“Rejissor Mirbala Səlimli yeni il tamaşasında mənə rol vermişdi, mən də “Qız yükü” serialında çəkilirdim. Serialın bitməsinə 2 gün qalmışdı, ondan icazə istədim. İcazə vermədi, mənə dedi ki, gedirsənsə ərizəni yaz get. Mən də ərizəni yazıb teatrı tərk etdim”

 

Bu sözləri bir neçə gün əvvəl Moderator.az-a açıqlamasında tanınmış aktrisa Sovqat Səmədova bildirmişdi.

 

Moderator.az məsələdə adı hallanan əməkdar incəsənət xadimi, Şəki Dövlət Dram Teatrının baş rejissoru Mirbala Səlimlinin də fikrini öyrənib.

 

“Bu hadisə 2011-ci ildə baş verib. Mən çox təəssüflənirəm ki, Sovqat xanım buna belə qiymət verir. Niyə görə? Ona görə ki, Sovqat xanım o vaxt təqaüddə idi. O təqaüddə ola-ola onu teatrda saxlamışdıq. Çünki bu teatra gəncliyini hərs etmişdi, onu uzaqlaşdıra bilməzdik. Halbuki qanunlara görə bu düz deyildi. Bilirsiniz ki, insanın təqaüd yaşı çatdısa o iş yerini tərk etməlidir. Sovqat xanımın təqaüdündən lap çox keçmişdi, dəqiq deyə bilmərəm ki, neçə il? Özü də artıq Şəkidə yaşamırdı, Bakıda ev tikdirmişdi. O Şəkidən Bakıya köçəndən sonra tamamilə həyatını seriallarla bağladı. Bizim teatrın bütün aktyorları seriallarda çəkilir və yenidən teatra qayıdır. Özləri Bakıda ola-ola adları heç vaxt teatrda getmir. Amma Sovqat xanım artıq Şəkidən Bakıya köçmüşdü. Mənim fikrim budur ki, aktyorun təqaüdə çıxmağının önəmi olmamalıdır, amma qanun hamı üçün qanundur. Çünki onların teatrda olması bir məqam üçün də yaxşıdır ki, sən məcbur olub qoca obrazı cavan aktrisaya vermirsən. Hərə öz yaş həddinə uyğun olan obrazı oynayır” deyə rejissor bildirib.

 

Mirbala Səlimli həmçinin Sovqat xanımla şərt kəsdiyini də bildirib.

 

“Sovqat xanım artıq Şəkidən də köçdü. Şəkiyə o çox nadir hallarda gəlirdi. Mən onunla bir şərt kəsmişdim ki, o halda gedib seriallara çəkilə bilərsən ki, bizə lazım olan halda qayıdıb gələsən. Ona mən yeni il tamaşasında küpəgirən qarı obrazı vermişdim. Bu obraz da əsas obrazlardan biridir. Yeni il üçün nəzərdə tutulan yolka tamaşası 10 gün içərisində oynanılır, təhvil verilir. Biz tamaşanı hazırlamayıb, dayanıb Sovqat xanımı gözləyə bilməzdik. Hər hansısa bir tamaşanın vaxtını gecikdirmək olar, yolka tamaşası axı gözləmir! Deyir ki, məni gözləyin, necə gözləyək səni? Ona söz belə deyilmişdi. Biz onu çox gözlədik, özünə haqq qazandırmaq üçün yalandan deyir ki, 2 gün icazə almışdım. O həm də paralel olaraq müqavilə ilə artıq Bakı Uşaq və Gənclər Teatrında işləyirdi. Çox istərdim ki, ona bir faktı da xatırladasınız. Biz o zaman Mirzə Fətəli Axundov adına kinoteatrda məskunlaşmışdıq, öz teatrımızda təmir gedirdi. Mənim orada balaca bir otağım var idi. Otağa gəldi və dedi ki, Mirbala müəllim, mən eşitmişəm ki, siz təqaüddə olanları çıxarırsınız. Dedim ki, xeyr, biz heç kimi çıxarmırıq! Biz həmçinin də onu çıxartmamışıq. Yaşlı aktrisa olduğu üçün biz bəzi şeylərə göz yumub, onun üçün həmin şəraiti yaratmışdıq. Amma çox təəssüf! Mən indi çox təəssüflənirəm! Bilirsiniz nəyə görə? Mən bu şəraiti yaradıram və üstündən uzun illər keçir, belə reaksiya verir! Onun kimi yaşlı aktyorlar bizdə indi də işləyirlər, rolları da var və teatrımıza müvəfəqiyyətlə xidmət edirlər. Hətta biz pandemiyadan əvvəl Mədəniyyət  Nazirliyinə məktub yazıb, xahiş etmişdik ki, bizim teatrımızda fəxri adı olan bir neçə sənətkar var ki, yaşlıdır, amma tamaşalarımızda müvəffəqiyyətlə çıxış edirlər. Çox istərdik ki, onlar bizimlə çalışsınlar. Çox sağ olsunlar ki, həmin sənətkarlara şərait yaratdılar” deyə rejissor bildirib.

 

Baş rejissorun aktrisa ilə münasibətlərini də xəbər aldıq.

 

“Sovqat xanımla bu illər ərzində çox gözəl münasibətlərim olub. Onun nəvələri də bu teatrda uşaq rolları oynayırlar. Mən tərəfdən ona hər zaman gözəl münasibət göstərilib. Əgər Sovqat xanımın içərisində mənə qarşı inciklik qalıbsa bunu deyə bilmərəm. Hər kəs həyatda öz insafına görə yaşayır. Mən o vaxt real olan vəziyyətə hərəkət etmişəm” deyə Mirbala Səlimli bildirib.

 

Sovqat Səmədovanın saytımıza verdiyi açıqlamanı olduğu kimi təqdim edirik.

 

““Qız yükü” serialının sonuncu çəkilişləri idi, Biləsuvara çəkilişə gedirdim. Yolda olanda Şəki Dövlət Dram Teatrının baş rejissoru Mirbala Səlimlinin katibəsi zəng edib mənə  dedi ki, sabah səhər saat 10-da teatrda olun. Gecə ilə çəkiliş bitər-bitməz çıxıb getdim teatra. Mirbala gəldi, dedim ki, Mirbala gəlmişəm, çağırmısan, nə iş var? Dedi ki, yeni ilə tamaşa hazırlayıram, sən küpəgirən qarını oynayacaqsan. Dedim ki, mənim gözüm üstə, ssenarini ver. Ssenarini aldım yazdım, günorta mənə serialdan zəng etdilər ki, sonuncu çəkilişdir, bir gün gəl çəkil get, artıq serialı bağlayırıq. Dedim ay Mirbala, mən ssenarini yazmışam, uşaqlar hələ heç başlamayıb, mənə 2 gün icazə ver. Mirbala da o vaxt çox əsəbi idi, dedi ki, olmaz! Dedim ay Mirbala, bu serialdır, mən mütləq getməliyəm, serial efirə getməlidir. Yenə də dedi ki, olmaz! Truppa müdirinə dedim, direktorla danışdım, yenə də mənə icazə vermədilər. Etmədim tənbəllik, Mirbalanın yanına gəlib yenə də ona yalvardım, dedim ki, iki gün icazə nədir ki, sən onu mənə vermirsən?! Dedi ki, gedirsənsə ərizə yaz get. Mən də ərizəni yazıb, truppa müdirinə verib, çıxıb gəldim. Bakıya gələndə İntiqam müəllim dedi ki, səni işə götürmüşəm, bu gündən etibarən Bakı Uşaq və Gənclər Teatrının işçisisən” deyə bildirib.