İmam Hüseyn məscidinin axundu, “Tövbə” Cəmiyyətinin sədri  Hacı Əbdül Gəncədə baş vermiş son qanlı olaylarla bağlı maraqlı fikirlər səsləndirib. 

Tanınmış din adamı və ictimai xadimin Moderator.az əməkdaşına müsahibəsini nəzərinizə çatdırırıq: 

- Bismilləhir rəhmanir rəhim! Əvvəla, Gəncədə son olaylar zamanı həlak olanlara Allahdan rəhmət diləyir, onların ailələrinə, əzizlərinə başsağlığı verir, yaralılara şəfa diləyirəm. Əlbəttə, bu qanlı olaylar olmamalı idi. Ancaq burada bir sıra gerçəkləri araşdırmaq lazımdı. Bu hadisələrə hansı amillər təkan verdi? Bir nəfərin icra başçısını güllələməsinə nələr səbəb oldu, yaxud nələr kimlərəsə  bəhanə verdi ki, bu terroru təşkil etsinlər? Polislərə hücum edən şəxslər hansı motivlərə əsaslanıb? Bu qanlı olaylar hansı daxili və xarici güclər tərəfindən təşkil edilib və yönləndirilib? Yalnız bunların hamısını araşdırdıqdan sonra son sözü söyləmək mümkündür... 

Mən bir ictimai və din xadimi kimi heç bir konkret mənbəyə əsaslanmadan, sadəcə, onilliklər boyu qazandığım təcrübə və həmin təcrübə sayəsində apardığım müşahidələr əsasında bir sıra mülahizələr söyləyə bilərəm. Ola bilər ki, dediklərim kiminsə ürəyincə olsun, yaxud əksinə, kiminsə xoşuna gəlməsin. Mən gerçək, haqq hesab etdiyimi deyirəm, təki Allah razı qalsın. Əgər dediklərimdə hər hansı yanlış, nöqsan varsa, Allah özü, bağışlasın. Bu hadisələri heç cür dini motivlərlə bağlamaq olmaz. Əvvəla, dinimiz – İslam zülmə  və zülmkarlığa qarşı olmaqla yanaşı,  birmənalı şəkildə heç bir məhkəmə qərarı, fətva olmadan  günahsız kimsənin qətlə yetirilməsinin, yəni terrorun əleyhinədir. Digər tərəfdən,  zənnimcə, burada siyasi motiv və siyasi məqsəd əsas rol oynayır.  Bəziləri bunu iqtidarın problemləri ilə əlaqələndirirlər.   Tarix boyu heç bir padşah bilə-bilə öz oturduğu budağı kəsməyib.  İndi də kəsmir və bundan sonra da kəsməyəcək. Bu məntiq bizim dövlət başçısına da aiddir.  İkincisi də, dövlət başçımız- Azərbaycan prezidenti cənab İlham Əliyev yalnız deyil. Bu gün onun yanında, onun sağında onunla yanaşı, diplomatiyası və xeyirxahlığıyla dünyada tanınmış ölkənin 1-ci xanımı, 1-ci Vitse-prezident  Mehriban xanım Əliyeva dayanır.  Amma təəssüf ki, dediyimiz o “budağı kəsməyə”, dövlətə və dövlətçiliyimizə zərbə vurmağa çalışan daxili qüvvələr var. Onlar hər bir sahədə yaranmış problemlərdən istifadə edə bilərlər. Onlar istər iqtisadiyyatda, istər energetika sahəsində, istər dini sahədə terror təşkilatlarının yaradılmasında və s. yararlanmağa çalışır, hakimiyyəti ələ keçirməyə cəhd edirlər. Onların məqsədlərindən biri də prezidenti və xanımını xalqın gözündən salmaq, xalqın onlara olan inamını sarsıtmaqdır... 

Mən mərhum Heydər Əliyevin bir sözünü xatırlatmaq istəyirəm. Hər hansı bir hadisə olanda o, tabeliyində olan şəxslərə, digər vətəndaşlara deyirdi:”Mövqeyini bildir”.   Bu, böyük sözdür. Yəni hansı dinə, hansı məhzəbə, hansı siyasi cərəyana xidmət edirsənsə, biz ona uyğun səninlə rəftar edək. Gəncə hadisələrini törədənlərin mövqeyi bəlli deyil... 

Mənim artıq 80-ə yaxın yaşım var. İstər cavanlıqa, istər siyasətlə məşğul olduğum dövrlərdə həmişə sözümü açıq demişəm. Bilirsiz ki, mən neçə ildir, Mehriban xanım Əliyevanı dəstəkləyirəm. Özü də açıq, gizlətmədən, pərdələnmədən onun haqqında qəlbimdən nə keçib açıq şəkildə demişəm.  Və bu gün də, sabah da  deyəcəyəm. Yəni mən Mehriban xanıma inanıram, qəlbən inanıram. Və inanın ki, mənim əqidəmdə olanlar dövlət qurumlarımda, xalqın arasında da, müxalifətdə də var. Onlar hamısı 1-ci xanıma etimad göstərirlər.  Yəni, bu əqidədə mən tək deyiləm. Bəlkə məndən də güclü onu dəstəkləyənlər var. Və xanımı dəstəkləməklə biz birbaşa xanım kimi dəstəkləyirsə, onu da dəstəkləyirik. Və təbii ki,  1-ci xanımı dsətəkləyənlər dövlət başçımızı da dəstəkləyirlər. Və bu əqidədə olanlar heç vaxt nə dövlətə, nə də dövlətçiliyə xəyanət edərlər... 

- Mən bu barədə çox fikirləşmişəm və gəldiyim nəticəni açıqlamaq istəyirəm. Bunlar dırnaq içində “iqtidar”da olanlar, dırnaq içində “müxalifətdə” olanlardır... Bunlar əslində nə iqtidardır,  nə də müxaifət. Bunların bir əsas məqsədi də dövlət başçısıyla 1-ci  Vitse-prezident, 1-ci xanım arasındakı birliyi parçalamaqdır. Həm ailə daxilində ailəvi, həm dövlətin idarəsi baxımından siyasi birliklərini pozmaq istəyirlər. Bundan sonra isə “parçala- hökm elə” siyasətini işə salmaq niyyətindədirlər. Lakin Allahın köməyi ilə bu birliyi parçalamağa nail ola bilmirlər və bilməyəcəklər... Bu birliyi pozmaq mümkün deyil...  Bəs bunları necə tanımaq olar? Çox asanlıqla. Bunlar xaricdəki dırnaqarası “müxalifət”çilərdir... İşləri-gücləri yalnız İlham Əliyev, Mehriban Əliyeva haqda hədyanlar söyləməkdir. Bunlar adi küçədən tutulmuş söyüş söyənlər dəstəsi deyil. Bunların arxasında Azərbaycanı Suriyanın, Yəmənin gününə salmaq niyyətində olan supergüclər və onların daxildəki əlaltıalrı dayanır... Fikir verin, onlar Avropadan söyür, burda isə müəyyən qüvvələri təhriki ilə həmin söyüş söyənlərin ailələrinin, ata-analarının, yaxud onların məzarlarının başına Azərbaycan xalqına yaraşmayan işlər gətirirlər. Bunu edənlər gözəl anlayır ki, iqtidarı söyənlərə qarşı belə hərəkətlər etdikcə onlar daha qızışacaq, daha radikallaşacaq. Və adama ən çox təsir edən odur ki, kiminsə anasını  heç bir əsas olmadan, günahsız yerə polisə aparmaq, yaxud kiminsə atasının qəbrini təhqir etmək –Azərbaycan xalqının, heç bir xalqın milli-mənəvi dəyərlərinə, adət-ənənələrinə yaraşan hal deyil. Mən qətiyyən o söyüş söyənləri müdafiə etmirəm. Ancaq mən onların valideynlərinə, bacılarına, əzizlərinin məzarlarına qarşı edilənləri eşidəndə də xəcalət çəkirəm. Və hesab edirəm ki, bu hadisələrin hamısı, o cümlədən Gəncə olayları nə yolla-olursa olsun, Azərbaycanda qarşıdurma, xaos yaratmaq istəyənlər tərəfindən təşkil olunub. Maraqlı, gözlənilməz olaylar baş verir. Necə olur ki, bir qardaş xaricdən iqtidarı söyür, o birisi isə prezidentliyə namizəd olur?.. Bəs ona qarşı nə əcəb təzyiqlər olmur, əksinə, onu rəhbərliyə gətirmək istəyən qüvvələr var?.. Bu cür prosesləri görəndə belə qənaətə gəlmək olur ki, xaricdən İham Əliyevi və Mehriban Əliyevanı söydürənlər,  Azərbaycanda isə onların əzizlərini, qəbirlərini təhqir edənlər və Gəncə olayları eyni mərkəzdən idarə olunur... 

Digər tərəfdən, hadisələrin konkret kimlər, yaxud hansı xarici güclər tərəfindən təşkil edildiyini söyləmək çətin olsa da, bir şey aydındır. Son 7-8 ildə Gəncə və Gəncəbasarda baş verən olayları, prosesləri araşdırsaq,  o region sakinlərinin icra hakimiyyətlərinə gerçək münasibətlərini, düşüncələrini təhlil etsək, görərik ki, baş verənlərdə  Gəncə şəhər icra hakimiyyəti başçısı Elmar Vəliyevin idarəçlikdə, sakinlərə, camaata, eləcə də inanclı insanlara münasibətində yol verdiyi bəzi xətaların da kifayət qədər rolu olub. Bunu inkar etmək olmaz...