Donbas muzdlularının Qarabağa axını Azərbaycana nə vəd edir?

Son vaxtlar rəsmi İrəvanın təşəbbüsü ilə Donbasdakı muzdluların Qarabağda yerləşdirilməsi ilə bağlı ölkə KİV-ində narahatverici məlumatlar yer almaqdadır. İddiaya görə, Donbasdakı muzdluların Qarabağ gətirilməsində məqsəd sadəcə təmas xəttinə nəzarət etməkdə çətinlik çəkən erməni ordusunun  insan resursuna olan tələbatı ödəmək deyil, həm də Ukraynada döyüş təcrübəsi keçən bu döyüşçülərin savaş təcrübəsindən Azərbaycan ordusuna qarşı istifadə etməkdir.

Maraqlıdır, Donbas, eləcə də dünyanın müxtəlif ölkələrindən Qarabağa muzdluların gətirilməsinin qarşısını almaq üçün rəsmi Bakı siyasi-diplomatik müstəvidə hansısa addımlar atmalıdırmı? Yoxsa əsas diqqət Azərbaycan ordusunun döyüş hazırlığının yüksəldilməsi yönəldilməlidir? Ümumiyyətlə, başlanması an məsələsi olan Qarabağ savaşında muzdlular iştirakı müharibənin nəticəsinə nə kimi təsir göstərə bilər?

Məsələ ilə bağlı Moderator.az-a açıqlama verən tanınmış ictimai-siyasi xadim Aqil Səmədbəyli problemin həlli üçün Azərbaycanın bütün imkanlardan bəhrələnməsi gərəkdiyini vurğulayıb: “

Azərbaycan həm Qarabağa gətirilən muzdlularla bağlı beynəlxalq səviyyədə məsələ qaldırmalı, həm də paralel olaraq ordunu gücləndirməlidir. Bu yaxınlarda müdafiə nazirimiz Zakir Həsənov dedi ki, ordumuz bir həftəyə Qarabağı alar! Səmimi şəkildə deyirəm, mənim üçün önəmli olan torpaqlarımızın işğaldan azad olunmasıdır. Bunu hansı ali baş komandan edəcəksə, o da bizim Milli Qəhrəmanımız olacaq!

Rusiyanın son zamanlar yürütdüyü siyasət Azərbaycanın gələcəyinə təhlükə yaradır. Çox təəssüf ki, bizim mövcud iqtidar bu təhlükəni önləmək üçün yetərli tədbir görmür. Nəzərə almaq lazımdır ki, torpaqlarımızın işğal sürəsinin uzanması bizim əleyhimizə işləyir.

Keçən hər gün bizim müharibə yoluyla torpaqlarımızı işğaldan azad etmək şansımızı azaldır! Bunu nəzərə alaraq, çox uzatmadan ölkəmizin bütün gücünü səfəbər edərək, ordumuzu maksimum gücləndirərək torpaqlarımızı azad etməliyik! Qarabağla bağlı Minsk qrupunun tərkibinə də dəyişiklik edilməlidir. Format belə olmalıdır: ABŞ-Türkiyə-Rusiya-İran”.

Seymur Əliyev