“Rus mediasının təxribatını önləmək üçün düşüncə mərkəzi yaradılmalıdır”

Aprelin 2-dən etibarən Azərbaycan-Ermənistan qoşunlarının təmas xəttində vəziyyətin gərginləşməsi, düşmən hücumunu dəf edən ordumuzun əks-hücumla bəzi kənd və yüksəklikləri düşməndən azad etməsi Rusiyanın ciddi narahatlığına səbəb olub. Ənənəvi forpostunun açıq-aşkar məğlubiyyətə düçar olduğunu görən Rusiya, Ermənistanın rüsvayçı məğlubiyyətini pərdələmək, Azərbaycan cəmiyyətindəki yüksək vətənpərvərlik əhval-ruhiyyəsini, döyüş əzmini gizlətmək, pozulan atəşkəsə görə məsuliyyəti Azərbaycanın üzərinə yıxmaq üçün rus KİV-lərinin vasitəsi ilə anti-Azərbaycan təbliğatına start verib. Rusiyanın aparıcı KİV-lərində Azərbaycanı gözdən salan, ictimai fikri çaşdıran yanlış, təxribat xarakterli informasiyalar tirajlayan Kreml, bununla sadəcə rus ictimaiyyətinə deyil, dünya ictimaiyyətinə heç bir əsası olmayan, təhrif edilən məlumatlar çatdırmaqdadır.

Maraqlıdır, Rusiya KİV-lərinin informasiya təxribatımı de-şifrə etmək, bu təxribatın qarşısını almaq üçün Azərbaycan tərəfi konkret olaraq hansı addımlar atmalıdır? Rusiya mediasının anti-Azərbaycan təbliğatına qarşı mübarizəni kim necə aparmalıdır? Bu mübarizənin əsas yükü Azərbaycan mediasının, Rusiyadakı azərbaycanlı diasporunun, yoxsa rəsmi dövlət qurumlarının üzərinə düşür?

Məsələ ilə bağlı Moderator.az-a açıqlama verən media ekspert Elçin Şıxlı Rusiya mediasının Azərbaycanla bağlı siyasətinin arzuedilməz olduğunu, qərəz üzərində formalaşdığını bildirdi:

“Rusiya KİV-lərinin Azərbaycanın xeyrinə hər hansı bir informasiya təqdim etdiyini yadıma sala bilmirəm. Onlar həmişə qərəzli olublar. Suriya olayları ilə bağlı Türkiyəyə qarşı da qərəzli münasibət sərgilədilər. Ondan öncə isə Ukrayna olayları ilə əlaqədar olaraq Ukraynaya qarşı belə bir qərəzli münasibət ortaya qoyuldu. Ümumiyyətlə, KİV-lər ictimai tələbi, ictimai sifarişi yerinə yetirir. Bu baxımdan Rusiya cəmiyyyətinin əksəriyyəti hesab edir ki, dünyada ruslardan gözəl, onlardan daha üstün ikinci bir millət yoxdur. Odur ki, onlar Dağlıq Qarabağ problemi ilə bağlı məsələyə də yalnız öz nöqteyi-nəzərlərindən yanaşırlar. Ruslar hər zaman ermənilərin tərəfində olublar. Dağlıq Qarabağ və onun ətrafındakı rayonları da işğal edən erməni yox, rusların özü olub. Əgər Rusiya ermənilərin arxasında durmasaydı, ermənilər ömürlərində belə bir şey edə bilməzdi”.

E.Şıxlı hesab edir ki, Rusiya KİV-lərinin Azərbaycanla bağlı qərəzli informasiya siyasətinə qarşı sistemli mübarizə aparmaq, bu mübarizəni vahid mərkəzdən koordinasiya etmək lazımdır:

“Rusiya KİV-lərinin Azərbaycana qarşı qərəzli təbliğatına gəlincə, bu təbliğata qarşı hamı ”“ həm Azərbaycan mediası, həm ölkəmizdəki rəsmi dövlət qurumları, həm də Rusiyadakı Azərbaycanın diaspor təşkilatı bir yerdə, mərkəzləşdirilmiş, qarşılıqlı şəkildə uzlaşdırılmış halda həyata keçirməlidir. Bu, Rusiya KİV-nin informasiya təxribatına qarşı səmərəli mübarizə baxımından zəruridir. Heç kim ayrı-ayrılıqda informasiya müharibəsi aparmamalıdır. Normal, məntiqli və operativ qərarlar verən düşüncə mərkəzi olmalıdır. O mərkəzdə strateji plan hazırlanmalıdır və bu plana uyğun olaraq sadaladığımız strukturlar, tərəflər öz işini qurmalıdır”.

Seymur Əliyev