olmayan Türkiyə BÖYÜK XALQ olduğunu necə isbat etdi? Bir nəfər kimi səfərbər olunub silaha-sursata sarılmaqla... Bu da  Çanaqqala zəfərində 250 minədək şəhid verməklə, BÖYÜK orduları olan BÖYÜK dövlətləri fiziki və mənəvi cəhətdən sındırmaqla,  BÖYÜK gücləri BÖYÜK heyrətə gətirərək Türkiyə ilə də BÖYÜK güc olaraq hesablaşmağa vadar etməklə nəticələndi...

Biz də gerçəkdən, ən azı, sayca böyük xalqıq;  o taylı-bu taylı,  vətənli-qəribli 50 milyona yaxınıq... İndi mənəvi, hərbi-siyasi baxımdan da BÖYÜKLÜYÜMÜZÜ isbat etməliyik. Bunun üçün isə Quzey Azərbaycandakı korrupsiyadan, inhisarçılıqdan, məmur özbaşınalığından sözdə yox, gerçək mənada AZAD olacaq hüquqi cəhətdən müstəqil(!) dövlətimiz Güneydəki, xaricdəki  on milyonlarla soydaşımız üçün BÖYÜK bir güc MƏRKƏZİNƏ çevrilməlidir....Bundan sonra isbat edə bilərik ki, biz -27 yaşlı bir dövlət olaraq  artıq ÇOCUQ deyilik və ÇOCUQ oyunu oynamırıq, işğal altındakı torpaqlarımızı azad edə biləcək BÖYÜK bir gücük...  Bütün mənalarda BÖYÜK  Azərbaycana gedən yol isə işğal altındakı hər bir yaşayış məntəqəsinin, o cümlədən Böyük Mərcanlının azadlığından keçir...