Fevral ayının 20-də İranın paytaxtı Tehranda güclü iğtişaşlar baş verdi. Həmin iğtişaşlar zamanı 5 nəfər də həlak oldu. Qeyd edək ki, ötən gün polis sufi cərəyanının nümayəndisinin həbsinə qarşı çıxış edən etirazçıları dağıtdıqdan sonra polislə nümayişçilər arasında qarşıdurma yaranıb. Həmin vaxt naməlum şəxs avtobusu kütlənin üstünə sürüb. Məlumata görə, hadisələrlə bağlı saxlanılanlarında olduğu bildirilir. Saxlanılanların sayı təxminən 300 nəfər qeyd edilib. Bu İrandakı il ərzində sayca ikinci iğtişaşdır. Bundan əvvəlki iğtişaş isə dekabr ayına təsadüf etmişdi. Həmin iğtişaş təbii ki, daha genişmiqyaslı idi və demək olar ki İranın əsas şəhərlərinin hamısında əhali küçələrə toplaşaraq rejimə qarşı çıxmışdılar. 

Məsələnin əsl səbəbi isə iqtisadi vəziyyətlə bağlıdır. Bütün bunlar məsələnin yalnız görünən hissəsidir. Mən isə bu etirazların və iğtişaşların daxildəki qüvvələrin iradəsi ilə baş tutduğunu düşünmürəm. İndi isə gələk məsələnin pərdə arxasındakı səbəblərinə. Əvvəlcə onu qeyd edim ki, İrandakı baş verən dekabr etirazlarını təhlil edərkən bunun səbəbinin yalnız iqtisadi vəziyyətlə bağlı olduğunu düşünürdüm. Dünənki hadisələr isə məni bir daha bu barədə düşünməyə sövq etdi. 

Hesab edirəm ki, ABŞ yenə də öz ənənəsini davam etdirir. Belə ki, əgər xatırlayırsınızsa dekabr ayındakı etiraz aksiyaları zamanı ABŞ prezidenti Donald Tramp belə bir tweet atmışdı : " artıq İranda dəyişiklik etməyin vaxtıdır ". D.Trampın da siyasi jestlərdən geniş şəkildə istifadə etdiyini hər kəs yaxşı bilir. Bu tweet bəlkə də "digər" ölkələrə bir ultimatum xarakteri daşıyırdı. Belə ki, səbəb həqiqətən də iqtisadi vəziyyətlə bağlı ola bilər, Lakin belə bir şey də var ki, əgər bir ölkəni, xüsusilə də İran kimi " qapalı" bir ölkəni sarsıtmaq üçün ilk metodlardan biri hər hansı bir vəziyyətlə bağlı rejimə qarşı mənfi ictimai rəy yaratmaqdır. 

Düşünürəm ki, ABŞ-ın da elə əsas hədəfi İranı daxildən zəiflətməkdən ibarətdir. ABŞ- ın İslam ölkələrində belə nümunələri çoxdur. Məsələn, ABŞ-ın İslam ölkələri ilə bağlı eləcə də Yaxın Şərqdə yürütdüyü siyasət dini fanatik qrupları canlandırmaqdan ibarətdir. Elə dünənki iğtişaşı da mən məhz bu amillə əlaqələndirərdim. Təbii ki, İran da bunun fərqindədir. Odur ki, Yaxın Şərqdəki hadisələrdə də öz fəallığıını davam etdirir. İran tərəfi heç bir vəchlə ABŞ-ın bu regionlarda qalıcı olmağını arzu etmir. Çünki, İran da bunu bilir ki, ABŞ ın Yaxın Şərqlə bağlı çox böyük planları var. Bu planın əsas hissəsi və hədəfi isə belədir: Yaxın Şərqdə Kürdistan dövləti yaradılmalı, planın daha sonraki mərhələsində Türkiyə parçalanmalı, daha sonra isə İran parçalanmalı idi. 

Türkiyənin "Zeytun Budağı" əməliyyatı Amerikanın  planlarını pozdu. Ancaq ABŞ mövcud durumla barışmayacaq və durumu öz xeyrinə dəyişməyə çalışacaq. İran, bölgədə yaşanan təhlükəsizlik problemlərinə görə bəzi ölkələrin bölünmə riskinin domino təsiri yaradacağını və bunun da öz milli təhlükəsizliyi və ərazi bütövlüyünü riskli hala gətirəcəyini düşünür. Əsasən Suriya böhranında başlanğıcdan etibarən bu riski aradan qaldırmaq məqsədi ilə İran öz milli təhlükəsizliyinin Aralıq dənizinin sahillərindən başladığını ifadə edərək, mümkün bölünmə prosesini Suriyada dayandırmağı qarşısına məqsəd qoyub.