“Allahın müəyyən etdiyi hüdudları aşan kimsə özünə zülm etmiş olar”¦”-Qurani-Kərim, Ət-Talaq, 1.

Allahın Qiyamətədək möhlət verdiyi İblisin biz insanları yoldan çıxarıb ardınca Cəhənnəmə aparmaq üçün yararlandığı ən asan üslublarından biri  bizləri  zahiri bər-bəzəklə, açıq-saçıqlıqla aldatmasıdır. Diqqət edin, son illər Yer üzündə, o sıradan Azərbaycanda da nə qədər göz qamaşdıran, zahiri, kosmetik bər-bəzəkli əşya və tikililər, yersiz, mənasız, hay-küylü tədbirlər və s. peyda olub ki, adamlar görməmiş kimi bu mənasız nəsnələrə baxmaq, onları əldə etmək üçün heç növbəyə də düzülmədən dəhşətli bir basabas yaradıblar. Hətta bu yolda biri-birinin qanını içməyə də hazırdırlar. Ona görə ki, çoxumuz o zahiri bər-bəzəyin mahiyyətini, İblisin və onun əlaltıları olan düşmənlərimizin bunların arxasında nələri gizlətdiyini, bizləri hansı faciələrə sürüklədiyini anlamırıq. Bilmirik ki, başımıza gələn  təbii, siyasi, hərbi, iqtisadi-sosial və s. fəlakətlərin kökündə məhz çox şeydə həddi aşaraq Allahın yolundan çıxmağımız durur. Belə həddini aşmış görməmişliklərimizdən biri də toylarımızda üzə çıxır... Xahiş edirəm, diqqətlə təsvir etməyə çalışdığım mənzərəni təsəvvürünüzə gətirin və düşünün: 

...Müasir(?) Avropa üslubunda - boynu, sinəsi, çiyinləri, kürəyi qurşağa qədər açıq Azərbaycan(?!), müsəlman(?!) gəlini ortalıqda rəqs edir. Yüzlərlə yad insan nəzəri, o cümlədən sərxoş, nəşəli, şəhvətli kişi baxışları bu bakirə(!) qızın gözlərində, yanaqlarında, dodaqlarında, buxağında, boynunda, sinəsində, çiyinlərində, qoltuğunda, kürəyində gəzir... Bəlkə də bəy xaricdə işləyirmiş, vətənə gələn kimi ata-anası zorla evləndirirlər. Və o, gələcək xanımını birinci dəfədir ki, yaxından görür. Ancaq yüzlərlə yad kişi ondan əvvəl gəlinin yarıçılpaq bədəninin zərif yerləri ilə tanış olur... Üç-dörd gün sonra  toyda iştirak etmiş bir tanışı istehza ilə bəyə desə ki, sənin arvadını yaxşı tanıyıram, filan yerində xalı var, bu, ona necə təsir edər? Düşüncəli insan, kişi üçün bundan betər şərəfsizlik, biabırçlıq nə ola bilər?..

Bu günkü toylarımızın Allaha zidliyi, antimilliliyi, haramlığı bununla bitmir... Sərxoş tamada ağzı sulana-sulana şəhvətli baxışlarla ətrafdakı qız ”“gəlinləri süzüb dili topuq çala-çala deyir:”Qaldırın badələri bəyimizlə gəlinimizin sağlığına! Allah xoşbəxt eləsin!..”

Sığallı, tumarlı, saçı boyalı müasir(?) Azərbaycan(?!) bəyi  və yarıçılpaq gəlin ”“ gələcək Azərbaycan anası(?!) badələri toqquşdurub içirlər...

Və yaxud müasir(?!) kiçik toyu ”“sünnəti təsəvvürümüzə gətirək: İçib-dəmlənmiş toy aparıcısı kiçik bəyin  zorla ayaqda duran   atasını qucaqlayaraq araq dolu qədəhi başı üzərinə qaldırıb təntənə ilə elan edir: “... Bu gün daha bir Azərbaycan övladı müsəlman(?!) olur! Gəlin hamımız(!) onun sağlığına içək!..”

Yer üzündəki hər bir insana Ulu Yaradan tərəfindən haram buyrulmuş içki və nemətlərlə yeni bir müsəlman(?!) ailəsinin bünövrəsinin qoyulmasını və ya bir oğlan uşağının müsəlman olmasını qeyd etmək hansı insanlığa, hansı müsəlmanlığa, hansı məntiqə sığır?..

Təki həmişə ellərimizdən, evlərimizdən toy, şənlik sədaları ucalsın! Qoy həmişə xeyir iş olsun! Ancaq nə qədər təzadlı, paradoksal olsa da, xüsusilə, son 70-80 ildəki  və ələlxüsus,  ötən 15-20 ildəki toylarımızın bir sıra fərdi və milli faciələrimizin bünövrəsini qoyması acı bir həqiqətdir... Başlığı oxuyanda çoxları düşünəcək ki, yəqin söhbət  son illər toylarda, yaxud toylardan sonra  baş verən kütləvi zəhərlənmələrin, avtomobil qəzalarının, ölümlərin sayının artmasından gedir. Bunlar hələ “yaxınmənzilli” xırda faciələrdir. Bu dəfə toylarımızda ailələrimizin, nəsillərimizin, millətimizin, xalqımızın, Vətənimizin, bəşəriyyətin gələcəyinə qoyduğumuz onillik, yüzillik “gecpartlayan minalardan” bəhs edəcəyik... Söhbət o bəlalardan gedir ki, onların ön ucu bu dünyada, son ucu Axirətdədir... Nə yazıq ki, insanların çoxu ya Axirətə inanmır, ya da şübhə ilə yanaşır. Odur ki, toylarımızın bu dünyada səbəb olduğu faciələrdən başlayıram...

Axırıncı 10-15 ildə  ana  bətnində, ya doğuş zamanı, ya da bir neçə aylığında uşaq ölümlərinin sayı artır, bir, yaxud iki əzası şikəst, çəpgöz, ürəyi, böyrəyi qüsurlu, kəllə daxili təzyiqlə, qanında mikrobla. şəkərlə  doğulan körpələrin sayı gündən-günə çoxalır. Niyə? Səbəb nədir? Tibb alimləri, həkimlər, sosiloqlar çoxsaylı sosial, psixoloji, tibbi-ginekoloji səbəblər sadalayırlar. Bunlar da həqiqətdir və çoxu bilavasitə toy günü, zifaf gecəsi ilə əlaqədardır. Ancaq əsl səbəblər əksəriyyətin diqqətindən kənarda qalan mənəvi-ruhi aləmdə gizlənir. Bunlar Yaradan ”“ Allah-təala qarşısında etdiyimiz çoxsaylı günah və xətalarımızdır. Bunu Allah Öz Kitabında da təsdiqləyir: “Sizə üz verən hər bir müsibət öz əllərinizlə qazandığınız günahlarınız ucbatındandır” (Qurani-Kərim, Əş-Şüəra surəsi, 30-cu ayə).

Müasir dövrümüzdə Allah qanunları ikinci-üçüncü dərəcəli hesab olunan ölkələrdə, o cümlədən Azərbaycanda həmin günah və xətaların xeyli hissəsi də məhz toy-nişan, kiçik toy məclislərində baş verir. Xeyir məclislərimizdə, onlara hazırlıq zamanı   və sonra müşahidə etdiyim günah və xətaları sadalayıb, izahatlarını verməyə çalışacağam. Kim hansı fikrimlə razı deyilsə, buyursun...

Birincisi, əksər ata-analar övladlarına ömür-gün yoldaşı seçərkən Qurani-Kərimdə, hədislərdə göstərilən halallıq qaydalarına əməl etmir, var-dövlətə, zahiri tərbiyə və gözəlliyə, ali savada, yaxşı vəzifəyə-filana və s. üstünlük verirlər...

Peyğəmbərimiz buyurur: “Ey kişilər! Özünüzü zibillikdə göyərənlərdən qoruyun, onlardan uzaq olun!” Soruşurlar: “Ya Rəsulallah! Zibillikdə göyərənlər nədir?” Həzrət buyurur: “ O gözəl qızdır ki, ailədə pis tərbiyə alıb”... Başqa bir hədisində Rəsuli-Xuda tövsiyə edir: “ Hər kəs sizin qapınıza qız almağa gəlsə, əgər onun əxlaqını və dinini bəyənsəniz(!), o zaman ona qız verin. Yox, belə olmazsa, yer üzünü fitnə-fəsad bürüyər”...

Ən ciddi məsələlərdən biri gələcək kürəkənin haram içkilərdən uzaq olmasıdır. Təəssüf ki, məmləkətimizdə kişilərin böyük  bir qismi şərabxordur. İmam Sadiqin(ə) Rəsulallahdan nəql etdiyi bir neçə hədisdə belə buyurulur:

“Hər kəs şərabı Allah-təalanın mənim dilimlə haram etməsindən sonra içərsə, layiq deyildir ki, sizə elçiliyə gələrkən ona qız verəsiniz”...

****

“Hər kəs öz qızını şərab içənə ərə verərsə, o öz qızını zina etmək üçün evdən çıxaran şəxsə bənzəyir”...

****

“Hər kəs öz qızını şərab içənə ərə versə, onunla qohumluq əlaqələrini kəsmişdir”...

Sələmdən, rüşvətdən, xalqa zülmdən, narkotikdən və s. qazanılmış pulla toy edilən cütlük xoşbəxt olarmı?

İkincisi, toy-nişan mərasimləri üçün xərclənən pulların haram-halallığına diqqət edilmir. Rüşvət, qumar, spirtli içki, narkotik satışı , oğurluq,  eləcə də sələmə borc verməklə və ya götürməklə əldə edilən  gəlirlə toy, xeyir iş keçirmək haramdır. Və bunun fəsadları həm bu, həm də o biri dünyada özünü göstərməlidir... 

Üçüncüsü, xüsusən əyalətlərimizdə çox əndrəbadi bir adət var: toydan bir gün qabaq “ciyər axşamı” deyilən bir mərasim keçirilir; iştirakçılar: yaxın qohum-əqrəba, qonum-qonşu haram içkilərlə bəy və gəlinə, onların ata-anasına “xeyir-dua”, “halallıq” verirlər... Üstəlik, cavanlar həmin gecəni yatmayıb səhərədək yenə də şərab içə-içə qumar oynayırlar... Çox vaxt da bu möhtəşəm  “ciyər axşamı” içməkdən ciyəri yananların davası ilə başa çatır...  

Allah-təala Qurani-Kərimdə spirtli içkilərlə bərabər qumarın da haram olmasını açıqca bildirir:”Ey iman gətirənlər! Şərab, qumar, bütlər, fal və şans oxları şeytan işlərindən və pisliklərdən biridir; bunlardan uzaq durun ki, bəlkə səadətə çatasınız. Şeytan içki və qumar yoluyla aranızda düşmənçilik və kin törətmək, sizi Allahı anmaqdan və namazdan uzaqlaşdırmaq istər. Artıq bu işlərə son qoyacaqsınızmı?”(Maidə, 90-91)..

Dördüncüsü, xeyir məclislərimizdə masaların üzərini cürbəcür haram içkilər ”“ araq, çaxır, viski, konyak, pivə və s. “bəzəyir”. Əksəriyyət də doyunca  həmin içkilərdən qəbul edib toy yiyəsindən “razı gedir”... Və  bəylə gəlin də şampan içirlər,  hətta bəzən bəy “kişilənə-kişilənə” dostları ilə bir “yüz-yüz” araq da vurur... Bayaq qeyd etdiyim kimi, tamadanın “yüksək səviyyədə” təşkilatçılığı ilə  yeni ailə cütlüyünün  bütün doğma və əzizləri, dost-tanışları onların sağlığına(!) içir, “xeyir-dua” verirlər. Təbii ki, bu cür məclisdə Allahın, Peyğəmbərin(ə.s) adı dəfələrlə çəkilsə də, faydası olmaz. Yəni Yaradan həmin məclisdən və onu təşkil edənlərdən nəinki razı qalar, əksinə, onlara  kəskin qəzəbi tutar...

İmam Cəfər Sadiqin (ə.s.) rəvayət etdiyinə görə, Rəsuli-Əkrəm buyurmuşdur: “ Bir dəstə camaat bir məclisdə toplaşarkən, Allahı zikr etməzsə və Mənə salavat göndərməzsə, həmin məclis onlar üçün bir həsrət, intizar olacaq və faciəvi sonluq gətirəcəkdir”...

Bəziləri iddia edir ki, ətrafdakılar içir-içsin, bəy və gəlin özləri spirtli içki qəbul etmirsə, onlara bunun heç bir zərəri yoxdur. Bəlkə kimlərsə gələcək ata-anaların zifaf gecəsindən öncə spirtli içkilər qəbul etməsinə haqq qazandırmaq və həmin içkilərin  onların övladlarının ruhi-psixoloji, fizioloji qüsurlarla doğulmasına şərait yaratmasını da inkar etmək istəyir?Həqiqət isə ondadır ki, hətta özləri içməsələr belə, məclisdəki onlarla, yüzlərlə insanın qəbul etdiyi cürbəcür şər(!) ablardan ətrafa uçan spirt buxarları udduqları hava ilə bəy və gəlinin orqanizminə daxil olur və öz şər təsirini göstərir....

Almaniyalı tibb alimləri spirtli içkilərin genefonda, insan nəslinə təsiri ilə  bağlı araşdırmalar nəticəsində sübut etmişlər ki, bu haram içkilərin acınacaqlı təsiri hətta onlardan istifadə etməyən üç nəslə qədər davam edir... Amerikalı alim-doktor Palin deyir ki, hər sağlam kişidən ən azı 3-4 sağlam övlad dünyaya gələ bilər. Halbuki, spirtli içkiləri qəbul edən bir çox insanlardan sağlam övladlar doğulmur... Hətta var-dövləti yerə-göyə sığmayanlar yeni bir “müasirlik” edib məclisdə bəylə gəlini şüşə içərisində əyləşdirsələr belə, yenə də həmin məclis Allaha zidd hesab olunacaq...Çünki orada Allah qanunları pozulur və bunun günahı-cəzası məclisin bütün iştirakçılarının, xüsusən də toy sahiblərinin, ata-anaların, bəy və gəlinlərin, onların gələcək övladlarının bu dünyadakı və axirətdəki talelərinə yazılır...

Peyğəmbərimizdən nəql edilən bir hədisdə  belə buyurulur:”Bihuşedici  içkilər qoyulan və içilən süfrə başında oturmaq , hətta hər hansı bir şəxs özü onlardan içməsə belə, ümumiyyətlə, haramdır. Bir sözlə, belə süfrədən təam yemək haramdır”...

Onu da nəzərinizə çatdırım ki. Allah-təala bihuşedici içkini yalnız Qurani-Kərimdə deyil, əvvəlki səmavi kitablarda ”“ yəhudilərin Tövratında, xaçpərəstlərin İncilində də qadağan edir. İshahın 20-ci ayəsində deyilir:”Şərab içənlərin arasında olma!”..

Kitabın 39-cu ayəsində isə buyurulur: “Bədbəxtlik kimin üçündür? Müharibə və dava-dalaş kimin üçündür? Qəm-qüssə və acı ruzigar kimin üçündür? Yəni bir kəs özünü və ya başqalarını sərxoş olaraq yaralasa, yaxud öldürsə, yaxud  başqa bir çirkin iş  törətsə, bütün hallarda bədbəxtlik və fəsad o kəslər üçündür ki, onlar şərab içənlərdəndirlər”...

Rəsulumuzun(ə.s.) bu kəlamı düşünənlər üçün daha ibrətamizdir:”Bihuşedici içki içən Şeytanın gəlinidir”... Əcəba, qızımızın Şeytanın gəlininin gəlini olmasını və ya əksinə, Şeytanın gəlinini oğlumuza gəlin etmək istərikmi? Düşünək...