Böyük Britaniya Ukraynanı özünün “yer-yer” tipli raketləri, eləcə də digər ölümcül silah növləri ilə təmin edə bilər.

Moderator.az xəbər verir ki, bu barədə “The Times” qəzeti yazır. Qeyd olunur ki, bu, iki ölkə arasında bu qəbildən olan ilk sövdələşmə olacaq: qəzetin yazdığı kimi, London və Kiyev “Şimal axını-2” layihəsinin işə salınması ilə Rusiyanın  Ukraynaya qarşı təcavüz edə biləcəyindən narahatdı, çünki artıq Rusiyanın Ukrayna ərazisinədən qaz tranzitinə ehtiyacı olmayacaq.

“The Times” yazır ki, İngiltərə ilk dəfə olaraq silahlarının Kiyevə tədarükü ilə bağlı Ukrayna ilə danışıqlar aparır. Qəzetin qeyd etdiyi kimi, danışıqlar Rusiyanın mövcud qaz böhranından istifadə edərək  yeni ərazilər ələ keçirə biləcəyi narahatlığı fonunda aparılır.

Planlara görə Böyük Britaniya Ukraynaya özünün “yer-yer” tipli raketlərini, eləcə də döyüş təyyarələri üçün raketlər verəcək. Ukraynalı bir diplomatın fikrincə, Rusiya ilə qarşıdurmada hər hansı bir gərginlik Avropa təhlükəsizliyi üçün “gözlənilməz nəticələrə” səbəb ola bilər.

Nəşrin anonim mənbələrə istinadən yazdığına görə, İngiltərə və Ukraynada hesab edirlər ki, tranzit rolu oynadığı üçün və silahlı qüvvələrinin müqaviməti səbəbindən Rusiya Ukraynanın qalan ərazilərini ələ keçirməyə cəhd etməyib. Lakin indi “Şimal axını-2”-nin işə düşməsi ilə Avropaya qaz tədarükü tamamilə Rusiyadan asılı olacaq və Moskvanın Ukraynanın vasitəçiliyinə daha ehtiyacı olmayacaq.

Ukraynalı diplomatlardan birinin sözlərinə görə, Kiyev Rusiyanın qışda Donbasda hərbi əməliyyat keçirməyi planlaşdırmasından ehtiyat edir. Diplomat hesab edir ki, “Qərb-2021” hərbi təlimləri qarşıda gözlənilən münaqişəyə hazırlıq idi. “Onlara Krım yox, bütün Ukrayna lazımdır, çünki tarixin, dinin və mədəniyyətin ürəyi Moskvada deyil, Kiyevdədir”, - deyə “The Times” diplomatın sözlərini sitat gətirir.

Qəzet yazır ki, Böyük Britaniya daha əvvəl öz hərbçilərini  Ukraynaya təlim məşqlərə göndərsə də, raketlərin tədarükü ilə bağlı mümkün razılaşma Britaniyanın öldürücü silahlarının Kiyevə çatdırılmasında bir ilk olacaq. Bundan əvvəl İngiltərə Ukraynaya ilk yardım çantaları, gecə görmə cihazları, dəbilqə və GPS qurğuları kimi avadanlıqlar verirdi. Qeyd olunur ki, Böyük Britaniya Ukrayna donanmasını iki minaaxtaran gəmi və səkkiz raket gəmisi ilə də təchiz edə bilər. Bundan əlavə, “Brimstone” “hava-yer” tipli raketlərin tədarükü imkanları müzakirə edilir.

Nəşr xatırladır ki, Avropa ölkələri əvvəllər Rusiya ilə münaqişədə həmişə Ukraynanı dəstəkləyiblər, lakin vəziyyətin gərginləşməsindən ehtiyat edərək heç vaxt Kiyevi öldürücü silahlarla təmin etməyiblər. İndi İngiltərənin Ukraynaya raket tədarük etmək niyyəti Londonun Moskvaya müttəfiqinə özünü müdafiə etməkdə köməyə hazır olduğu xəbərdarlığı kimi başa düşülə bilər.

“The Times” yazır ki, bəzi britaniyalı analitiklər hesab edir ki, Qərb dövlətlərinin başı Çinə qarışdığından Rusiya bu şansdan yararlana bilər. Ukrayna da öz növbəsində Almaniya kimi Avropadakı müttəfiqlərinin Rusiyadan qaz tədarükündən hədsiz dərəcədə asılı olduğundan ehtiyat edir.

Miraslan