Bundesverin Malidəki hərbi əməliyyatı Əfqanıstandakı missiyaya çox bənzəyir. AFR-in düşünülmüş hərəkət strategiyası yoxdur. Bundan əlavə, dünya təcrübəsi göstərdi ki, hətta superdövlət də partizan müharibəsi ilə mübarizə apara bilməz. Moderator.az xəbər verir ki, bu sətirlər alman tarixçi Mixael Volfsonun “Bild” üçün yazdığı “Malidə əməliyyat” məqaləsindəndir. Müəllif hesab edir ki, bu baxımdan artıq Malidə alman əsgərlərinin qalmasının heç bir mənası yoxdur.
Tarixçi bundesverin yeni uğursuzluğunun artıq üfüqdə olduğunu yazır. Malidəki əməliyyat 2012-ci ildən bəri həvəskar şəkildə və heç bir siyasi və ya hərbi strategiya olmadan aparılır, özü də təkcə AFR yox, həm də Fransa tərəfindən.
Müəllif qeyd edir ki, ABŞ, Almaniya və başqaları Əfqanıstanda da eyni dərəcədə həvəskar şəkildə əməliyyat keçirdilər. Əfqanıstanı Qərb tipli demokratik ölkəyə çevirmək kimi absurd fikir həmin vaxt AFR-in koalisiya hökumətində təmsil olunan sosial-demokratlar və “yaşıllar” tərəfindən xüsusi dəstək alırdı.
Volfson qeyd edir ki, eyni zamanda Almaniyanın Maliyə müdaxiləsinin məqsədi daha ağlabatan idi: islamçıların hakimiyyətə gəlməsinin qarşısını almaq. Ancaq bu məqsədə çatmaq üçün vasitələr uyğun deyildi, Almaniyanın yaxşı düşünülmüş strategiyası yox idi.
Müəllifin yazdığı kimi, islamçıların hakimiyyətə mümkün gəlişi qaçqın sayının kəskin artması demək olacaq. Bu baxımdan Almaniya və Fransanın Malidə çox fəal iştirak etməsinin səbəbi anlaşılandır. Volfson vurğulayır ki, heç bir şey qaydasında getmir: Malidəki hərbi əməliyyatların gedişi Əfqanıstanda olduğu kimidir. İslamçı qüvvələrə qarşı ilk hərbi əməliyyat uğurla başa çatdı, lakin o vaxtdan bəri tuareqlər və islamçılar tərəfindən aparılan uzun bir partizan müharibəsi başlayıb.
Müəllif qeyd edir ki, Fransanın hərbi səyləri uğur gətirmir: təcrübə göstərir ki, hətta supergüclər də partizan müharibəsinin öhdəsindən gələ bilmirlər. Bunu Əfqanıstanda ABŞ və SSRİ, Vyetnamda isə ABŞ sübut edib. Buna görə də indi Emmanuel Makron kursu dəyişmək və Malidən qoşunlarını çıxarmaq barədə düşünür.
Volfson yazır ki, hazırkı Mali hökumətinin islamçılarla hakimiyyət bölgüsü ilə bağlı danışıqlar aparmağa çalışması səbəbindən vəziyyət daha da pisləşir. Buna baxmayaraq, Almaniya Federativ Respublikası bundesverin fəaliyyətini 2022-ci ilin may ayına qədər uzatmaq qərarına gəldi. Eyni zamanda, problemin hərbi yolla həll edilə bilməyəcəyi göz qabağındadır. Siyasi həll qalır: Berlin Malinin federallaşmasını istəyir.
Müəllif hesab edir ki, Malidəki problemləri köhnə qaydada həll etmək artıq mümkün deyil. Alman və fransız qoşunları evlərinə qaytarılmalıdır. Onlar orada federalizmə keçid zamanı təhlükəsizliyin qarantı olaraq yalnız bir müddət qalmalıdırlar.
Tərcümə və təqdim etdi: Miraslan