Dünən Azərbaycan-Ermənistan təmas xəttinin Qazax rayonu hissəsində mövqelərimizə sızmaq istəyən düşmənin kəşfiyyat-diversiya qrupunun aşkar edilərək neytrallaşdırılması prosesi fonunda Ermənistan ordusunun bir hərbçisi – Karen Kazaryan diri olaraq ələ keçirilib. Xtırladaq ki, bu, Azərbaycan ordusunun ələ keçirdiyi ilk erməni diversantı deyil və hərbçilərimiz bundan öncə də dəfələrlə bir neçə erməni diversantını ələ keçirərək düşmənin təxribatçılıq niyyətini ifşa edib. Lakin Karen Kazaryanla bağlı olayda diqqət çəkilməsi gərəkən maraqlı bir məqam var ki, bu da erməni hərbçisinin tutulması ilə Ermənistanın müdafiə nazirinin Beynəlxalq Qırmızı Xaç Komitəsinə müraciət etməsinin az qala eyni vaxta təsadüf etməsidir. Hansı ki, həmin müraciətdə K.Kazaryanın azad edilməsinə yardım göstərmələri ilə bağlı xahiş öz əksini tapıb.
Ermənistan ordusunda diversiyadan öncə “xilas məktubları” hazırlanır?
K.Kazaryanın tutulması ilə Qızıl Xaça ünvanlanan məktub arasında müddət o qədər qısadır ki, baş verənlər “xilas məktubları”nın erməni ordusunda diversiya cəhdindən öncə hazırlanması ilə bağlı düşüncələrə yol açır. Yoxsa başlıca vəzifəsi bilavasitə müdafiə və təhlükəsizliklə bağlı olan müdafiə nazirinin uğursuzluqla nəticələnən diversiya cəhdinin təhlilini bir kənara qoyub, Beynəlxalq Qızıl Xaç Komitəsinin qapısı önündə boynunu bükməsi anlaşılan deyil. Ola bilsin ki, öz hərbçilərinin güc və səriştəsinə etibar etməyən, bu cür cəhdlərin qarşısının Azərbaycan ordusu tərəfindən qətiyyətlə alınacağından əmin olan Ermənistan hərbi rəhbərliyi işini “daha etibarlı tutmağa” üstünlük verir. Bu səbəbdən də diversiya məqsədi ilə hazırlanan qrupların hər birinin adından Qızıl Xaça “SOS siqnalı”, “xilas məktubu” hazırlanır ki, məqsəd döyüş meydanında ələ keçən hərbçiləri rəsmi Bakıya ünvanlanan yalvar-yaxırla geri qaytarmaqdır.
Düşmən ordusunda baş verməsi gözlənilən daha bir yenilik...
K.Kazaryanın ələ keçirilməsinin ardınca Ermənistanın beynəlxalq təşkilatlar arasında “mərhəmət axtarışına” çıxması yaxın gələcəkdə düşmən ordusunda daha bir yeniliyin mümkünlüyü ilə bağlı ehtimala yol açır. Bu isə hər bir erməni hərbçisinin cibinə “aman məktubları”nın yerləşdirilməsi ilə bağlıdır. Çox mümkündür ki, dildə ölkəmizin ünvanına olmazın təhdidlər yağdıran Ermənistan hərbi rəhbərliyi döyüş meydanlarında Azərbaycan ordusuna məğlub olan, ona nəinki qalib gəlmək, ümumiyyətlə, müqavimət göstərmək iqtidarında olmayan erməni hərbçilərinin cibinə - “aman məktubları” yerləşdirsin. Məzmunu K.Kazaryanla bağlı Qızıl Xaça ünvanlanan məktubla eyni olacaq bu məktublarda, ələ keçən erməni hərbçilərinə aman verilməsi ilə bağlı yalvarışlar öz əksini tapsın. Hər halda bu cür yenilik erməni ordusu üçün hər bir hərbçi ilə bağlı müxtəlif beynəlxalq təşkilatların qapısını döyməkdən daha faydalıdır. Çünki bütün hallarda əsir götürülən erməni hərbçilərinin taleyi ilə bağlı məsələyə beynəlxalq təşkilatlar deyil, rəsmi Bakı qərar verir və odur ki, Ermənistan hərbi rəhbərliyinin “aman məktubunu” bilavasitə Azərbaycana ünvanlaması vaxta və enerjiyə qənaət baxımından daha məqsədəuyğundur.
Bir əlində süngü, digər əlində ağ bayraq olan erməni ordusu...
K.Kazaryanla bağlı yaşananların digər bir əhəmiyyəti baş verənlərin bütövlükdə erməni ordusunun mövcud durumu ilə bağlı aydın təsəvvür yaratmasıdır. Bir əlində süngü, digər əlində ağ bayraq tutmuş halda hərəkət edən, məqamına görə gah birini, gah da digərini irəli verən bu ordunun çürüdüyü, döyüş əhval ruhiyyəsindən, cəsarət və mərdlikdən tamamilə məhrum olduğu göz önündədir. K.Kazaryanın tutulması və bunun ardınca baş verən “yalvarış prosesi” Ermənistan hərbi rəhbərliyinin bu günə qədər səsləndirdiyi bütün təhdid və hədə-qorxuların heç bir reallığa söykənmədiyini, bu təhdidlərin Azərbaycan ordusu qarşısında duyulan qorxu və vahimədən irəli gəldiyini sübut edir. Hansı ki, bu qorxunun Ermənistan ordusunda bundan sonra hələ çox yeniliklərə vadar edəcəyini, mərhəmət dolu çox məktub və müraciətlər yazmağa sövq edəcəyini əminliklə söyləmək olar.
Seymur Əliyev
e-mail: seymur_dq04@mail.ru