Xocalı qatili Serj Sərkisyan BMT tribunasından yenə özünü cığal uşaq kimi apardı, prezident kimi yox. Gah Azərbaycanı günahlandırdı, gah “sülhpərvər” olduğunu iddia elədi, gah erməni xalqının “yazıq” obrazını yaratmağa çalışdı. Ənənəvi erməniçilikdən uzağa gedə bilmədi. Çünki o nüfuzlu tribuna onluq deyildi...

Sərksiyanın kimliyini araşdırmaçı Tomas de Valla müsahibəsindəki etirafları ortaya qoyur. Hansı ki, Karnegi Fondunun saytında əksini tapan bu etiraflar sonradan Tomasın “Qara Ba𔝠kitabına salınıb. “Xocalıya qədər azərbaycanlılar bizimlə sadəcə zarafat etdiklərini düşünürdülər”. Budur Sərksiyanın iç üzü, mahiyyəti! İndi sülhdən danışır. O, 2 yaşlı Zəhranın qatilidir!

Əslində bir qatilin BMT kimi aparıcı təşkilatın tribunasından sülh xitabı etməyə ixtiyarı yoxdur! Belələrinin yeri Haaqa Tribunalıdır, BMT tribunası yox! Ancaq nə edəsən ki, ədalətsiz dünyadır və belə caninin çıxışına qulaq asmaq üçün ona BMT düz beşinci sessiyadır ki, zaman ayırır. 

Sərksiyan qırmızıcasına iddia edib ki, Dağlıq Qarabağ heç vaxt Azərbaycanın tərkibində olmayıb. Bu cani Qarabağ ermənisi olduğunu, 1954-cü ildə o vaxtkı Azərbaycan SSR-in Stepanakert (Xankəndi) şəhərində doğulduğunu da danmaq istəyir. Onun iş yoldaşları indiyə qədər Xankəndində “Serjik” çağırılarn bu bəstəboy barədə xatirələrini danışırlar. 

Azərbaycan Kommunist Partiyası Mərkəzi Komitəsinin təşkilat şöbəsində Dağlıq Qarabağ üzrə inspektor işləmiş Maksim Musayev deyir ki, 80-ci illərin əvvəllərində S.Sərkisyan Dağlıq Qarabağ Muxtar Vilayətinin Komsomol Komitəsinin ikinci katibi təyin olunanda, onun qəbulunda olub. Belə təsvir edib: “Bitlis fason saçı da var idi. İçəri girdi, dedim əvvəlcə get saçını qaydaya sal, sonra gəl, belə komsomol olmaz”.

Həmən bu Sərkisyandan soruşan gərək, “Serjik, əgər Dağlıq Qarabağ Azərbaycan ərazisi olmayıbsa, sən niyə vəzifəyə təsdiq üçün Bakıya gəlirdin, elə İrəvana gedərdin də”. Amma kimdir soruşan?

Əslində Sərkisyandan BMT Təhlükəsizlik Şurasının 4 qətnaməsi haqda soruşmaq lazım idi. Təşkilatın rəhbərliyi uşaq qatili olan bu prezidentin çıxışını yarımçıq kəsib soruşmalıydı ki, nəyə görə Təhlükəsizlik Şurasının Kəlbəcərin işğaldan azad olunmasını nəzərdə tutan 30 aprel 1993-cü il tarixli, 822 saylı qətnaməsini icra etmək əvəzinə, Kəlbəcər dağlarını yararaq Vardenis-Ağdərə yolunu çəkibsiniz? Həmçinin digər 3 qətnamənin icra olunmamasına görə Ermənistana qarşı sərt sanksiyalar əl atılmalı idi, daha onun rəhbərinə şivən qoparmaq üçün tribuna verilməməliydi.

Xatırlayaq, ilk qətnamədə BMT “bütün işğalçı qüvvələrin Kəlbəcər rayonundan və Azərbaycanın digər bu yaxınlarda işğal olunmuş rayonlarından dərhal çıxarılmasını tələb edir”di. 23 ildir nəticə yoxdur. İndi Nalbəndyan deyir 5 rayon azad oluna bilər. Bəs, Kəlbəcər haqda BMT qətnaməsi? Soruşan olmadı... 

Ermənistan prezidenti ölkəsinin 1992-ci ilin martından BMT-nin üzvü olduğunu deyib. Ancaq onu da unudub ki, elə eyni ildə, eyni gündə Azərbaycan da BMT-nin tamhüquqlu üzvü olub. Özü də Dağlıq Qarabağ daxil, 86,6 min km?-lik əraziləri ilə birlikdə. İndi həmin BMT-nin ali kürsüsündən “Dağlıq Qarabağ heç vaxt Azərbaycanın ərazisi olmayıb” deməyin bir adı var: həyasızlıq! 

Sərkisyan Azəbaycanı ermənifobiyada, məktəblilərdə ermənilərə qarşı nifrət aşılamaqda ittiham edib. Ancaq ən azı biz bilirik ki, Ermənistanda uşaq doğulanda qulağına “sənin düşmənin türkdür” deyilir. Bakıda 30 min erməni yaşayırsa, hansı ermənifobiyadan söhbət gedə bilər? Hər halda Sülh Platformasını təsis edən Azərbaycan oldu, Sərkisyanın ölkəsi yox. 

Utanmazcasına Azərbaycanın sülh danışıqlarından yayındığını iddia edir. Sanki 1991-ci ilin 20 noyabrında Azərbaycanın dövlət nümayəndələrinin olduğu vertolyotu vuran erməni faşistləri olmayıb. Həmin heyət Qarabağa, ermənilərlə danışıqlara gedirdi. O zaman Qarabağdakı quldurlara başçılıq edən sərkisyanlar, köçəryanlar... imkan versəydi, düşmənçilik bu günə qədər davam etməzdi. 

Sərkisyan bunu yaxşı bilir, çünki ona çoxlu qan və hakimiyyət lazımdır. Qarabağda məhv edilən ermənilərə görə də üzgün deyil. Bu, Serjikin BMT kürsüsündən son çıxışıdır. Güman ki, xal toplamaq, hakimiyyətini uzatmaq üçün bütün çıxışını Qarabağ üzərində qurdu. Ancaq artıq onun qandallanmaq zamanıdır...