Məkan TRT Avaz, proqram “Azerinle Tek Yürek”, ifa edir Azərbaycanın Xalq artisti Azərin, əsər Neşet Ertaşdan “Neredesin sən”, dinləyir ekran başından Rumiyyə Miraslan.

Yəqin ki, bu təqdimatdan sonra həmin an keçirdiyim hissləri, duyğuları sətirlərə tökməyə ehtiyac qalmadı. Ancaq qısa da olsa anlatmaq istəyirəm: 

Həmin an ruhum uçunub, gözlərim yumulmasa belə artıq görmür, qarşımda möhtəşəm bir mənzərə canlanıb. Möhtəşəm səsin, möhtəşəm yorumun bəxş etdiyi mənzərə o qədər möhtəşəmdir ki, anlatması çox çətindir. Sanki ən uca, bütün dünyanı görə biləcəyim bir zirvədəyəm. Əlimi alnıma qoyub dünyanı seyr edirəm. Ürəyim də köksündən çıxacaqmış kimi döyünür, yox, yox, elə ürəyim də dağa dönüb. Ruhum uçunduqca vücudumun ayaqları da yerdən üzülüb göylərdə pərvaz edir. Bütün neqativliklərdən, pisliklərdən uzaqlaşmışam, gərgin iş gününün gətirdiyi yorğunluq da uçub gedib. Sanki anam məni yeni dünyaya gətirib, süd gölündə üzürəm. Sanki dünya bir məndən bir də o möhtəşəm səsdən ibarətdir. Eynən Azan səsini dinlədikdə keçirdiyim hisslər bürüyüb ruhumu, canımı. Bu səsin təsiriylə dünyadan təcrid olunmuşam sanki. Tanrının dərgahına varmaqdayam...

Bu hissləri davam etdirsəm bəlkə də bir neçə cildlik kitab halına düşər. Çünki mən təkcə həmin an deyil, hər dəfə bu səsi dinlədiyimdə eyni hisslər ruhuma hakim kəsilir. O üzdən çox anlatmaq istəmirəm. Bir tək onu qeyd edim ki, bu səs, bu avaz nədənsə hər dəfəsində mənə Böyük Türkü və Türkün Böyüklüyünü xatırladır. Əgər daha öncələr o səsi eşitməsəydim, dinləməsəydim deyərdim ki, belə hiss etməyimə səbəb o səsin yorumladığı “Çırpınırdı Qara dəniz” əsəri olub. Ancaq belə olmadığını dəqiq bilirəm, çünki bu əsəri başqalarının ifasında da dinləmişəm, ancaq sehirli gəlməyib. Dəqiq bilirəm ki, səbəb bu sehrli səsin sahibin özündədir. Təkcə ifası ilə deyil, əsaləti, mədəniyyəti, hətta geyim tərzi ilə belə təpədən-dırnağadək Türk xanımlığını xatırladan Azərin xanımın özündədir bu sehr. Mən bu səsin sehrinə ona görə düşmüşəm ki, hər zaman Türklüyü təbliğ edib, Türklüyü ilə onur duyub, qürur duyub. Çıxdığı ən mötəbər kürsülərdən Türklüyün Tanrının necə şərəfli bir lütfü olduğunu bəyan edib. Qorxmadan, çəkinmədən, cəsaərtlə Türkün düşmənlərinə, Türkü gözü götürməyənlərə meydan oxuyub. Hər zaman da bəyan edib ki, Türkün Türkdən başqa dostu yoxdur! Türk birləşəndə daha güclü olacaq! Türk birləşəndə TURAN olacaq! Mütləq və mütləq bir gün o TURAN qurulacaq! 

Yaxşı yadımdadır, bir neçə il öncə Azərin xanım TRT Avaz kanalında yayımlanan “Avazdan Esintiler” proqramı ilə bir neçə ölkədə yaşayan milyonlarla Türk tamaşaçısının evlərinə virtual olaraq qonaq gəlirdi. Musiqi proqramı olmasına baxmayaraq, Azərin xanım həmin proqramda Türklüyün bütün özəlliklərindən,  tarixindən, mədəniyyətindən, musiqisindən, adət-ənənlərindən tutmuş mətbəxinə, geyiminə qədər təbliğ edirdi. Həmin proqrama bütün türk dövlətlərindən qonaqlar dəvət olunurdur. Azərin xanım bununla da dünyaya bir mesaj verirdi, Türklərin ayrı-ayrı ölkələrdə yaşamalarına rəğmən bir olduğunu, birlik olduğunu göstərirdi. “Avazdan Esintiler”də Azərbaycandan da çağırılmış qonaqlar iştirak edirdi. Bununla Azərin xanım həm də Azərbaycan Türklərinin sayılıb-seçilən insanlarını, xadimlərini dünyaya tanıdırdı. Bir sözlə, Azərin xanım həm də Azərbaycanın Türk dünyasındakı musiqi, mədəniyyət səfiri missiyasını öz üzərinə götürmüşdü. Bunu da çox məharətlə bacarırdı, çünki o bunu kimlərinsə sifarişi ilə yox, öz qanından, canından gəldiyi üçün edirdi və ona görə də çox uğurlu alınırdı. Azərin xanım demək olar ki, proqramın bütün buraxılışlarında efirdən tamaşaçılarına “Dünyanın hansı yerində Türk yaşayırsa, o yer mənim vətənimdir!” deyə səslənirdi. Və bu ifadəsi də əslində Türk dünyasına, dünyada yaşayan bütün türklərə bir mesaj idi. Azərin xanım bununla Türklərə çatdırırdı ki, bizləri sərhədlər ayırsa da Türklüyümüzü unutmamalıyıq, Türk dövlətlərinə yad dövlət kimi yox, öz vətənimiz kimi yanaşmalıyıq. Bütün türk dövlətlərində özümüzü vətənimizdəymişik kimi hiss etməliyik və bunu həmin dövlətin sakinlərinə də hiss etdirməliyik. Dünyada tək öz dövlətimiz adından yox, Türk milləti adından danışmalıyıq. 

Həmin verilişin buraxılışlarının birində Azərin xanım “Ey Turanım!” əsərini səsləndirmişdi və əsərin girişindəki bu sözlər yatmış hisslərimizi, duyğularımızı, bütün varlığımızı yerindən oynatmışdı: “Ey Türk oğlu, ey Türk qızı, oyan, oyan! Keçmişə bax, kəndinə dön! Daha güclü olmaq üçün, daha böyük olmaq üçün oyan, oyan! Tarix yazan babaların haraylayır, Böyük Turan qurmaq üçün. Oyan, oyan! Ey Turanım, biz səninlə gələcəyə gedəcəyik! Biz səninlə min illərə gedəcəyik! Türkün şanlı tarixinə çox zəfərlər səpəcəyik!” İnanın ki, elə bir möhtəşəm əsər idi ki, dinlədikcə damarımdakı TÜRK qanım cuşa gəlmişdi, “keşkə həmən BÖYÜK TURAN uğrunda mübarizəyə atılaq” deyə arzulamışdım.  

Bu günlərdə Azərin xanımı yenidən TRT Avazda və yeni “Avazdan Esintiler” proqramı ilə aparıcılığa qayıtdığını görəndə sözün əsl mənasında ürəkdən sevindim! Sevindim ki, Türk xalqına, Türk millətinə ləyaqətlə xidmət etməyi özünə missiya seçmiş Azərin xanım yaxşı ki, yenidən bu işə başladı. Mayəsi Türkçülüklə yoğrulmuş bu xanım Türk musiqisinə, Türk dünyasına xidmət etmək üçün yaranıb və Türkün şanlı əsgəri olmağı layiqincə bacarır! 

Fikirlərimi burda yarımçılıq kəsib Azərin xanımla internet üzərindən danışarkən proqramı ilə bağlı dediklərini də diqqətinizə çatdırmaq istəyirəm: 

“Bu proqramın əsas vəzifəsi türk dünyasında birliyin, bərabərliyin möhkəmlənməsidi. Proqramda ana vətənim Azərbaycanın şairlərinin, bəstəkarlarının adlarının səslənməsi, korifey sənətkarlarımızın yaradıcılığından nümunələr verilməsi nəzərdə tutulub. Çəkinmədən deyirəm ki,  Azərbaycan -Türkiyə qardaşlığı üçün çox vacib olan proqramdı. Düzdü musiqi proqramıdı, amma çalışıram ki, musiqi ilə də olsa insanlara önəmli mesajlar verim. Tarixi köklərdən gələn birliyimiz, qardaşlığımız sarsılmasın. Heç bir qüvvənin bu birliyə toxuna bilməyəcəyi mənim üçün önəmlidir. Təbii ki, bu fikirləri çalışıram musiqiyə yansıdım. Həm ölkəmi  çox gözəl şəkildə təmsil edim, Azərbaycan musiqilərini tanıdım, oxudum, öyrədim, həm də birliyinin önəm kəsb etməyini xüsusi vurğulayım”.

Məncə, bu sözlərdən sonra mənim yenə nəsə deməyim uğursuz alınar. O üzdən daha heç nə yazmıram. Azərin xanımı, dəyərli sənətkarımızı, Xalq artistimizi Türk dünyasına açılan TRT Avaz kanalında yayımlanmağa başlamış yeni proqramı münasibətilə ürəkdən təbrik edirəm! İnanıram ki, “Azerinle Tek Yürek” də “Avazdan Esintiler” kimi uğurlu olacaq!

P.S. Türk kimliyimizə qara yaxan bədxahlar, vaxtınız olanda “Azerinle Tek Yürek”i dinləyin! Bəlkə kəndinizə gələ bildiniz!