“Türkmən qətliamı ilə bağlı ilk səsini qaldırması gərəkən dövlət Azərbaycan idi”

Rusiyanın Suriyadakı türkmən məskənlərini bombalaması Türkiyənin ciddi etirazına səbəb olub. Baş verən hadisədən sonra Rusiyaya rəsmi nota təqdim edən Türkiyə, beynəlxalq ictimaiyyətin də diqqətini məlum prosesə cəlb etmək istiqamətində konkret addımlar atmaqdadır.

Maraqlıdır, Türkiyənin baş verənlərə operativ şəkildə reaksiya verdiyi bir vaxtda istər Azərbaycan, istərsə də digər türk dövlətlərinin Suriyadakı türmən qətliamını susqunluqla qarşılaması nə dərəcədə məntiqlidir? Həqiqətənmi türk dövlətlərinin bu məsələdə edə biləcəyi heç nə yoxdur?

Məsələ ilə bağlı Moderator.az-a açıqlama verən AMEA-nın Tarix İnstitutunun aparıcı elmi işçisi, tanınmış pedaqoq-tarixçi Dilavər Əzimli baş verənlərlə bağlı bütün türk dünyasının ayağa qalxmasının vacib olduğunu bildirib:

“Əslində, bu məsələdə Azərbaycan ilk olaraq səsini qaldırmalıydı. Məsələ ondadır ki, orada həlak olanlar bizlə eyni mənşədən olan türklərdir. Bizim kimi danışırlar. Oranın ən qədim sakinləridirlər. Qəribədir, sanki onlar bizdən deyillər. Sağ olsun, Türkiyə! Allah bayrağını uca etsin! Türkün ümid qapısı! Türk-müsəlman dünyasının hamisi! Azərbaycan iqtidarı bu mənada heç olmasa Türkiyəni dəsdəkləməlidir. Qafqaz Müsəlmanları İdarəsi də səsini çıxarmır. Sanki orada həlak olanlar müsəlman deyillər. Cənibi Azərbaycan türkləri İranda ələ salınır, susuruq. Suriya türkmənləri bombalanır, susuruq! Sonra da Dünya Azərbaycanlıların Həmrəyliyini bayram edirik. Bu necə həmrəylikdi? Həmrəylik oxuyub-oynamaqdan ibarət deyildir. Həmrəylik boğazdan yuxarı şənliklər keçirməkdən ibarət deyildir. Dünyanın bütün azərbaycanlıları Azərbaycan Respublikasına böyük ümidlə baxır.

Demirik ki, Rusiyaya qarşı müharibə elan elə. Heç olmasa, münasibət bildir ki, Suriyada türkmən genosidindən əl çək!”

D.Əzimlinin bildirdiyinə görə, çağdaş dünya öz haqqını tələb edən, öz haqqı uğrunda mübarizə aparan xalqlara rəğbətlə yanaşır və daha çox bu qəbildən olan toplumlara dəstək durur:

“Bilirsiz, dünyada kimə hörmət edirlər? Səsini yüksəldən xalqlara, dövlətlərə! Təsəvvür edin ki, bu cür münasibət ermənilərə, yəhudilərə qarşı edilsəydi, nələr olardı! Bütün dünyanı ayağa qaldırardılar. Bizdə isə televiziyalarda Suriya türkmənlərini də az qala rusların dili ilə terrorçu adlandırırlar. Yazıqlar olsun! Görəsən bizim qədər dünyada yazıq halına salınan millət varmı? Bunun bir günahı da ziyalılarımızdadır. Səslərini çıxarmırlar. Amma yaltaqlanmaq üçün növbəyə dururlar. Bir ad almaq üçün nələrə getmirlər... Təbii ki, bu cür ziyalısı olan bir millət bu gündə olacaqdır. Amma Türkiyədə belə deyildir. Mən onların televiziyasını izləyirəm. Hər gün Suriya türkmənlərindən reportajlar verirlər. Biz isə yatmışıq. Çox təəssüf!”

Seymur Əliyev