Oktyabrın 19-da Azərbaycan Dövlət Neft və Sənaye Universitetinin (ADNSU) "Gənclik" mahnı və rəqs ansamblının təmirdən sonra yeni məşq zalının açılışı olub. Açılışda ADNSU-nun rektoru, professor Mustafa Babanlı, prorektorlar, professor-müəllim heyəti və universitetin tələbələri iştirak edib.

Rektor, Mustafa Babanlı rəmzi qırmızı lenti kəsdikdən sonra yeni zal ilə yaxından tanış olub. Tədbir iştirakçılarını salamlayan rektor ansamblın bədii rəhbəri, əməkdar artist Sənan Hüseynova və yeni zalın ərsəyə gəlməsində əməyi keçən hər kəsə öz təşəkkürünü bildirib.

""Gənclik" Azərbaycanda analoqu olmayan ansambldır. Bu kollektiv universiteti, eyni zamanda ölkəmizi dünyada təmsil edərək bunu hər dəfə sübut edir. Bu səbəbdən biz sizin üçün ən gözəl və ən yüksək keyfiyyətli şəraiti yaratmalıydıq və yaratdıq. Sizi əmin edə bilərəm ki, bu zal ən böyük rəqs kollektivlərinin məşq etdiyi zallardan geri qalmır, hətta onlardan daha yüksək şəraitə malikdir. Nəhayət ki, "Gənclik" layiq olduğu yerinə qovuşdu- deyə rektor vurğulayıb.

"Gənclik" mahnı və rəqs ansamblının bədii rəhbəri, Sənan Hüseynov diqqət və qayğısını heç vaxt kollektivin üzərindək əskik etmədiyi üçün Mustafa Babanlıya öz minnətdarlığını bildirib. Hətta peşəkar ansambllarda belə bu cür məşq zalının olmadığını qeyd edən S.Hüseynov bundan sonra kollektivin daha böyük uğurlar qazanmalı olduğunu bildirib. Daha sonra bədii rəhbər ansamblın repertuarında baş verən yeniliklərdən danışıb.

Rəsmi hissə bitdikdən sonra "Gənclik" mahnı və rəqs ansamblı rəqs nümunələri ilə çıxış edib.

“Gənclik” mahnı və rəqs ansamblı Azərbaycanın ən uğurlu milli rəqs ansambllarından biridir. Yarıməsrlik tarixə malik bu ansambl 1965-ci ildə rəsmi olaraq fəaliyyətə başlayıb. Ancaq “Gənclik” dərnək kimi daha əvvəldən fəaliyyət göstərib. Ansamblın bədii rəhbəri, əməkdar artist Sənan Hüseynovdur. Son 7 ildə ADNSU-nun ansamblı “Təhsil Nazirliyi” və “Gənclər və İdman Nazirliyi”nin təşkil etdiyi bütün müsabiqə və festivallardan birincilik əldə edərək geri dönür. 2012-ci ildə Cənubi Koreyada 54 ölkənin iştirakı ilə keçirilən “Dünya Folklor Rəqslərinin Olimpiyadası” festivalında 17 günlük səfərdə olan ansambl burada Azərbaycanı təmsil edən yeganə rəqs kollektivi olub. Məhz buradakı uğurlu çıxışından sonra heyət Amerikanın Kaliforniya ştatında hər 4 ildən bir keçirilən dünya festivalının 2016-cı ilki nümayişinə dəvət alıb. Kollektiv 2013-cü ildə Rusiya, Türkiyə və Tatarıstanda səfərdə olub. 2015-ci ildə isə Almaniyada keçirilən “Milli Folklor Rəqs” festivalında “Beynəlxalq Milli Rəqslər” konsert proqramı ilə iştirak edib. Ansamblın onlarla fəxri diplom və medalları var. 2016-cı ilin aprel ayında “Gənclik” Tələbə baharı” Ümumrespublika tələbə yaradıcılıq festivalının birincisi olub. Həmin ilin may ayında Azərbaycan Respublikasının Ümummilli Lideri Heydər Əliyevin anadan olmasının 93 illiyinə həsr olunmuş “Ali Məktəb Tələbələrinin Bədii Yaradıcılıq” Festivalında da “Gənclik” birinci yeri qazanıb. 2016-cı ildə ilk dəfə keçirilən “Qəmər Almaszadə” adına Beynəlxalq Festivalda da ADNSU-nun “Gənclik” mahnı və rəqs ansamblı Azərbaycan kollektivləri arasında ən yüksək mükafata layiq görülüb. Dünya rəqs kollektivləri arasında isə

ikincilik qazanmaqla ansambl fəaliyyətini sıradan özfəailiyyət çərçivəsində deyil, peşəkar səviyyədə apardığını bir daha sübut edib.